Sisan, mɔgɔw ye Yezu koo mɛn yɔrɔ bɛɛ. Mɔgɔ caaman tagara a nɔfɛ fɔɔ yɔrɔ lakolonw na walisa k’a ka kalan lamɛn ani k’a ka kabakow ye. Nka, tile damanin kɔ, Yezu kɔsegira Kapɛrnaum, Galile baji daa la. A bena a ka baara fanba kɛ o yɔrɔ lo la. Dugumɔgɔw y’a mɛn ko a kɔsegira ka na ani o kibaro jɛnsɛnna yɔrɔ bɛɛ joona joona. O kama, a be boon min kɔnɔ, mɔgɔ caaman tagara a fɛ o yɔrɔ la. U dɔw ye Fariziɲɛw ani sariya karamɔgɔw ye, minw bɔra Galile ani Zude mara yɔrɔw bɛɛ la, hali Zeruzalɛmu yɛrɛ.

“Jamaba tagara lajɛn a fɛ fɔɔ lɔyɔrɔ dɛsɛra, hali kɛnɛma boon daa la. Yezu tun be Ala ka kuma fɔra u ye.” (Mariki 2:2). Sisan, koo kabakoman dɔ bena kɛ o yɔrɔ la. O ben’a yira an na ko see be Yezu ye ka adamadenw ka tɔɔrɔko sababu ban. A ye mɔgɔ minw sugandi, see b’a ye k’u kɛnɛya.

Ka Yezu to a be mɔgɔw kalanna boon dɔ kɔnɔ min fanin lo jama na, mɔgɔ naani tagara a fɛ ni muruku dɔ ye dilan kan. U tun b’a fɛ Yezu k’u tericɛ kɛnɛya. Nka “u tun te se ka gwɛrɛ Yezu la jama kosɔn.” (Mariki 2:4). Miiri k’a filɛ o koo y’u jigi tigɛ cogo min na. U yɛlɛla o boon sanfɛ ka woo dɔ bɔ. O kɔ, u ye muruku n’a ka dilan lajigi boon kɔnɔ o woo fɛ.

Yala Yezu dimina sabu u y’a lalɔ a ka kuma na wa? Ayi dɛ! O cɛɛw ka limaniya y’a kabakoya ani a y’a fɔ o murukucɛ ye ko: “I ka hakɛw yafara.” (Matiyo 9:2). Nka, Yezu be se ka jurumuw yafa tiɲɛn tiɲɛn na wa? Sariya karamɔgɔw ni Fariziɲɛw kɔni ma sɔn o la. U y’a fɔ u kɔnɔ ko: “Mun na cɛɛ nin be kuma ten, . . . a be Ala tɔgɔ cɛn, . . . jɔn le be se ka mɔgɔ ka hakɛw yafa ni Ala kelen tɛ.”—Mariki 2:7.

Yezu y’u ka miiriyaw lɔn minkɛ, a y’a fɔ u ye ko: “Mun na aw be miiri ten? K’a fɔ muruku ye ko: ‘I ka hakɛw yafara,’ walima k’a fɔ a ye ko: ‘Wili k’i ka dilan ta ka taama,’ o kuma fila la, jumɛn fɔ ka nɔgɔ?” (Mariki 2:8, 9). Yezu tun bena na saraka min kɛ, a tun be se ka basigi o kan k’o cɛɛ ka jurumuw yafa.

O kɔ, Yezu y’a yira jama la ani minw tun b’a kɔrɔfɔra, ko see b’a ye ka jurumuw yafa k’a to dugukolo kan. A y’a ɲɛsin murukucɛ ma k’a fɔ a ye ko: “N b’a fɔ i ye, wili k’i ka dilan ta ka taga soo.” O yɔrɔnin bɛɛ, cɛɛ wulila k’a ka dilan ta ka bɔ bɛɛ ɲɛɛ na. Bɛɛ kabakoyara! U ye Ala tando k’a fɔ ko: “An ma nin ɲɔgɔn ye abada!”—Mariki 2:11, 12.

An k’a kɔrɔsi ko Yezu y’a yira ko jurumuw lo b’a to mɔgɔ be bana ani ko jurumuw yafali be na ni kɛnɛya ye. Bibulu b’a yira ko an bɛnba Adama ye jurumu kɛ. O kama, an bɛɛ y’o jurumu sɔrɔ cɛɛn ye. A nɔfɛkow kɛra bana ni saya ye an fɛ. Nka Ala ka Masaya tuma na, mɔgɔ minw be Ala kanu ani k’a sago kɛ, Yezu bena olu bɛɛ ka jurumuw yafa u ma. O la, bana bena ban pewu.—Ɔrɔmukaw 5:12, 18, 19.