ជំពូកទី២៥
លោកធ្វើឲ្យបុរសកើតឃ្លង់ម្នាក់ជាដោយក្ដីអាណិតអាសូរ
ម៉ាថាយ ៨:១-៤ ម៉ាកុស ១:៤០-៤៥ លូកា ៥:១២-១៦
-
លោកយេស៊ូបានធ្វើឲ្យបុរសកើតឃ្លង់ម្នាក់ជាសះស្បើយ
កាលដែលលោកយេស៊ូនិងអ្នកកាន់តាមបួននាក់ទៅផ្សព្វផ្សាយក្នុង«សាលាប្រជុំពេញស្រុកកាលីឡេទាំងមូល» ដំណឹងអំពីការអស្ចារ្យដែលលោកយេស៊ូធ្វើ បានឮសុសសាយ។ (ម៉ាកុស ១:៣៩) មនុស្សបាននិយាយតៗគ្នាអំពីការអស្ចារ្យទាំងនោះ រហូតទៅដល់ក្រុងមួយដែលមានបុរសម្នាក់កើតជំងឺឃ្លង់។ លូកាដែលជាគ្រូពេទ្យរៀបរាប់អំពីបុរសនោះថា គាត់«កើតឃ្លង់ពេញខ្លួន»។ (លូកា ៥:១២) ពេលជំងឺដែលគួរឲ្យខ្លាចនេះកាន់តែធ្ងន់ទៅ វានឹងបង្ខូចរូបកាយខាងក្រៅបន្ដិចម្ដងៗ។
ដោយសារ បុរសនេះមានជំងឺឃ្លង់ធ្ងន់ធ្ងរ នេះតម្រូវឲ្យគាត់រស់នៅដាច់ឆ្ងាយពីអ្នកឯទៀត។ ម្យ៉ាងវិញទៀត ដើម្បីកុំឲ្យមនុស្សដើរចូលជិតគាត់ ហើយឆ្លងមេរោគ នោះគាត់ត្រូវតែស្រែកថា៖ «ខ្ញុំស្មោកគ្រោកៗ»។ (លេវីវិន័យ ១៣:៤៥, ៤៦) ប៉ុន្តែ តើបុរសកើតឃ្លង់នេះបម្រុងធ្វើអ្វី? គាត់មកឯលោកយេស៊ូ ហើយលុតជង្គង់នៅមុខលោក ដោយអង្វរថា៖ «លោកម្ចាស់ បើលោកចង់ធ្វើឲ្យខ្ញុំជាស្អាត លោកអាចធ្វើបាន»។—ម៉ាថាយ ៨:២
បុរសនេះពិតជាមានជំនឿខ្លាំងមែនទៅលើលោកយេស៊ូ! ដោយសារជំងឺនេះ គាត់ពិតជាគួរឲ្យអាណិតណាស់! តើលោកយេស៊ូនឹងធ្វើយ៉ាងណា? បើអ្នកនៅទីនោះ តើអ្នកនឹងធ្វើដូចម្ដេច? ដោយចិត្តក្ដួលអាណិត លោកយេស៊ូបានលូកដៃទៅពាល់បុរសនោះ ហើយមានប្រសាសន៍ថា៖ «ខ្ញុំចង់ធ្វើឲ្យអ្នកជាស្អាតមែន។ សូមឲ្យជាស្អាតចុះ»។ (ម៉ាថាយ ៨:៣) មនុស្សខ្លះនៅទីនោះប្រហែលជាពិបាកជឿណាស់ ពីព្រោះក្រោយពីលោកយេស៊ូមានប្រសាសន៍ហើយ បុរសនោះបានជាស្អាតពីជំងឺឃ្លង់ភ្លាម។
