Berita pasal utai ti digaga Jesus ngelekai ba mayuh endur, seraya Jesus enggau empat iku murid iya nginjil ba “serata menua Galili, ngambika nusui Berita Manah ba balai gempuru.” (Mark 1:39) Maya nya, siku lelaki ke sakit lan ninga utai ke udah digaga Jesus. Luke, iya nya siku lutur madahka “penyakit nya bisi ba semua tubuh iya.” (Luke 5:12) Lebuh penyakit nya majak balat, begian tubuh ke kena sakit lan nya deka belubah-lubah luluh.

Keadaan lelaki tu amat balat, lalu iya patut diau jauh ari orang bukai. Enti orang bisi datai semak ngagai iya, iya patut nyebut enggau nyawa ti inggar, “Enda tuchi! Enda tuchi!” Iya patut madah munyi nya ngambika orang enda datai semak enggau iya sereta enda dirampit penyakit nya. (Adat Lewi 13:45, 46) Tang nama digaga lelaki tu? Iya mansang ngagai Jesus lalu besugang di mua iya. Ku lelaki nya: “Tuan, enti nuan deka, nuan ulih ngeraika aku.”—Matthew 8:2.

Lelaki nya ngayanka pengarap ti besai ngagai Jesus! Keadaan iya amat ngenyinuka ati laban iya balat sakit! Nama reaksi Jesus lebuh meda lelaki nya? Nama deka digaga nuan enti nuan bisi ba dia? Jesus berasai sinu meda lelaki nya. Udah nya, Jesus ngunjurka jari iya lalu negu lelaki nya. Jesus madah: “Aku deka! Gerai meh nuan.” (Matthew 8:3) Tekala nya, lelaki nya pan gerai. Sekeda orang tusah deka pechaya enggau utai ke nyadi nya.

Baka ni asai ati nuan di baruh perintah siku raja ti penuh enggau penyinu sereta ulih ngereja mayuh utai ti manah baka Jesus? Chara Jesus ngintu lelaki nya ngasuh kitai yakin, lebuh iya nyadi raja ke merintah serata dunya ba jemah ila, jaku benabi tu deka dikeamatka: “Iya sinu ati ke orang ke lemi sereta seranta. Iya ngidupka nyawa sida ke suntuk.” (Masmur 72:13) Ba jemah ila, Jesus tentu deka ngereja utai ke dikinginka iya, iya nya nulung semua orang ke merinsa.

Sebedau Jesus ngeraika lelaki nya, berita pasal pengawa nginjil iya udah ngasuh mayuh orang gagit ati. Lalu diatu, orang deka nemu pasal Jesus ke udah ngeraika lelaki ke sakit lan tu. Tang Jesus enggai orang arapka iya semina ketegal ninga berita pasal pengawa iya aja. Jesus nemu jaku benabi ke madahka ‘iya enda bejaku enggau nyawa ti inggar ba sebelah jalai raya.’ Reti iya, Jesus enda ngemesaika utai ke digaga iya. (Isaiah 42:1, 2) Pengudah Jesus ngeraika lelaki nya, Jesus madahka: “Anang madahka tu ngagai orang, tang mansang nuan ngagai imam. Udah nya, beri pemeri baka ke diasuh ba Adat Moses kena mandangka ngagai bala imam, nuan udah gerai.”—Matthew 8:4.

Ulih nuan ngambarka pengaga ati lelaki nya? Iya amat gagit ati laban Jesus udah ngeraika iya. Nyadi, iya majak nusui pasal utai ke nyadi nya ba serata endur. Ketegal nya, mayuh orang deka nemu pasal Jesus ke udah ngeraika lelaki nya. Nya alai, Jesus enda ulih agi ngayanka diri lebuh iya tama ngagai nengeri. Tang iya diau ba endur ti sunyi sereta nadai orang diau. Taja pia, orang agi datai betemu enggau Jesus laban sida deka iya ngajar sereta ngeraika sida.