Andũ kũndũ kũingĩ rĩu nĩ maiguĩte ũhoro wĩgiĩ Jesu. Aingĩ maroima kũraihu mũno moke maigue akĩrutana na mone maũndũ manene marĩa areka. No thutha wa thikũ cigana ũna, agacoka Kaperinaumu, kũrĩa aikaraga mũno hĩndĩ ya ũtungata wake. Ũhoro wĩgiĩ gũcoka gwake ũgatherema na ihenya itũũra-inĩ rĩrĩ rĩrĩa rĩrĩ hakuhĩ na Iria rĩa Galili. Nĩ ũndũ ũcio, andũ aingĩ magoka nyũmba-inĩ ĩrĩa arĩ. Amwe ao nĩ Afarisai na arutani a Watho arĩa moimĩte Galili na Judea guothe, o hamwe na Jerusalemu.

‘Andũ aingĩ mũno magoka ũũ atĩ hatirĩ handũ hangĩikarũo, nginya mũrango-inĩ, nake akambĩrĩria kũmahunjĩria kiugo.’ (Mariko 2:2) Rĩu nĩ harĩ ũndũ wa magegania ũkiriĩ gwĩkĩka. Ũndũ ũcio no ũtũteithie kũmenya atĩ Jesu e na ũhoti wa kweheria kĩhumo kĩa mathĩna ma andũ na acokerie andũ arĩa angĩenda ũgima wa mwĩrĩ.

Jesu akĩrutana nyũmba-inĩ ĩyo ĩiyũire andũ, arũme ana makarehe mũndũ ũkuĩte ciĩga arĩ karĩrĩ-inĩ. Marenda Jesu ahonie mũrata ũcio wao. No nĩ ũndũ wa kĩrĩndĩ, matingĩhota ‘kũmũkinyia harĩa Jesu arĩ.’ (Mariko 2:4) Ta wĩcirie ũrĩa maraigua makuĩte ngoro. Makambata nyũmba igũrũ na magatũra irima. Magacoka magaikũrũkia karĩrĩ kau ke na mũndũ ũcio mũkuũ ciĩga nyũmba thĩinĩ.

Hihi Jesu nĩ ekũrakario nĩ ũndũ ũcio? Aca! Akahutio ngoro mũno ona wĩtĩkio wao na akeera mũndũ ũcio mũkuũ ciĩga ũũ: “Nĩ woherũo mehia maku.” (Mathayo 9:2) No hihi Jesu no ohanĩre mehia? Andĩki-Watho na Afarisai makarakario nĩ ũndũ ũcio, makoria: “Mũndũ ũyũ aroiga ũguo nĩkĩ? Nĩ araruma Ngai. Nũ ũngĩhota kuohanĩra mehia tiga o Ngai wiki?”​—Mariko 2:7.

Jesu akamenya ũrĩa mareciria, akameera: “Mũreciria maũndũ macio thĩinĩ wa ngoro cianyu nĩkĩ? Nĩ ũndũ ũrĩkũ mũhũthũ, nĩ kwĩra mũndũ ũyũ, ‘Nĩ woherũo mehia maku-ĩ,’ kana nĩ kũmwĩra, ‘Ũkĩra woe karĩrĩ gaku na wĩtware’?” (Mariko 2:​8, 9) Nĩ ũndũ wa igongona rĩrĩa Jesu erekeire kũruta, no ahote kuohera mũndũ ũcio mehia.

Jesu agacoka akonia kĩrĩndĩ kĩu, o hamwe na acio maramũũkĩrĩra, atĩ e na ũhoti wa kuohanĩra mehia gũkũ thĩ. Akarora mũndũ ũcio mũkuũ ciĩga akamwĩra: “Ndakwĩra atĩrĩ, Ũkĩra, woe karĩrĩ gaku, na ũinũke.” O hĩndĩ ĩyo mũndũ ũcio agokĩra, akoima akuuĩte karĩrĩ gake eroreirũo nĩ andũ arĩa othe marĩ ho. Andũ makagega! Makagooca Ngai makoiga: “Tũtirĩ tuona ũndũ ta ũyũ”!​—Mariko 2:​11, 12.

Nĩ ũndũ wa bata kuona atĩ Jesu nĩ aragweta mehia akĩaria ũhoro wĩgiĩ kũrwara na atĩ kuoherũo mehia nĩ gũkonainie na ũgima wa mwĩrĩ. Bibilia ĩrutanaga atĩ mũciari witũ wa mbere, Adamu, nĩ eehirie na atĩ ithuothe nĩ twagaire moimĩrĩro ma mehia, na nĩmo kũrwara na gũkua. No rungu rwa wathani wa Ũthamaki wa Ngai, Jesu nĩ akohera arĩa othe mendete Ngai na mamũtungatagĩra. Hĩndĩ ĩyo mĩrimũ nĩ ĩkeherio tene na tene.​—Aroma 5:​12, 18, 19.