Jesusqa tawa yachachisqasninwan khuska, “tukuynin Galileata purimorqa sinagogasninkupi willaraspa”. Tukuynejpitaj Jesuspa milagrosninmanta uyarikorqa (Marcos 1:39). Ajinapi uj lepra onqoyniyoj runapis Jesusmanta uyarillasqataj. Lucas librota qhelqajqa, doctor karqa. Paytaj chay runamanta nerqa: “Lepra onqoywan juntʼa kasharqa”, nispa (Lucas 5:12). Lepra onqoyqa millay karqa, llejtismanta qallarej, pisimanta pisitaj runaj aychanta ismuchej, juskʼurparejtaj.

Chay lepra onqoyniyoj runaqa, leprawan juntʼa kasharqa. Chayrayku runasmanta karupi tiyakunan karqa. Chantapis Ley nisqanman jina, “leprayoj kani, leprayoj kani” nispa qhaparinan karqa. Ajinamanta runas mana qayllaykunankupaj, nitaj chay onqoywan chimpachikunankupaj (Levítico 13:45, 46). Jinapis chay runaqa, Jesusman qayllaykorqa. Chantá pampakama kʼumuykukuspa mayta mañakorqa: “Señor, munankichus chayqa, atinki sanoyachiwayta”, nispa (Mateo 8:2).

Chay runaqa manchay creeyniyoj karqa. Jesustajrí sinchʼi onqosqata rikuspa, sonqonta nanachikorqa. Chayrayku payta khuyakuspa makinwan llankharerqa, nerqataj: “Arí, munani. Sanoyapuy”, nispa (Mateo 8:3). Chay runataj chay ratopacha sanoyaporqa. Chayqa tʼukunapaj jinapuni karqa. Qan chaypi kawaj karqa chay, ¿Jesús jinachu chay runata khuyakuwaj karqa?

Jesusqa may khuyakuyniyoj, atiyniyojtaj karqa. Lepra onqoyniyoj runata khuyakusqanqa, rikuchiwanchej imatachus qhepaman ruwananta. Jesús gobernashajtintaj, kay qhelqasqa juntʼakonqa: “Llampʼu sonqoyojkunata khuyakonqa, wajchakunatataj wañuymanta salvanqa” (Salmo 72:13). Jesusqa tukuy ñakʼarejkunata yanapanqa. Chaytataj maytapuni ruwayta munashan. Arí, tukuypis munanchej chay jina khuyakuyniyoj gobiernotaqa.

Runasqa Jesusmanta tukuynejpiña parlasharqanku, lepra onqoyniyoj runata niraj sanoyachishajtinpis. Chayrayku Jesús lepra onqoyniyoj runata sanoyachisqanmanta, astawanrajchá parlankuman karqa. Jinapis Jesusqa mana munarqachu wajkuna parlasqankuraykulla runas paypi creenankuta. Payqa yacharqa profeta Isaías paymanta nisqanta: “Manataj callespipis sinchʼita parlanqachu”, nispa. Jesusqa mana alabachikuyta munarqachu (Isaías 42:1, 2). Chayrayku lepra onqoyniyoj runata sanoyachiytawan, payman nerqa: “Ama pimanpis kaytaqa willankichu, manachayqa rispa sacerdotewan rikuchikamuy, chantá Moisés kamachisqanman jina jaywanaykita qomuy”, nispa (Mateo 8:4).

Chay runatajrí sanoyapusqanmanta manchay kusisqa kasqanrayku, tukuyman chayta willaramorqa. Runastaj chayta uyarispa Jesusmanta astawan yachayta munarqanku. Chayrayku Jesusqa manaña llajtasman sutʼimanta yaykuyta atejñachu. Astawanpis chʼinkunallapiña kakoj. Runastajrí tukuynejmanta Jesusman jamullajpuni kanku, sanoyachisqa kanankupaj, yachachisqanta uyarinankupajtaj.