Segun ku Hesus i su kuater disipelnan tabata prediká den “snoanan den henter Galilea,” notisia tokante e kosnan maravioso ku e tabata hasi a plama tur kaminda. (Marko 1:39) E notisia a yega te na un stat kaminda tabatin un hòmber ku lepra. Lukas, kende tabata dòkter, a bisa ku e hòmber akí tabata “tur na lepra.” (Lukas 5:12) Ora un persona tin lepra den un fase avansá, pokopoko vários parti di su kurpa ta kuminsá desfigurá.

Pues, e hòmber tabata den un situashon penoso, i e mester a keda leu for di otro hende. Es mas, ora tabatin hende den serkania, e mester a grita “impuru! impuru!” pa evitá ku nan ta yega muchu serka i ser kontagiá. (Levítiko 13:45, 46) Pero kiko e hòmber ku lepra akí a hasi? El a bai serka Hesus, bùig su dilanti i rog’é: “Señor, si bo ke, bo por kura mi.”—Mateo 8:2.

E tabatin hopi fe den Hesus. Bo por imaginá bo kon desfigurá e hòmber akí tabata? Kon Hesus a reakshoná? Kiko abo lo a hasi si bo tabata einan? Wèl, Hesus a sinti duele di e hòmber. P’esei, el a saka su man, mishi ku e hòmber i a bis’é: “Mi ke. Sea kurá.” (Mateo 8:3) I en bèrdat, e hòmber a kura kompletamente maske tabata difísil pa algun hende ku a mira esei kere.

Abo no ke tin un rei kompasivo i poderoso manera Hesus? E manera ku Hesus a trata e hòmber akí ta un garantia ku ora Hesus ta Rei di henter mundu, e siguiente profesia bíbliko lo kumpli: “E lo tin kompashon di e pober i di esun den nesesidat, i e lo salba bida di esnan den nesesidat.” (Salmo 72:13) Sí, e tempu ei, kumpliendo ku su deseo sinsero, Hesus lo yuda tur hende afligí.

Ta bon pa kòrda ku, asta promé ku Hesus a kura e hòmber akí, ya e hendenan tabata masha impreshoná pa motibu di Hesus su predikashon i obranan. Bo por imaginá bo kon nan lo a sinti ora nan a tende tokante e milager maravioso akí? Pero Hesus no tabata ke pa hende pone fe den dje djis pa motibu di loke nan a tende. E tabata sa di e profesia ku a bisa ku lo e “no laga su bos wòrdu tendí den kaya,” esta, ku sensashonalismo. (Isaías 42:1, 2) P’esei Hesus a bisa e hòmber ku el a kura: “Wak pa bo no konta ningun hende, ma bai, laga e saserdote wak bo i hasi e ofrenda ku Moises a preskribí.”—Mateo 8:4.

Pero manera bo por imaginá, e hòmber a keda asina kontentu ku el a kura ku e no por a keda sin konta hende loke a pasa kuné. El a bai i a kuminsá plama e notisia tur kaminda i e hendenan a bira mas kurioso ainda. E situashon a bira di tal forma ku Hesus no por a kana libremente mas den e statnan. P’esei, pa un tempu, e tabata keda na lugánan isolá, kaminda no tabatin hende ta biba. Asina mes, hende di tur kaminda tabata bini serka dje pa e siña nan i kura nan.