Orang ari serata endur udah ninga pasal Jesus. Mayuh orang sanggup bejalai jauh ngambika sida ulih ninga ajar Jesus, sereta meda iya ngaga kereja ajih. Tang beberapa hari pengudah nya, Jesus pulai ngagai Kapernaum, iya nya endur alai iya diau lebuh iya ngereja pengawa nginjil. Nya alai, mayuh orang ke diau ba nengeri ke semak enggau tebing tasik Galili ninga Jesus udah pulai. Nyadi, mayuh orang datai betemu enggau iya ba rumah iya diau. Maya nya mega, bisi orang Parisi enggau bala pengajar Adat deka betemu enggau Jesus. Sida datai ari serata Galili, Judea enggau Jerusalem.

‘Ketegal nya, mayuh orang begelumu ba dia, nyentukka rumah nya enda chukup endur sida. Indah ba semak pintu pan nadai agi endur. Lalu Jesus belabuh nusui pesan Petara ngagai sida.’ (Mark 2:2) Maya nya, Jesus deka ngereja utai ti ngalitka ati. Utai ke deka digaga Jesus ulih nulung kitai faham pasal Jesus bisi kuasa kena muai pun pemerinsa mensia, sereta ngeraika semua orang.

Lebuh Jesus benung ngajar ba rumah nya, empat iku lelaki datai mai siku lelaki ke sakit bajung. Lelaki nya benung gali ba peninduk iya. Sida deka minta Jesus ngeraika iya. Tang ketegal bisi kelalu mayuh orang, sida enda ulih “mai orang nya ngagai Jesus.” (Mark 2:4) Utai ke nyadi nya tentu ngasaka ati sida. Nya alai sida niki ke atas perabung rumah nya lalu ngerumbak perabung rumah nya. Pengudah nya, sida ngulurka lelaki ke sakit nya ngena peninduk iya ba mua Jesus.

Kati Jesus berasai ringat ketegal utai ke digaga sida? Enda! Kebendar iya, Jesus amat kagum enggau pengarap ke diayanka sida. Jesus lalu madah ngagai lelaki ke sakit nya: “Dosa nuan udah diampun.” (Matthew 9:2) Tang kati Jesus amat ulih ngampunka dosa orang? Utai ke disebut Jesus ngasuh bala pengajar adat enggau orang Parisi berasai pedis ati. Ku sida madah ngagai pangan diri: “Nama kebuah orang tu bejaku munyi nya? Iya bejaku ngelaban Petara. Nadai orang ulih ngampunka dosa, kelimpah ari Petara.”—Mark 2:7.

Jesus nemu utai ke diperunding sida. Nyadi Jesus madah ngagai sida: “Nama kebuah kita berundingka utai ke baka nya? Ni nyamai agi disebut ngagai lelaki ke sakit tu: ‘Dosa nuan udah diampun,’ tauka ‘Angkat! Bai peninduk nuan lalu bejalai?’” (Mark 2:8, 9) Iya ke amat, Jesus ulih ngampunka dosa lelaki nya laban Jesus deka nyerahka nyawa iya nyadika tebus.

Udah nya, Jesus nunjuk ngagai semua orang nyengkaum bala pengajar Adat enggau orang Parisi pasal iya bisi kuasa ngampunka dosa orang. Jesus madah ngagai lelaki ke sakit nya: “Aku madah ngagai nuan: Angkat! Bai peninduk nuan, lalu pulai ke rumah.” Tekala nya, lelaki nya pan ngereja utai ke diasuh Jesus. Iya bejalai pansut mansa semua orang ba dia. Semua orang ba dia alit ati, sida ngemuliaka Petara lalu madahka: “Nadai kitai kala meda utai baka tu.”—Mark 2:11, 12.

Jesus madahka dosa bisi kaul enggau penyakit. Pia mega enti siku orang diampunka ari dosa, iya ulih nyadi gerai. Bup Kudus madahka ketegal Adam udah bedosa, nya alai dosa ngelekai ngagai kitai semua. Nya meh kebuah iya, kitai sakit sereta mati. Tang ba baruh Perintah Petara, Jesus deka ngampunka dosa semua orang ke rindu sereta nyembah Petara. Udah nya, semua penyakit deka dibuai belama iya.—Rome 5:12, 18, 19.