Bôt ba ngandak bitison ba nok ñañ inyu Yésu. Ngandak i nyodne haa inyu boma nye, inyu emble biniigana gwé, ni inyu tehe bihélha bi mam a mboñ. Ndi i mbus ndék dilo, a ntémb i Kapernaum, tison tôbôtôbô het a nkena nson nwé. Nwin u malo mé u mpala tjama mu tison Kapernaum i i yé ipañ tuye Galiléa. Inyu hala nyen ngandak bôt i nlo ndap het a nyéne. Ikété bôt ba nlo, di gwé Farisai ni baniiga Mbén ba ba nlôl mambok ma Galiléa ni ma Yudéa momasôna, yak i Yérusalem.

‘Ha nyen ngandak bôt i nyon mu ndap kayéle pôla i ta ha bé, to ipañ nwemel; a mbôdôl añle bo bañga i Nyambe.’ (Markô 2:2) Loñge ngéda ini le hélha jam i bôña. I jam li, li nhôla bés i nok le Yésu a gwé ngui i mélés lipigil li mandutu ma bôt ba binam ni makon ma bet a mpohol.

Mu kii Yésu a yé niiga bet ba yôni mu ndap, bôlôm ba-na ba nlona ñambge mut u niñi nañi. Ba gwé ngôñ le Yésu a mbuubaha liwanda jap. Ndi, inyule bôt ba yé ngandak, ba nla bé “pamna nye yak Yésu.” (Markô 2:4) Di nla hégda kiki hala a nla tômbôs bo. Ba mbet i ngii nyôl u ndap, ba yibil wo i homa Yésu a yé. I mbus, ba nsuhus nañi het ñambge mut u niñi ikété ndap.

Baa Yésu a ñunup hala kii ba ntéé nye? Heni! Hémle i bôt bana i nlôôha tihba nye kayéle a nkal ñambge mut le: “Bibéba gwoñ bi nwéhlana.” (Matéô 9:2) Ndi baa Yésu a nla toi nwéhél bibéba? Bayimbén ni Farisai ba nhémle bé hala, ba nkal le: “Inyuki mut nunu a mpot hala? A ñôbôs jôl li Nyambe. Njee a nla nwéhél bibéba handugi Nyambe nyetama?”​—Markô 2:7.

Mu kii a nyi mahoñol map, Yésu a nkal bo le: “Inyuki ni nhoñol nya mam i mu miñem minan? Kii i ntomb, i kal ñambge mut le: ‘Bibéba gwoñ bi nwéhlana,’ tole i kal le: ‘Telep, begee nañi yoñ, kenek’?” (Markô 2:8, 9) Ñ, ni njel sesema i niñ yé a bé lama ti, Yésu a nla nwéhél bibéba bi mut nu.

I mbus, Yésu a ñunda limut ni bet ba nkolba nye le a gwé kunde i nwéhél bibéba hana isi. A nhielba, a kal ñambge mut le: “Me nkal we le: Telep, begee nañi yoñ, kenek i mbai yoñ.” Ha nyen a bi telep, i nlélém ngéda a begee nañi yé, a pam i mbégdé i bisu gwap. Bôt bobasôna ba nhel kiyaga, ba ti Nyambe lipém, ba kal le: “Di ma tehe bé nya jam ini”!​—Markô 2:11, 12.

Di nyimbe le Yésu a ñunda le béba i nkiha ni makon, ni le nwéhél i bibéba i gwé maada ni mbôô. Bibel i niiga le mut bisu le Adam a bi boñ béba, ni le bés bobasôna di bi kôdôl béba i, hala wee makon ni nyemb. Ndi, i si énél i Ane Djob, Yésu a ga nwéhél bibéba bi ba bobasôna ba ngwés Djob, ba gwéélak ki nye. I mbus, makon momasôna ma ga mal i boga ni boga.​—Rôma 5:12, 18, 19.