Jesús yéetel u kantúul disipuloʼobeʼ kʼaʼaytajnajoʼob «teʼ sinagogaʼob yaan tiʼ tuláakal Galilea[oʼ]», le baʼaxoʼob tu beetoʼ ojéeltaʼab tuláakal tuʼux (Marcos 1:39). Ojéeltaʼab tak tu kaajal juntúul máak yaan lepra tiʼ. Le doctor Lucasoʼ ku yaʼalikeʼ le máakoʼ «chuup u wíinklil yéetel lepra» (Lucas 5:12). Ken jach maaschajak le kʼojaʼanil tiʼ máakoʼ ku beetik tak u tsʼúukul u bakʼel.

Le oʼolal jach yaj yanil le máakoʼ, tsʼoʼoleʼ le máaxoʼob yaan lepra tiʼoboʼ ku yaʼalaʼal ka náachchajkoʼob tiʼ u maasil. Ken u yil táan u náatsʼal máak tu yiknaleʼ unaj u yaʼalik kʼojaʼan. Beyoʼ maʼ kun náatsʼloʼob tu yiknal yoʼolal maʼ u páakʼal tiʼob le kʼojaʼaniloʼ (Levítico 13:45, 46). Baʼaleʼ ¿baʼax tu beetaj le máak ka tu yilaj Jesusoʼ? Náatsʼ tu yiknaleʼ ka xolaj tu táan, ka tu yaʼalajtiʼ: «Yuumtsil, wa a kʼáateʼ jeʼel u páajtal a tsʼakikeneʼ» (Mateo 8:2).

Le máakoʼ jach ku tsʼáaik u fe tiʼ Jesús. Chéen tukult bix yanil u wíinklil yoʼolal le kʼojaʼanilaʼ. ¿Baʼax túun aʼalaʼabtiʼ tumen Jesús? ¿Baʼax jeʼel a beetik wa tiʼ teech ku kʼáatik áantajeʼ? Jesuseʼ tu chʼaʼaj óotsilil tiʼ, ka tu tichʼaj u kʼabeʼ ka tu péetsʼkʼabtaj, ka tu yaʼalajtiʼ: «In kʼáat. Utschajkech» (Mateo 8:3). Maʼ xaaneʼ yaan máaxeʼ maʼ tu jáan creertik wa jeʼel u yutstaleʼ, baʼaleʼ le máakoʼ tu séebaʼanil utschaj le lepra tiʼoʼ.

¿Maʼ wa uts ta tʼaan ka anak juntúul rey ku chʼaʼik óotsilil yéetel ku páajtal u tsʼakik le kʼojaʼanoʼob, jeʼex tu beetil Jesusoʼ? Le bix úuchik u tsʼakik le leprosooʼ ku yeʼesikeʼ ken káajak u beetik u Reyil yóokʼol tuláakal le Luʼumaʼ yaan u béeytal le baʼax ku yaʼalik le Bibliaaʼ: «Bíin u chʼaʼ óotsilil tiʼ le kabal óoloʼoboʼ[,] yaan u [salvartik] u kuxtal le óotsiloʼoboʼ» (Salmo 72:13). Jeʼex túun k-ilkoʼ Jesuseʼ yaan u yáantik tuláakal le ku muʼyajoʼob, jach jeʼex u tsʼíiboltikoʼ.

Kʼaʼajaktecheʼ táanil tiʼ u tsʼakik Jesús le leprosooʼ, yaʼab máaxoʼob ku jaʼakʼal u yóoloʼob yoʼolal le baʼaxoʼob ku beetkoʼ. Beoraaʼ le máakoʼoboʼ yaan u yuʼubikoʼob u tsikbalil le úuchik u tsʼakik le máakoʼ. Baʼaleʼ Jesuseʼ maʼ u kʼáat ka u tsʼáa u fe le máakoʼob tiʼ letiʼ chéen yoʼolal le baʼaxoʼob ku yuʼubikoʼob u yaʼalaʼaloʼ. Letiʼeʼ u yojel le profecíaoʼ ku yaʼalikeʼ «maʼ bíin u beet u yuʼubaʼal u tʼaan tiʼ bejoʼob» chéen utiaʼal ka ojéeltaʼak baʼaxoʼob ku beetkiʼ (Isaías 42:1, 2). Le oʼolal tu yaʼalaj tiʼ le leprosooʼ: «Ilawil maʼ a waʼalik tiʼ mix máak, baʼaleʼ xeen ka u yilech le sacerdoteoʼ, yéetel kʼub le siibal tu yaʼalaj Moisés unaj u tsʼaʼabaloʼ» (Mateo 8:4).

Baʼaleʼ le máakoʼ, tumen jach kiʼimak u yóoleʼ, joʼopʼ u tsikbaltik tiʼ tuláakal máak bix úuchik u tsʼaʼakal. Leloʼ tu beetaj u taaktal u yilaʼal tumen le máakoʼob le baʼaxoʼob ku beetik Jesusoʼ. Le oʼolal Jesuseʼ pʼáat maʼ tu páajtal u yokol teʼ kaajoʼoboʼ, baʼaxeʼ ku pʼáatal tuʼux minaʼan mix máakiʼ. Kex beyoʼ le máakoʼoboʼ ku bin u yiloʼob utiaʼal ka kaʼansaʼakoʼob yéetel utiaʼal ka tsʼaʼakakoʼob.