Jesu no vajiji vake varongomuna povanocumaira mu “masinagoga, mu Galileya mwese,” masoko ngo pamusoro po zviro zvinoshamaisa zviri kuitwa ndi Jesu anozika mu ndau jese. (Marco 1:39) Masoko o zviiito zva Jesu anoguma ku rimwe dhorobha rino mwanarume ano mapere. Murapi Ruka anomunanga kuti “waihwara [kana waizara ngo] mapere.” (Luka 5:12) Ndendha iyi poinothemekera (kana kukura) maningi, inokhuvaza mativi amweni o muviri, padoko ngo padoko.

Ngokudaro, mwanarume uu ari pa mugariro unosuruvarisa maningi zve anovangijihwa kuti agare ndhambo no vamweni. Kusiyapo izvo, paanokhwederehwa ngo vandhu, anodikana kumimira kuti “ndakangora! ndakangora!” kuitira kuvajivirira kuti vacamukhwederera maningi, vozopairihwavo. (VaLevi 13:45, 46) Waro nyamapere uu anoitenyi? Anokhwederera Jesu, wogwadama pambeji pake, zve womudeketerera eciti: “Tenji, kudari wecida, ungandirapa.”—Mateu 8:2.

Mwanarume uu anotenda maningi kamare kuna Jesu! Ndhendha yake iyi inoitisa kuti vandhu vamuzwire pena maningi. Waro Jesu anozodavirisa kudini? Kudari maengepovo maizoitenyi? Jesu acindundihwa ngo kuzwira pena, anotambanuja nyara womubata. Jesu anoti kwaari: “Ndinobzida, vangai.” (Mateu 8:3) Zvinganesa hazvo kuti vamweni vazvitende, asi mapere o mwanarume uu aperadi kamare.

Munozwa kudini ngo kuva na mambo anozwira pena zve anokwanisa kubesera vandhu inga ndi Jesu? Matajiro anoita Jesu nyamapere uu anotithembesa kuti paanozova Mambo wo nyika yese, cinozokwanirisika ciporofita co Bhaibheri cinonanga kuti, “anoitira unyaxa murembi no mutami, anoponesa varombo.” (Nduyo 72:13) Hina, Jesu anozokwanirisa cido co mwoyo wake co kubesera vandhu vese vanotambujika.

Ceujanyi kuti Jesu acito warapa nyamapere uu, mushando wake waidakarihwa maningi. Wari vandhu vanozwazve ngo pamusoro po mushamaiso waaitarizve. Asi Jesu aadi kuti vandhu vamutende ngo kucijikira po zvovanozwa basi. Jesu anozviziva kuti uphorofita hunonanga kuti “aazozwisi izwi rake mu makwanja,” kana kuti kuita avoneke kuva anoshamaisa. (Isaia 42:1, 2) Ngo zvinoitisa kuti Jesu abvunje mwanarume uu kudari: “Vonai, ucadosumurira ibzi ku mundhu ariwese. Endai kojitatija ku mupiri, ipaivo bzaakananga Mosi.”—Mateu 8:4.

Inga zvomunorangarira, mwanarume uu ari kudakara maningi ngo kurapwa kwaaitwa zvokuti aatokwanisi kuzvinyarara. Iyena anoenda zve anotanga kuzvisumurira vandhu vo mativi ese. Izvo zvinomusa cidaka-daka co vandhu co kuda kuziva zvizinji ngo pamusoro pa Jesu, zvoita kuti akonehwe kunghwina mu dhorobha naacikaziviki. Ngokudaro, anoenda kopeja mukuvo ari pandau icina mundhu. Pikija zvakadaro, vandhu vokubva mu ndharaundha jese vanoviya kuti vajijiswe no kurapwa ndiena.