Yesu he sane gbɛ fĩa mahi fuu a nɔ. Nihi babauu hia blɔ gagaa kɛ ya Yesu ngɔ konɛ a ya bu lɛ tue, nɛ a ya hyɛ nyakpɛ níhi nɛ e ngɛ pee ɔ. Se be bɔɔ se ɔ, e kpale kɛ ho he nɛ e pɔɔ fiɛɛmi ngɛ ɔ ya ngɛ Kapernaum. E kɛ we kulaa nɛ nihi nɛ a ngɛ Kapernaum kɛ Galilea wo ɔ nya a tsuo nu kaa Yesu kpale kɛ ba. Enɛ ɔ ha nɛ nihi fuu ya e ngɔ ngɛ he nɛ e ya to ɔ. Farisi bi kɛ Mlaa tsɔɔli nɛ a je Galilea, Yudea kɛ Yerusalem ɔ hu ya e ngɔ.

‘Nihi babauu bua a he nya ngɛ lejɛ ɔ, nɛ a nɛ́ blɔ ngɛ agbo ɔ nya tete.’ (Marko 2:2) E kɛ we kulaa nɛ nɔ́ ko nɛ ngɛ nyakpɛ ya nɔ. Nɔ́ nɛ ya nɔ ɔ ha nɛ wa na kaa Yesu ngɛ he wami nɛ e kɛ ma je nɔ́ nami kɛ je, nɛ e ma nyɛ ma ha nɛ adesahi ma ná nɔmlɔ tso mi he wami kpakpa.

Benɛ Yesu ngɛ nihi nɛ a bu kɛ ba e ngɔ ɔ ní tsɔɔe ɔ, nyumu eywiɛ komɛ ngɔ nyumu ko nɛ e hule kɛ fɔ̃ sa nɔ kɛ ba lejɛ ɔ. Nyumu ɔmɛ a suɔ nɛ Yesu nɛ tsa a huɛ ɔ. Se akɛnɛ nihi a he hiɛ tsɔ ngɛ sinya a nya he je ɔ, ‘a nɛ́ blɔ nɛ a kɛ lɛ nɛ su Yesu ngɔ.’ (Marko 2:4) Ke a hyɛ dengme nɛ a gbo loko a ngɔ nyumu ɔ kɛ ba a, e maa dɔ mɛ kaa a maa kpale lɛ kɛ ho be mi nɛ e ná we tsami. Enɛ ɔ he ɔ, a kuɔ kɛ ya tsu ɔ yi mi, nɛ a je puɔ ngɛ he nɛ Yesu daa si ngɛ ɔ tutuutu. Kɛkɛ nɛ a ngɔ hiɔtsɛ ɔ kɛ gu lejɛ ɔ kɛ sɛ we ɔ mi.

Anɛ Yesu mi mi fu mɛ ngɛ nɔ́ nɛ a pee ɔ he lo? Dɛbi! Mohu ɔ, hemi kɛ yemi nɛ a je kpo ɔ pee lɛ nyakpɛ, nɛ e de hiɔtsɛ ɔ ke: “A kɛ o he yayami ɔmɛ pa mo.” (Mateo 9:2) Anɛ Yesu ma nyɛ maa ngɔ nihi a he yayami kɛ pa mɛ niinɛ lo? Farisi bi ɔmɛ kɛ mlaa tsɔɔli ɔmɛ je atsinyɛ ngɛ nɔ́ nɛ Yesu de ɔ he , nɛ a de ke: “Mɛni e ngɛ dee nɛ ɔ? E ngɛ musu bɔe. Nɔ ko be nyɛe nɛ e kɛ yayami maa pa, jã Mawu pɛ.”​—Marko 2:7.

Benɛ Yesu na nɔ́ nɛ a ngɛ susue ɔ, e de mɛ ke: “Mɛni he je nyɛ ngɛ ní nɛ ɔmɛ susue ɔ? Te nɔ́ nɛ demi yee nɛɛ; kaa a ma de nɔ nɛ hule pue si ɔ ke, ‘A ngɔ o he yayami ɔmɛ kɛ pa mo,’ loo kaa a ma de ke, ‘Tee si nɛ o hluɛ o sa a nɛ o nyɛɛ?’” (Marko 2:8, 9) Niinɛ, ngɛ afɔle nɛ Yesu maa ngɔ e wami kɛ sã a he je ɔ, e ma nyɛ maa ngɔ nyumu ɔ he yayamihi kɛ pa lɛ.

Kɛkɛ nɛ Yesu ha nɛ ma kpekpemi ɔ kɛ nihi nɛ a ngɛ e he guɛ gbee ɔ na kaa e ngɛ he wami nɛ e kɛ tɔ̃mi ma nyɛ maa pa nihi ngɛ zugba a nɔ. E plɛ e he nɛ e ya hyɛ nyumu ɔ nɛ e hule ɔ, nɛ e fa lɛ ke: ‘I ngɛ mo dee ke, tee si, hluɛ o sa a nɛ o ho we mi ya.’ Nɔuu nɛ nyumu ɔ wo e sa a, nɛ e bɔni nyɛɛmi ngɛ ni ɔmɛ tsuo a hɛ mi. Ni ɔmɛ a nya kpɛ a he wawɛɛ! Enɛ ɔ he ɔ, a je Mawu yi nɛ a de ke: “Wa nɛ́ enɛ ɔ eko hyɛ!”​​—Marko 2:11, 12.

Níhi nɛ Yesu de ɔ tsɔɔ kaa tsakpa ngɛ yayami kɛ hiɔ a kpɛti, nɛ tsakpa ngɛ yayami kɛ pami kɛ nɔmlɔ tso mi he wami nami hu a kpɛti. Baiblo ɔ tsɔɔ kaa Adam pee yayami nɛ e kɛ yayami sã e bimɛ tsuo, nɛ enɛ ɔ ha nɛ wa nuu hiɔ nɛ wa gboɔ. Se ngɛ Mawu Matsɛ Yemi ɔ sisi ɔ, Yesu maa ngɔ nihi nɛ a suɔ Mawu, nɛ a jaa lɛ ɔ a he yayamihi tsuo kɛ pa mɛ. Kɛkɛ ɔ, nɔ ko nɔ ko be hiɔ nue hu.​​—Roma Bi 5:12, 18, 19.