Mu ndzidzi ukhamwaza mphangwa Yezu na anyakupfundzace anai ‘m’masinagoga mu cisa consene ca Galileya,’ mphangwa zikhalonga thangwi ya mabasa akudzumisa a Yezu zamwazika mwakucimbiza kakamwe. (Marko 1:39) Mphangwa zenezi zafika mpaka ku nzinda ukhali na mamuna wakuti akhali na matanya. Dotoro Luka alonga kuti mamuna unoyu akhali na “matanya m’manungo mwonsene.” (Luka 5:12) Utenda unoyu ungakhalikira, mwapang’ono-pang’ono usalamaza makhundu anango a manungo.

Natenepa mamuna unoyu akhali m’makhaliro akunentsa kakamwe kwakuti nee akhafunika kukhala cifupi na anthu anango. Kusiyapo pyenepi, munthu anganfendedzera, akhafunika kukhuwa: ‘Ndine wakukhonda cena! Ndine wakukhonda cena’ toera anango akhonde kunfendedzera na kuthaphula utenda wace wakugopswa. (Levitiko 13:45, 46) Mphapo mamuna unoyu acitanji? Iye aenda kagodamira Yezu mbadembetera: ‘Mbuya, imwe mungafuna, munakwanisa kundiwangisa.’—Mateu 8:2.

Onani cikhulupiro cikhali na mamuna unoyu kuna Yezu. Utenda wace ukhadancitisa kumala ndzeru. Mphapo Yezu mbadacitanji? Kodi mbumudakhalambo penepo mbumudacitanji? Thangwi ya ntsisi, Yezu afuthula manjace mbaphata mamuna unoyu. Yezu ampanga: ‘Ine ndisafuna! Utenda wako mbuwangiswe.’ (Mateu 8:3) Mu ndzidzi unoyu matanya amala m’manungo mwa mamuna unoyu kwakuti panango pikhali pyakunentsa toera anthu akhulupire.

Kodi musafuna kukhala na mambo wantsisi na wakukwanisa kuwangisa ninga Yezu? Munjira idatsalakana iye nyamatanya pisapangiza kuti Yezu angadzakhala Mambo pa dziko yonsene, inadzakwanirisika profesiya iyi ya Bhibhlya: ‘Anabvera ntsisi anthu akucepeseka na akutcerenga; anadzapulumusa umaso wa anyakutcerenga.’ (Masalmo 72:13) Inde, Yezu anadzakwanirisa cifuniro cace cakuphedza anthu onsene anathabuka.

Kumbukani kuti maseze mbadzati kuwangisa nyamatanya, utumiki wa Yezu ukhali wakufunika kakamwe kwa anthu. Cincino anthu mbadakwanisa kubva pya cirengo ceneci cakudzumatirisa. Mbwenye Yezu nee akhafuna kuti anthu akhulupire basi ene pikhabva iwo thangwi ya iye. Yezu akhadziwa profesiya inalonga kuti ‘fala yace nee inabviwa mu nseu,’ peno kulonga mbiri thangwi ya iye. (Izaiya 42:1, 2) Na thangwi ineyi, Yezu apanga mamuna adawangisa iye: ‘Leka kupanga nee munthu m’bodzi, mbwenye ndoko ukapangizike kuna anyantsembe, ungamala pereka ntsembe idalonga Mose.’—Mateu 8:4.

Mbwenye nakuti mamuna unoyu atsandzaya kakamwe pidawangiswa iye, acimwana kucita pidampanga Yezu. Iye aenda konsene kwene mbalonga thangwi yakuwangiswa kwace. Pyenepi pyacitisa anthu kufuna kakamwe kupionambo. Na thangwi ineyi, Yezu akhonda kupita mu nzinda mwapakweca. Iye akhala ndzidzi ungasi mbakhonda kuoniwa na anthu. Ngakhale tenepo, anthu a mbuto zonsene akhabwera toera kupfundziswa na kuwangiswa na iye.