I te oloatuga a Iesu mo ana soko e tokofa o talai i “sunako i Kalilaia kātoa,” ne salalau valevale a tala e uiga ki mea fakaofoofogia kolā ne fai ne ia i kogā koga katoa i konā. (Maleko 1:39) Ne oko atu te tala e uiga ki ana faifaiga i te fa‵kai e tasi telā ne nofo i ei se tagata e maua ne te lepela. Ne fakamatala mai ne te tokita ko Luka me i tena foitino “ko ‵fonu eiloa i te lepela.” (Luka 5:12) Kafai ko lasi te masaki fakamataku tenā, e gasolosolo malie eiloa tena fakamaseiga ki vaega kese‵kese o te foitino.

Tela la, ko oko eiloa i te fakafanoanoa o te tulaga o te lepela tenei kae ne manakogina ke faka‵mao a ia mai nisi tino. E se gata i ei, e ‵tau mo ia o kalaga atu, penei: “Se ‵ma! Se ‵ma!” māfai e isi ne tino ko fakapili‵pili atu ko te mea ke puipui i ei latou mai te fakapili‵pili atu ki a ia kae ‵pisi foki i ei. (Levitiko 13:45, 46) Se a te mea ko fai nei ne te lepela tenei? Ne fanatu a ia ki a Iesu kae totuli i ana mua kae punou ifo tena ulu, kae fakamolemole atu ki a Iesu: “Te Aliki, kafai e manako koe ki ei, e mafai o fai ne koe au ke ‵ma.”—Mataio 8:2.

Ko oko eiloa i te lasi o te fakatuanaki o te tagata tenā ki a Iesu! Ko oko foki eiloa i te fakaa‵lofa o ana foliga ona ko te masaki tenā! Ne saga atu pefea a Iesu? Moi ne nofo atu koe i konā, ne a au mea ka fai? Ona ko tena loto alofa, ne ‵kapa atu te lima o Iesu kae fakapatele atu ki te tagata tenā. Ne fai atu a Iesu ki a ia: “Au e manako ki ei! Ke ‵ma koe.” (Mataio 8:3) E tiga eiloa ne faigata ki nisi tino ke tali‵tonu ki ei, ne ‵lei fakavave a te lepela o te tagata masaki.

Se a tau faka‵tau māfai e maua se tupu telā e loto alofa kae fai mea mafai e pelā mo Iesu? A faifaiga a Iesu ki te lepela tenei e fakatalitonu mai ki a tatou me kafai ko fai a Iesu mo fai te Tupu ki te lalolagi kātoa, ka fakataunu mai i ei te valoaga tenei i te Tusi Tapu: “E alofa a ia ki tino vāi‵vai mo tino ma‵tiva; e fakasao foki ne ia a olotou ola.” (Salamo 72:13) E tonu, i konā loa ne fakataunu ne Iesu te mea telā e loto a ia ki ei ke fesoasoani atu ki tino fakaa‵lofa katoa.

Masaua me koi tuai o faka‵lei ne Iesu te lepela tenei, ne ua‵te valevale a tino ona ko te galuega a Iesu ne fai i va o tino. Ko ‵logo nei a tino e uiga ki mea fakaofoofogia ne fai ne ia. Kae ne seki manako a Iesu ke fakatuanaki atu fua a tino ona ko mea ne lagona ne latou. Ne iloa ne ia a te valoaga telā e fai mai me ka “se sona pakalaga a ia io me faipati i te leo maluga i auala,” ko tena uiga, i se auala fakaofoofogia. (Isaia 42:1, 2) E ‵tusa mo te valoaga tenā, ne fakatonu atu ei a Iesu ki te tagata lepela telā ko ‵lei: “Ke mo a e fakailoa atu ne koe a te mea tenei ki se tino, kae fano o fakaasi atu a koe ki te faitaulaga kae ofo atu te meaalofa telā ne fakatonu mai i te tulafono a Mose, ke fai mo fai se molimau ki a latou.”—Mataio 8:4.

Kae e mafai o fakaataata i tou mafaufau a te lasi o te fiafia o te tagata telā ne seki mafai ne ia o taofi te tala e uiga ki te mea ne fatoa tupu. Ne fanatu a ia kae ne fakasalalau atu ne ia te tala tenā ki kogā koga katoa. Ne fai ne te mea tenei ke gasolo aka te fia‵fia mo te fia ‵logo o tino. Ne oko eiloa ki se tulaga telā ne seki mafai o toe fakasaesae atu a Iesu ki loto i te fa‵kai, kae ne nofo atu a Iesu i koga kolā e seai ne tino i ei. Kae ko tino mai kogā koga katoa ne olo atu ke akoako ne ia kae faka‵lei foki olotou ma‵saki.