Han hi Jesus ngan an upat niya nga disipulo nagsangyaw ha “mga sinagoga ha bug-os nga Galilea,” nahibantog an iya mag-opay nga buhat. (Marcos 1:39) Nakaabot ito nga sumat ha syudad diin naukoy an usa nga may liprosi. Sumala ha doktor nga hi Lucas, “grabe an liprosi” hito nga tawo. (Lucas 5:12) Kon grabe na inin makangingirhat nga sakit, hinay-hinay nga gindadaot hini an iba-iba nga bahin han lawas.

Salit makalolooy gud ini nga may liprosi ngan obligado hiya umukoy hirayo ha iba. Dugang pa, kon may mga tawo ha iya hirani kinahanglan hiya gumuliat hin “mahugaw, mahugaw” basi mapugngan hira nga dumaop ha iya ngan diri mataponan han sakit. (Lebitiko 13:45, 46) Kondi ano an bubuhaton yana hini nga may liprosi? Dinaop hiya kan Jesus, yinukbo, ngan nakimalooy: “Ginoo, kon karuyag mo, matatambal mo ako.”—Mateo 8:2.

Daku gud an iya pagtoo kan Jesus! Ngan makalolooy gud hiya pagkit-on tungod hini nga sakit! Ano an bubuhaton ni Jesus? Kon nakadto ka, ano an imo hihimoon? Nalooy hi Jesus, salit ginkaptan niya an lalaki, ngan nagsiring: “Karuyag ko nga matambal ka.” (Mateo 8:3) Baga hin diri katoohan, pero nawara dayon an iya liprosi.

Karuyag mo ba nga magin hadi an usa nga mapinairon ngan may kapas pariho kan Jesus? An iya pagtambal hini nga may liprosi nagpapasarig nga kon hiya na an Hadi ha bug-os nga tuna, matutuman ini nga tagna ha Biblia: “Malolooy hiya ha mga kablasanon ngan makinurion, ngan an mga kalag han mga makinurion iya pagluluwason.” (Salmo 72:13) Oo, hito nga panahon tutumanon ni Jesus an iya hingyap nga buligan an ngatanan nga nag-aantos.

Hinumdumi nga antes pa tambalon ni Jesus ini nga may liprosi, an mga tawo nalilipay na gud ha iya ministeryo. Yana hibabatian nira an mahitungod hinin urusahon niya nga buhat. Pero diri karuyag ni Jesus nga tumoo ha iya an mga tawo tungod la han ira hinbatian. Maaram hiya han tagna nga nasiring nga an iya tingog ‘diri ipapabati dida ha kalsada,’ basi la dayawon hiya han mga tawo. (Isaias 42:1, 2) Salit, iya ginsugo an tawo nga iya gintambal: “Ayaw gud pagsumat ha bisan hin-o, kondi kadto lugod ha saserdote, ngan paghalad sumala ha iginsugo ha balaud ni Moises.”—Mateo 8:4.

Kondi sugad han imo mahuhunahuna, nalipay gud an lalaki ha pagtambal ha iya salit waray hiya makapugong nga isumat ito ha iba. Linakat hiya ngan iginpinanumat ito ha bisan diin. Tungod hini nainteres an mga tawo ngan karuyag nira manginsayod hito. Inabot ha punto nga hi Jesus diri na nakakakadto ha syudad hin dayag salit didto la anay hiya ha mamingaw nga lugar nga waray naukoy. Bisan pa hito, napakadto la gihapon ha iya an mga tawo tikang ha iba-iba nga lugar basi magpatutdo ngan magpatambal.