Owau e nsangu za Yesu zilweke mwawonso. Ayingi badiete nzanza miandá mu kwiza wá malongi mandi yo mona mavangu mandi ma nkuma. Kansi, ke vaviokele lumbu yayingi ko, Yesu ovutukidi kuna Kafanau, mbanza ketoma sadilanga e salu kiandi. E nsangu za mvutuk’andi zimwanganene kwa esi mbanza yayi ina vana ndambu a Mbu a Ngalili. Muna kuma kiaki, ndonga bezidi muna nzo ina Yesu kena. Akaka muna yau Afarisi ye alongi a Nsiku, batukidi muna zunga ya Ngalili, Yuda ye Yerusaleme.

“E ndonga ilungalakene muna nzo yavana ke mukedi diaka fulu ko, kana nkutu vana mwelo, i bosi oyantikidi kubasamunwina e diambu.” (Maku 2:2) Kansi, owau diambu diasivi divangama. E diambu diadi dilenda kutusadisa mu zaya vo, Yesu una yo nkuma wakatula e tuku dia mpasi za wantu yo vutulwisa o vimpi kw’awonso kazolele.

Ekolo Yesu kelonganga muna nzo, wantu yá batwese mbevo a vola vana kipoyo. Bazolele vo Yesu kawuka nkundi au. Kansi, muna kuma kia ndonga, ke balendele “kunlwakisa kwa Yesu ko.” (Maku 2:4) Yindula o lukendalalu bena lwau! Bamente kuna nludi a nzo, babangwidi wo, bakulumwini mbevo muna nzo.

Nga Yesu ofungidi makasi wau bamvunzanese? Ve kikilu! Wau kasivikidi mu kuma kia lukwikilu lwau, Yesu ovovese mbevo vo: “Masumu maku malolokelo.” (Matai 9:2) Kansi, nga Yesu olenda loloka kikilu masumu ma wantu e? Asoneki ye Afarisi, wau bawidi diambu diadi, bavovele vo: “Ekuma muntu ndioyo kavovele mpila yayi? Otiangwini Nzambi. Nani olenda loloka masumu, avo ke mosi kaka ko, Nzambi e?”—Maku 2:7.

Vava kabakwidi makani mau, Yesu ubavovese vo: “Ekuma nuyindulwilanga mambu mama omo ntima mieno? Adieyi diasazu mu vova kwa mbevo a vola, ‘O masumu maku malolokelo’ yovo vova vo, ‘Telama, bonga kipoyo kiaku yo diata’?” (Maku 2:8, 9) Kieleka, muna kuma kia kimenga ketambika kuna sentu, Yesu olenda loloka masumu ma muntu ndioyo.

I bosi, Yesu osongele kwa nkangu ye kw’awana beyidimanga vo, ovuidi e wisa kia loloka masumu ma nza. Ovilukidi kwa mbevo a vola, unkanikini vo: “Ivovese vo, Telama, bonga kipoyo kiaku, wenda kuna nzo aku.” Otelamene, vana vau obongele kipoyo kiandi, odiete vana bena yau awonso. Awonso basivikidi, bakembelele Nzambi, oku vo: “Ke twasidi mona diambu dia mpila yayi ko.”—Maku 2:11, 12.

Yesu osongele vo, masumu matwasa mayela, luloloko lwa masumu lutwasa vimpi wa nitu. Nkand’a Nzambi ulonganga vo vava Adami wa se dieto diantete kasumuka, yeto awonso twabaka e mfwilu mia sumu, i sia vo, mayela yo lufwa. Kansi muna Kintinu kia Nzambi, Yesu ololoka masumu ma wantu awonso bezolanga Nzambi yo kunsadila. I bosi, ofokola mayela yakwele mvu.—Roma 5:12, 18, 19.