Legan a manpupulong si Jesus tan saray apatiran disipulo to ed “saray sinagoga ra diad interon Galilea,” lalon niyaabawag iray balita ed makapadinayew iran gagawaen to. (Marcos 1:39) Saray gagawaen to et akabatan ed sakey a syudad ya diman et walay lakin akating. Deniskribe na doktor a si Lucas ya sayan laki et “napno na kating.” (Lucas 5:12) Talagan grabe la kanian kalkalna lan nadederal iray parte na laman to.

Pakaskasi lay kipapasen to tan kaukolan ya iyarawi so ayaman to. Niarum ni, kaukolan ya iyeyag toy “Agmalinis, agmalinis!” no wala ray asingger a totoo pian ag-ira onabay tan agnaalisan. (Levitico 13:45, 46) Balet antoy ginawa na sayan akating? Inasinggeran toy Jesus tan dinmakmomon mikakasi: “Katawan, no labay mo, sarag mo ak a linisan.”​—Mateo 8:2.

Talagan mabiskeg so pananisia tod si Jesus! Balet pakaskasin maong lapud grabe so sakit to! Antoy gawaen nen Jesus? Antoy gawaen mo no wadman ka? Lapud naabagey nen Jesus, inyunat toy lima to tan diniwit to so laki. Inkuan nen Jesus: “Labay ko! Nalinisan ka.” (Mateo 8:3) Nayarin agmakapanisia so arum, balet naandin tampol so kating na mansasakit a laki.

Kasin labay mon walay manari a maabagey tan walaan na pakapanyari a singa si Jesus? Say impamaabig tod akating et paneknek a no sikato lay Ari ed interon dalin, nasumpal iyan propesiyad Biblia: “Kasian to so pobri tan say mairap-bilay, tan isalba toy bilay na saray maniirap.” (Salmo 72:13) On, sumpalen nen Jesus so pilalek na puso ton tulongan so amin ya maniirap.

Tandaan ya antis to nin paabigen imay akating, tatalaranan la na saray totoo so ministeryo nen Jesus. Natan et naamtaan da iyan makapakelaw a ginawa to. Balet, aglabay nen Jesus ya manisia iray totoo ed sikato lapu labat ed nababalitaan da. Amta to imay propesiya ya “agto iparengel so boses to diad karsada,” odino diad ekstraordinaryon paraan. (Isaias 42:1, 2) Kanian oniay ingganggan nen Jesus ed pinaabig ton akating: “Agmon balot ibabaga iya ed anggan siopa, balet la ka, manpanengneng kad saserdote, tan mangiyapay kay regalo unong ed ingganggan nen Moises.”​—Mateo 8:4.

Balet lapud agaylay liket na samay laki ed inyabig to, agto apigilay sarili ton ag-ibagad arum so agawa. Sikatoy inmalis tan imbalita toy agawa ed anggan iner. Lapud satan et lalon interesado iray totoo. Anggad sinmabi punton agla basta-basta makaonlad syudad si Jesus, kanian nansiansia nin agano ed mareen ya lugar ya anggapoy manaayam. Balet siansia nin linmad sikato iray totoo pian manpabangat tan manpatambal.