Jesusqa chusku qateqninkunawanmi ‘entëru Galilëa provinciapa purirqan Diosta adorayänan wayinkunachö willakurnin’, y alläpa espantakïpaq ruranqankunataqa pï mëmi musyariyarqan (Marcus 1:39). Lepra qeshyayoq nunapa markanchöpis tsëkunataqa willakuyarqanmi. Doctor Lücasqa tsë nunata “lepra ushashqa” kanqantam nirqan (Lücas 5:12). Lepra qeshya mas antsaptinqa, nunapa qaranmi ushakar qallëkun.

Tsë nuna alläpa antsashqana karmi, nunakunawanqa täraqnatsu. Y Diospa Leynin ninqannömi, pitapis mana muyanampaq y pëman alläpa mana witiyänampaq ‘¡leprayoqmi kä!’ nir sinchipa neq (Levïticu 13:45, 46). Jesusta rikärirqa, ¿imatataq tsë nuna rurarqan? Puntanman qonqurikïkurmi kënö rogakurqan: “Teytë, qam munarninqa kachakäratsimankimanmi” (Mateu 8:2).

¡Jesusmanqa alläpam markäkurqan! Tsënö këkaqta rikarqa Jesusqa alläpachi llakiparqan. ¿Imataraq rurarqan? ¿Imataraq qamqa rurankiman karqan? Jesusqa alläpa ankuparmi yatëkur kënö nirqan: “¡Munämi kachakänëkita!” (Mateu 8:3). Mana creipaqnö kaptimpis, jinan höram lepranqa chipyëpa ushakärirqan.

¿Manatsuraq tsënö ankupäkoq y poderyoq Rey gobernashunëkita munankiman? Tsë nunata imanö tratanqanmi rikätsimantsik, Patsata gobernamurnin alläpa ankupämänapaq kaqta y Bibliachö kënö ninqan cumplikänampaq kaqta: “Alläpam ankupanqa waktsata y humildi nunata, y waktsa nunakunapa kawënintam salvanqa” (Salmus 72:13). Awmi, tsë tiempu chäramuptinqa llapan sufrikaq nunakunatam Jesusqa yanapanqa.

Rikanqantsiknömi, tsë milagruta manaraq ruraptimpis Jesuspa sagrädu rurënimpaqqa pï mëna parlëkäyarqan. Tsëpitaqa jina leprayoq nunata kachakätsinqantapis musyariyarqanchi. Peru Jesusqa manam munarqantsu jukkuna niyanqanllapita pëman creiyänantaqa. Pëqa musyarqanmi Diospa Palabran kënö ninqanta: “Manam cällikunachö parlanqan wiyakanqatsu”. Tsëqa rikätsikurqan precisaqtukur mana parlanampaq kaqtam (Isaïas 42:1, 2). Tsëmi kachakäratsinqan nunata kënö nirqan: “Paqtataq pitapis willankiman, tsëpa rantinqa, sacerdöti kaqta ëwë y Moises qellqanqan Ley ninqannö ofrendëkita qoy” (Mateu 8:4).

Peru tsë nunaqa alläpa kushishqam këkarqan kachashqa kanqampita, tsëmi upällalla kakïtaqa puëdirqantsu. Jesus kachakätsishqa kanqanta pï mëta willakushqa kaptinmi, nunakunaqa Jesuspita masraq musyëta munayarqan. Tsëmi Jesusqa më markamampis tranquïlu chëta puëdirqannatsu, tsënöpam juk tiempupa pipis mana täränan sitiukunaman ewkurqan. Tsënö kaptimpis, yachatsikunqanta wiyëta y kachakëta munarmi më tsë sitiukunapita Jesus kaqman ëwar sïguiyarqan.