Godang do halak na mambege barita ni Jesus. Ro do nasida sian na dao laho manangihon hata ni Jesus dohot mangida tanda halongangan manang mukjizat na binahenna. Dung piga-piga ari, mulak ma Jesus tu Kapernaum. Ai jotjot do ibana tusi saleleng ibana marbarita. Dibege halak na di kota na jonok tu Laut Galilea i ma naung mulak Jesus. Alani i, godang ma halak na ro tu inganan ni Jesus. Adong do sian nasida halak Parise dohot angka guru Patik na ro sian Galilea, sian Judea, dohot sian Jerusalem.

“Torop ma halak marpungu di inganan i, gabe gok ma inganan i sahat tu pintu. Dung i, dibaritahon ibana ma barita na uli tu nasida.” (Markus 2:2) Dibahen Jesus ma disi tanda halongangan. Sian i taboto ma, marhuaso do Jesus pamalumhon angka sahit jala pasidingkon angka na mambahen jolma marsitaonon.

Tingki mangajari Jesus di sada jabu, ro ma opat halak baoa mamboan na lumpu di atas ni tandu manang podoman. Lomo do roha ni nasida asa dipamalum Jesus donganna i. Alai, alani godang ni jolma, ndang boi “nasida mamboan ibana tu Jesus”. (Markus 2:4) Marsak do nasida alani natorop i. Ujungna, nangkok ma nasida tu ginjang ni jabu i, dibungka ma atap na di ginjang ni Jesus i jala dipaturun nasida ma na lumpu i.

Muruk do Jesus mangida na masa i? Daong! Alai las do rohana mangida haporseaon ni nasida. Didok Jesus ma tu na lumpu i, “Nunga disesa be dosam.” (Mateus 9:2) Alai tutu do Jesus boi manesa dosa? Didok angka siboto surat dohot halak Parise i ma, “Boasa didok ibana songon i? Mangaleai do ibana disi. Nda holan Debata do na boi manesa dosa?”​—Markus 2:7.

Diboto Jesus do na di roha ni nasida, didok ma, “Boasa songon i dipingkiri hamu di bagasan rohamuna? Dia do ummura dohonon tu na lumpu on, ‘Nunga disesa dosam,’ manang ‘Hehe ma ho, angkat ma tandumi, jala mardalan ma ho’?” (Markus 2:8, 9) Sian on taboto ma, boi do Jesus manesa dosa ni baoa i. Ai satongkin nai, lehononna ma hosana gabe tobusan ni sude jolma.

Dung i, dipatuduhon Jesus ma na marhuaso do ibana manesa dosa di tano on. Didok ibana ma tu na lumpu i, “Hudok ma tu ho, hehe ma, boan ma tandumi, mulak ma ho tu jabum.” Pintor hehe ma baoa i, diangkat ma tanduna i jala mardalan ma ibana di jolo ni nasida. Gabe longang ma roha ni na mangida i! Dipasangap nasida ma Debata, ninna nasida ma, “Ndang hea dope taida sisongon on.”​—Markus 2:11, 12.

Molo taparrohahon hata ni Jesus i, alani dosa do umbahen na marsahit jolma. Jala molo disesa dosa ni sasahalak, boi ma ibana sehat muse. Bibel mangajarhon taringot tu jolma na parjolo, i ma si Adam na mardosa jala na mambahen mardosa sude pinomparna. Alani i ma gabe marsahit jala mate hita. Alai, di Harajaon ni Debata sesaon ni Jesus ma dosa ni sude halak na mangkaholongi jala na manomba Debata. Dung i, ndang adong be sahit saleleng ni lelengna.​—Rom 5:12, 18, 19.