Batu ba kwa libaka za kwahule kikale bautwa ka za Jesu. Mane babañata bazwa kwa libaka za kwahule hahulu. Batile kuto utwa lituto za Jesu ni kubona limakazo zahae. Kono hamulaho wa mazazi, Jesu ukutela kwa Kapernauma, kona kwanaainanga ni kwanaapetezi hahulu bukombwa bwahae. Kapili-pili taba ya kukuta kwahae yahasana mwa muleneñi wo, oli bukaufi ni Liwate la Galilea. Kabakaleo, batu babañata bataha kwa ndu kwainzi. Babañwi ki Bafalisi ni baluti ba Mulao babatile kuzwa mwa Galilea kaufela ni mwa Judea, mane ni mwa Jerusalema.

‘Kukubukana batu babañata hahulu kuli mane hakuna sibaka, nihaiba kwa munyako, mi ukala kubabulelela linzwi.’ (Mareka 2:2) Cwale kutuha kuezahala nto yekomokisa luli. Ki kezahalo yekona kulutusa kuutwisisa kuli Jesu unani maata a kufelisa nto yetahisa manyando a batu ni kuli wakona kufolisa batu balata kaufela.

Jesu hanze aluta batu mwa muzuzu otezi batu, baana babane bamutiseza muuna yaomelezi luñañali yalapami fa bulobalo. Babata kuli Jesu afolise mulikanaa bona. Kono bakeñisa buñata, habakoni “kumutisa ku Jesu.” (Mareka 2:4) Munahane feela mobazwafisezwa ki taba yeo. Bapahama fa situwa sa ndu ni kupunya lisuba. Kihona bashetumukiseza mwa ndu bulobalo falapami muuna yaomelezi luñañali yo.

Kana Jesu wafilikanywa ki kezo yeo? Batili! Utabiswa hahulu ki tumelo yabona mi ubulelela muuna yaomelezi luñañali kuli: “Libi zahao liswalezwi.” (Mateu 9:2) Kono kana Jesu wakona kuswalela libi luli? Bañoli ni Bafalisi habalumeli cwalo; basweli kunahana bali: “Kiñi sesibulelisa mutu yo cwana? Wanyefula. Ki mañi yakona kuswalela libi kwandaa Mulimu anosi?”—Mareka 2:7.

Ka kuziba mihupulo yabona, Jesu ubabulelela kuli: “Kiñi zemunahanela lika zeo mwa lipilu zamina? Sesibunolo ki sifi, kubulelela yaomelezi luñañali kuli, ‘Libi zahao liswalezwi,’ kamba kumubulelela kuli, ‘Yema, uunge bulobalo bwahao mi uzamaye’?” (Mareka 2:8, 9) Kaniti, Jesu wakona kuswalela libi za muuna yo kabakala sitabelo satuha afa.

Cwale Jesu kihona abonisa buñata ni bahanyezi bahae kuli unani maata a kuswalela libi fa lifasi. Usikuluhela ku muuna yaomelezi luñañali ni kumulaela kuli: “Nili ku wena, Yema, uunge bulobalo bwahao, mi uye kwa ndu yahao.” Honafo, muuna yo ueza cwalo, uzwela kwande alwezi bulobalo bwahae fapilaa batu kaufela babali teñi. Batu bakomokile! Bakanyisa Mulimu bali: “Lwalikuba lubone nto yecwalo”!—Mareka 2:11, 12.

Mwa taba ye, lulemuha kuli Jesu ubonisa swalisano ye mwahalaa sibi ni makulanu ni kuli kuswalelwa kwa libi kuama buiketo bwa mubili. Bibele iluluta kuli mushemi waluna wapili, yena Adama, naaezize sibi, ni kuli kaufelaa luna lutahezwi ki lika zetiswa ki sibi, ili makulanu ni lifu. Kono Mubuso wa Mulimu hauka busa, Jesu ukaswalela libi za batu kaufela babalata Mulimu ni kumusebeleza. Mi makulanu akafeliswa kuya kuile.—Maroma 5:12, 18, 19.