Yesu ne bana bandi ba bwanga baná po basapula “mu mashinankonka abo mu Ngadilea,” myanda ya bintu bya kutendelwa bilonga Yesu ibasambakana koku ne koku. (Mako 1:39) Myanda ya bilongwa byandi ibafika ne mu kibundi kimo mudi muntu umo ubela makopo. Muñanga Luka umutela’mba i “muyulwe makopo bā.” (Luka 5:12) Shi makopo abakomena’ko, ino misongo ilenga nzuba ilemekanga bipindi palapala bya ku ngitu.

Nanshi uno muntu udi mu ngikadilo mikomo imulomba ashikate kulampe na bantu. Kadi, shi bantu abamufwena ufwaninwe kwela lubila’mba, “Ne wa disubi, ne wa disubi!” mwanda wa kwibakankaja baleke kufwena bininge kutyina wakebasambwila’o. (Levi 13:45, 46) Ino pano uno wa makopo walonga bika? Wafwena Yesu ne kwivukwila kwadi, kamuzenze amba “A Mfumwami, shi usakile, nankyo ntōkeje.”​—Mateo 8:2.

Bine uno muntu udi na lwitabijo mudi Yesu! Ye uno wadi kamweka bya bulanda na ino misongo! Le Yesu usa kulonga’po namani? Shi abe wadi’ko, le wadi wa kulonga namani? Pa kutononwa na lusa, Yesu waolola kuboko kwandi ne kutenga uno muntu. Yesu kanena’mba: “Nsakile! Tōka tō.” (Mateo 8:3) Bikomo’nka ne kwitabija, ponka na ponka, makopo a muntu’wa abapwididila.

Le bine kusakangapo kwikala na mulopwe wa lusa kadi udi na bukomo pamo bwa Yesu? Muswelo waalonga na uno wa makopo witukulupija’mba Yesu pasa kuludika bu Mulopwe ntanda yonso, buno bupolofeto bwa mu Bible bukafikidila bwa amba: “Ukevwaninanga lusa mupēlulwe ne mulanda, kadi būmi bwa balanda ukebupandijanga.” (Ñimbo ya Mitōto 72:13) Bine, Yesu ukafikidija bisaka mutyima wandi​—kukwasha bonso basusuka.

Vuluka’mba nansha ke kumeso kwa kundapa uno wa makopo, mwingilo wa Yesu wadi utenkanya bantu. Pano bantu basa kwivwana kino kintu kitendelwa kyawalonga. Inoko Yesu kasakilepo bantu betabija mwadi kupityila’tu ku byobesapwila. Uyukile bupolofeto bunena’mba “kakalekapo diwi dyandi divwanikwe mu kipito,” ko kunena’mba mu muswelo wa mīdimuko. (Isaya 42:1, 2) O mwanda Yesu wasoñanya uno wa makopo waaundapa’mba: “Tala, kokasapwila muntu nansha umo, ino enda, kelombole kudi kitobo, ne kutūla kyabuntu kyātungile Mosesa.”​—Mateo 8:4.

Monka mokokeja kufwatakenya, uno muntu i musangale bininge pa kubelulwa wakomenwa kwilamina byobya byobamulongela. Waenda ne kusambakanya myanda’ya konsokonso. Kino kibalengeja bantu basangale kebakimbe kuyukila’ko myanda. Bibalengeja ne Yesu kakomenwa kwenda patōkelela mu kibundi, o mwanda washikata bidi kwa bunka kwa kubulwa muntu mu kitatyi kampanda. Nansha nabya, bantu ba koku ne koku kashā bāya kwadi kufundijibwa ne kundapwa.