តើអ្នកចង់មានស្តេចដែលមានចិត្តអាណិតអាសូរនិងមានសមត្ថភាពដូចលោកយេស៊ូឬទេ? របៀបដែលលោកប្រព្រឹត្តចំពោះបុរសកើតឃ្លង់នេះ ធ្វើឲ្យយើងជឿជាក់ថា ពេលលោកយេស៊ូគ្រប់គ្រងជាស្តេចមកលើផែនដីទាំងមូល នោះទំនាយក្នុងគម្ពីរនឹងក្លាយជាការពិត ដែលថា៖ «ទ្រង់នឹងមានសេចក្ដីអាណិតមេត្ដា ដល់មនុស្សរហេមរហាមនឹងមនុស្សទុគ៌ត ក៏នឹងជួយសង្គ្រោះជីវិតនៃមនុស្សក្រីក្រផង»។ (ទំនុកតម្កើង ៧២:១៣) ពិតណាស់ នៅពេលនោះ លោកយេស៊ូនឹងជួយមនុស្សទាំងអស់ដែលរងទុក្ខ។
អ្នកប្រហែលជានៅចាំថា សូម្បីតែមុនដែលលោកយេស៊ូធ្វើឲ្យបុរសកើតឃ្លង់នេះជា បណ្ដាជនរំភើបចិត្តជាខ្លាំងចំពោះកិច្ចបម្រើរបស់លោក។ ឥឡូវ ពួកគេនឹងឮអំពីការអស្ចារ្យមួយទៀតដែលលោកទើបតែធ្វើ។ តើតាមរបៀបណា? គឺតាមការនិយាយតៗគ្នា។ ប៉ុន្តែ លោកយេស៊ូមិនចង់ឲ្យបណ្ដាជនមានជំនឿលើលោកដោយផ្អែកទៅលើការនិយាយតៗគ្នានោះទេ។ លោកដឹងនូវទំនាយដែលថា លោកនឹង‹មិនឲ្យអ្នកណាឮសំឡេងលោកនៅក្នុងផ្លូវ› គឺលោកនឹងមិនខំលើកតម្កើងខ្លួន ដោយឲ្យបណ្ដាជនដើរប្រកាសអំពីលោកនោះទេ។ (អេសាយ ៤២:១, ២) ក្រោយពីលោកយេស៊ូបានធ្វើឲ្យបុរសកើតឃ្លង់នោះជាហើយ លោកក៏បានបង្គាប់គាត់ថា៖ «កុំប្រាប់អ្នកណាឲ្យសោះ តែចូរទៅបង្ហាញខ្លួនអ្នកដល់ពួកសង្ឃ ថែមទាំងជូនគ្រឿងបូជាដែលម៉ូសេបានកំណត់»។—ម៉ាថាយ ៨:៤
ប៉ុន្តែ ដូចអ្នកអាចស្រមៃគិត ពេលដែលបុរសនោះបានជាស្អាតភ្លាម គាត់ពិតជាសប្បាយរីករាយដល់ម្ល៉េះ បានជាគាត់មិនអាចទប់ចិត្តមិននិយាយអ្វីដែលបានកើតឡើងចំពោះគាត់បានទេ។ ដូច្នេះ គាត់ក៏ចេញទៅប្រាប់ដំណឹងនេះដល់មនុស្សនៅគ្រប់ទីកន្លែង។ ពេលដែលបណ្ដាជនឮរឿងនេះ ពួកគេកាន់តែចាប់អារម្មណ៍ចង់ជួបលោករហូតដល់លោកយេស៊ូមិនអាចចូលក្នុងក្រុងណាមួយបានទេ។ ហេតុនេះ លោកត្រូវនៅកន្លែងស្ងាត់មួយដែលឆ្ងាយពីគេអស់មួយរយៈពេល។ ទោះជាយ៉ាងនោះក៏ដោយ មនុស្សពីគ្រប់ទិសទីនៅតែតាមរកលោកដើម្បីសុំលោកឲ្យបង្រៀនពួកគេនិងធ្វើឲ្យពួកគេជាពីជំងឺ។