Bôte be n’ôyap a abui bevôm be wô’ôya ajô Yésus. Abui da téé bevôme bete na be zu wô’ô ñye’elane Yésus a yene beta be mam a bo. Ve, mvuse bone melu a bulane Capernaoum, vôm a dañe bo ésaé jé. Foé ya nsoane wé ja ji’a mane yiane tison éte akekui Mañe ya Galilée. Amu nalé, abui bôte da zu vôme Yésus a né. Ba béziñ be ne Bepharisien a beye’ele Atiñ ba so meku’u mese ya Galilée a Judée, ja’a Jérusalem.

“Ndulu bôt a zu ñhe ngunubu, teke fe atelé abo, ja’ane mbé yôp. A nyoñe ñhe nkobô a nga kate be mejô me Zambe.” (Marc 2:2, Mfefé Nkôñelan) Mam mese me ne fo’o nta’an asu ya na étua jam é boban. A ne jam é ne volô bia na bi yeme na, Yésus a bili ngule ya vaa mam ma so bôte minjuk, a saé fe ba bese a top.

Nté Yésus a ye’ele nda été, vôme bôte be ne njalan, bôte benyin ba soo ñyemelane môt énoñe yôp. Ba yi na Yésus a saé mvôé jap. Ve, amu nda é yeme, be vo’o ki “zu nye bebé” be Yésus. (Marc 2:4) Tame simesan aval ane jam ete da te’e be. Nde ba bet andile nda yôp a tup de. Éyoñ éte nje ba sili énoñe môt a ne ñyemelane si.

Ye Yésus a wô’ ôlun amu ba tyi’i nye nkobô? Teké’é! Yésus a kame mbunan wop nde a jô ñyemelane môte na: “Mam abé môé me ntoo njaman.” (Matthieu 9:2, Mfefé Nkôñelan) Ve da, ye Yésus a ne fo’o ngule ya jamé mam abé? Bescribe a Bepharisien ba yene fan a jam ete, a jô na: “Môte nyô a kobô nalé amu jé? A biasé Zambe: za a ne ngule ya jamé mam abé, ve môte wua, ve Zambe?”​—Marc 2:7.

Mbôl a yem asimesane dap, Yésus a jô be na: “Mi asimesane mejô mete minlem mienan amu jé? Ye jô môt a mbe ñyemelane na, mam abé môé me nto njaman; ye jô na, Kôlô’ô si, ô to’é ôkala viôé, a wulu; jé é ne tyi’ibi?” (Marc 2:8, 9) Ôwé, a zene ya metuna’a Yésus a ye ve mbamba éyoñ, a ne ngule ya jamé mam abé me môt ate.

Ajô ete, Yésus a liti ékôane bôt, ja’a ba ba sôane nye na, a bili ngule ya jamé mam abé e si va. A tyiñelane be môt a ne ñyemelan, a ve nye abendé na: “Me ajô wo na, Kôlô’ô si, ô to’é ôkala viôé, ô ke nda jôé.” Été été, môt a kôlô si, a nga wulu a be’e énoñe jé mise me bôte bese be ne valé. Bôte be ne fe’e ne vema! Ba ve Zambe duma a kam be jô’ô na: “Bi nji tame yen aka’a jame di.”​—Marc 2:11, 12.

É ne mfi ya yeme na Yésus a kobô ajô mam abé mfula’ane a akon, a na, njamane mam abé ô ne bi nkañ a mvo’é ya minsôn. Kalate Zambe a ye’ele na, ésa wongan ôsu, Adam, a nga bo abé a na bia bese bi nga nyoñe ma’ane ya abé, aval ane akon a awu. Ve Éjôé Zambe si, Yésus a ye jamé mam abé me bôte bese ba nye’e Zambe a bo nye ésaé. Éyoñ éte akon da ye mane nnôm éto.​—Beromain 5:12, 18, 19.