Ngke e nako Kariraia Iesu ma taan rimwina ake aman n uarongorongo n taian “tinakoka ni kabutaa Kariraia” ao e a butanako taekan ana mwakuri aika kamimi ikanne. (Mareko 1:39) E roko rongorongoni baike e karaoi n te kaawa teuana are e mena iai te mwaane ae rebera. E kabwarabwaraa taekan teuaei te taokita ae Ruka bwa e “onrake n te rebera.” (Ruka 5:12) E kanaanako teutana imwin teutana bwain rabwatan te aomata te aoraki aei ni butina n te rabwata.

E rangi ni kakaiaki aorakin teuanne n te aro are e a riai ni maeka ni kararoaa ma aomata. Irarikin anne e na takarua ni kangai: “I kamwara, I kamwara!” ngkana e kaan ma aomata ngaia are e na tukiia bwa a na aki kaania bwa mwina a ewekaki irouna. (Nakoaia Ibonga 13: 45, 46) Ma tera ae e na karaoia ngkai te rebera anne? E kawara Iesu ao e katorobubua ni bobaraaki i matana ni bubutiia ni kangai: “Te Uea ko kona ni kaitiakai ngkana ko kani karaoia.”​—Mataio 8:2.

Ai korakorara onimakinan Iesu iroun teuaei! Ma ai kananoangara n aorakina ae reke irouna aei! Tera aron Iesu ni kaeka? Tera ae ko na karaoia ngke arona bwa ko mena ikekei? E kairaki Iesu n ana nanoanga ao e arora baina ao n ringa teuaei ma n taku: “I kani karaoia! Ko na itiaki.” (Mataio 8:3) E kona ni kangaanga irouia tabeman kakoauaan ae e a toki naba ngkekei reberana.

Tera am namakin ngkana iai am uea ae nanoanga ao n rabakau n aron Iesu? E kakoauaaki nakoira aron Iesu nakon te rebera aei bwa ngkana e a Uea n te aonnaba ni kabutaa, e nang kakororaoaki iai te taetae ni burabeti man te Baibara ae kangai: “E na nanoangaiia akana mangori ma akana maiu ni kainnano, ao e na kamaiuia akana maiu ni kainnano.” (Taian Areru 72:13) Eng, e nang katoka nanona Iesu ni buokiia aomata ni kabane ake a karawawataaki.

Uringnga bwa imwaini kamarurungan te rebera aei iroun Iesu, ao e rangi ni kaingaingaia aomata n ana mwakuri ni minita. A a kona ngkai aomata n ongoraea taekan te bwai ae kamimi are e a tia ni karaoia. Ma e ngae n anne, e aki tangiria Iesu bwa a na kabotoa aia onimaki aomata i aon tii rongorongona. E a ataa te taetae ni burabeti are, “e na aki kaongongo bwanaana i nanon te kawai,” are nanona e na aki taetae bwa e aonga ni kamoamoaaki iai. (Itaia 42:1, 2) Ai ngaia are e tuanga te rebera are e kamarurungnga arei ni kangai: “Taraiko bwa ko na aki tuanga temanna, ma naako kaotiko nakon te ibonga, ao aanga te karea are e tua Mote.”​—Mataio 8:4.

Ma n aron ae ko kona n iangoia, e rangi ni kukurei te mwaane are kamarurungaki ao e a aki kona ni karabaa i bon irouna taekan te baere e a tibwa riki. E nako ni kabutaanako te rongorongo n taabo nako n te aro are e a kauekei nanoia aomata bwa a na kan ataa riki taekana. N tokina ao e a iangoia Iesu bwa e na aki nakon te kaawa, ngaia are e a tiku tii ngaia n te tabo ae akea kaaina teutana te tai. Ma a bon teimatoa naba aomata n roko man taabo nako bwa a na reireinaki ao ni kamarurungaki irouna.