A Zeezi ne a karen-biis a naasã “saaga Galɩle n moon koe-noogã karen-dotã pʋse,” hal tɩ nebã ra gomd bõn-kãsems nins b sẽn maanã yelle. (Mark 1:39) Wãoor n zĩnd tẽng a yembr n wʋm tɩ b gomd a Zeezi sẽn maan bũmb ninsã yelle. A Zeezi karen-biig a Luk sẽn da yaa logtorã yeelame tɩ raoã yĩngã fãa ra pida ne wãoodo. (Luk 5:12, MN) Wãood yaa bã-wẽng menga. A sã n paam pãnga, a rɩta a soabã yĩngã hal tɩ pa le sakd gesg ye.

Raoã wãoodã ra paama pãnga. A ra segd n zãaga a meng ne nebã. Sẽn paase, a sã n wa mik tɩ neb n pẽnegd-a, sẽn na yɩl t’a bãagã ra wa long-ba, a segd n zẽka a koɛɛg n yeel yaa: “Rẽgdo! Rẽgdo!” (Maan-kʋʋre 13:45, 46) La raoã maana woto bɩ? Ayo. A kolga a Zeezi, n wõgemd a taoor n kos-a woto: “Zu-soaba, yãmb sã n data, yãmb tõe n kɩtame tɩ mam lebg yɩlemde.”—Matye 8:2.

Raoã kɩsa sɩd t’a Zeezi tõe n maag-a lame. A bãagã tog n da kɩtame t’a lebg nimbãan-ned meng-menga. Bõe la a Zeezi maan-yã? Yãmb sã n da beẽ be, bõe la y na n maane? Raoã nimbãaneg yõka a Zeezi t’a tẽeg a nug n sɩɩs-a, n yeele: “Mam datame. Lebg yɩlemde.” (Matye 8:3) Zĩig pʋgẽ, raoã paama a meng ne a wãoodã. Ad tog n sɩd linga nebã hal wʋsgo.

A Zeezi sɩd yaa nimbãan-zoɛta, a leb n tara tõogo. Pa rĩm a woto buud la d fãa rat sɩda? A manesmã ne wãoorã kɩtame tɩ d tõe n bas d yam t’a sã n wa lebg tẽngã gill naaba, gomd Biiblã sẽn togs n na n sɩd pidsi. B yeelame: “Bãmb na n zoee pãn-komsem soab ne nimbãan-ned nimbãanega. Bãmb na n fãaga nimbãan-nebã vɩɩm.” (Yɩɩn-sõamyã 72:13) A Zeezi rata ne a sũur fãa n sõng neb nins fãa sẽn namsdã. Hakɩɩka, a sɩd na n maana woto a naamã wakate.

Tẽeg-y tɩ nand meng t’a Zeezi sãoog wãoorã, nebã sũy ra nooma wʋsg ne a sẽn da zoe n maan bũmb ninsã. La yaa vẽeneg tɩ nebã na n wʋma wãoorã kibarã me. La a Zeezi ra pa rat tɩ nebã tẽ yẽ, b sẽn wʋm bũmb nins a sẽn maandã yĩng bal ye. A ra miime tɩ Biiblã pĩnd n yeelame tɩ ‘ned kõn wʋm yẽnda koɛɛg soay zutu,’ rat n yeel t’a ka na n maand wilg-m-meng ne a yel-soalmã ye. (Ezayi 42:1, 2) Sɩd me, a Zeezi yeela raoã yaa: “Gũus f meng la f ra sak tɩ ned wʋm ye. Kẽng maan-kʋʋdã nengẽ tɩ b ges foom, la f kõ bũmb nins a Moyiis sẽn wilgã.”—Matye 8:4.

Mams-y n ges-y raoã sũur sẽn yɩ noog to-to! A ra pa tõe n sĩnd n pa togs ned bũmb ning sẽn maanã ye. A togsa kibarã hal tɩ yelg zĩig fãa. Woto kɩtame tɩ neb wʋsg yik n gẽesd a Zeezi, n dat n paam n yã a sẽn maand bũmb ninsã, hal meng t’a Zeezi pa le tõe n kẽ tẽngẽ tɩ pa yɩ ne soosg ye. Rẽ n so t’a ra kong n kẽnd zĩig neb sẽn ka beẽ, n na n gũ rasem a wãna. Baasgo, nebã ra yita zĩig fãa n watẽ, n dat t’a zãms-b la a sãoog b bãasã.