Bantu ba miaba too ne ya kule bakavua bumvue lumu lua Yezu. Ba bungi bavua benze ngendu mile menemene bua kumvua muvuaye ulongesha ne kumona midimu yende ya bukole. Kadi panyima pa ndambu wa matuku, wakapingana ku Kapênuma, muaba uvuaye utamba kuenzela mudimu. Lumu lua dipingana diende luvua lutangalake lukasa mu tshimenga etshi tshivua ku muelelu kua Mbuu wa Galela. Nunku, bantu ba bungi bavua balua ku nzubu kuvuaye mutudile. Bamue ba kudibu bavua Bafalese ne balongeshi ba Mikenji bavua bafumine mu Galela mujima ne mu Yudaya, too ne mu Yelushalema.

‘Nunku, bantu bapite bungi badi bakunguila, kakuyi kabidi muaba, too ne ku tshiibi, udi utuadija kubambila dîyi.’ (Mâko 2:2) Mpindieu tshialu tshivua buashi bua bualu kampanda bua pa buabu kuenzekabu. Mbualu budi mua kutuambuluisha bua kujingulula ne: Yezu udi ne bukole bua kumbusha tshikebeshi tshia makenga a bantu ne kupeshilula bantu bonso badiye usungula makanda a mubidi.

Pavua Yezu wenda ulongesha bantu bavua bunguile mu nzubu, bantu banayi bakalua ne muntu mutekete mubidi muambula mu kalalu. Bavua bakeba bua Yezu ondope mulunda wabu au. Kadi, bua bungi bua bantu, kabavua mua “kumufikisha too ne muaba uvua Yezu to.” (Mâko 2:4) Elabi meji muvuabi mua kutekesha mu maboko. Kadi, bakabanda pa musaka wa nzubu uvua kawuyi ne lusongo, kumbushabu mampana (anyi malata a biyoyi) ne kutubulabu disoso. Pashishe, bakapuekesha kalalu kavua ne muntu uvua mutekete mubidi aku mu nzubu.

Yezu uvuaku mufiike munda bua muvuabu bimanyike muyuki wende anyi? Tòo! Wakakema bikole bua ditabuja dia bantu aba ne kuambilaye muntu uvua mutekete mubidi eu ne: “Mpekatu yebe mmijimijibue.” (Matayi 9:2) Kadi, Yezu uvuaku bushuwa mua kujimijilangana mpekatu anyi? Bafundi ne Bafalese bakajula tshilumbu pa bualu ebu, belangana meji ne: “Bua tshinyi muntu eu udi wakula mushindu eu? Udi upenda Nzambi. Nnganyi mukuabu udi mua kujimijila bantu mpekatu pa kumbusha umue, Nzambi?”​—Mâko 2:7.

Bu muvua Yezu mumanye meji abu, wakabambila ne: “Bua tshinyi nudi nuela meji a nunku mu mioyo yenu? Tshidi tshitekete bikole nkuambila muntu udi mutekete mubidi eu ne: ‘Mpekatu yebe mmijimijibue,’ anyi nkuamba ne: ‘Juka, ambula kalalu kebe, enda’?” (Mâko 2:8, 9) Bushuwa, Yezu uvua mua kubuikidila muntu mpekatu yende ku diambuluisha dia mulambu waluaye kufila.

Pashishe, Yezu wakaleja musumba wa bantu, too ne bavua bamuamba ne: uvua ne bukokeshi bua kubuikidila bantu mpekatu pa buloba. Wakakudimuka kudi muntu uvua mutekete mubidi eu, ne kumutuminaye dîyi ne: “Ndi nkuambila ne: Juka, ambula kalalu kebe, ndaku kuebe.” Muntu eu udi ujuka diakamue, upatuka muambule kalalu kende kumpala kua bantu bonso bavua muaba eu. Bantu badi bakema bikole! Badi batumbisha Nzambi, bakatshila bamba ne: “Katuena banji kumona bualu bua nunku nansha”!​—Mâko 2:11, 12.

Mbikumbane bua kumanya ne: Yezu udi uleja mudiku dipetangana pankatshi pa mpekatu ne masama, ne mudi makanda a mubidi mimpe enda pamue ne dibuikidibua dia mpekatu. Bible udi ulongesha ne: muledi wetu wa kumpala, Adama, wakenza mpekatu, ne tuetu bonso tudi bapiane bipeta bibi bia mpekatu au, mmumue ne: masama ne lufu. Kadi mu bukokeshi bua Bukalenge bua Nzambi, Yezu neajimijile bantu bonso badi banange Nzambi ne bamuenzela mudimu mpekatu yabu. Pashishe, masama neumbushibue bua kashidi.​—Lomo 5:12, 18, 19.