Vatu vakumafuchi akulisezaseza vevwile puho yaYesu. Vavavulu vatambukile jitunda jajisuku mangana vayenga nakwivwa vyuma mwanangula Yesu nakumona vyuma vyakukomwesa alingilenga. Oloze omu mwahichile makumbi amwe, Yesu akindulukile kuKapelenau kuze azachililenga chikuma. Mujimbu kana watanjile washi munganda kana nakuKalungalwiji waNgalileya. Ngocho vavavulu vejile kuzuvo yize apwile. Vamwe vapwile vaFwaliseu navaka-kunangula Jishimbi vaze vafumine kujingalila jakuNgalileya naYuleya nakuYelusalema.

“Shikaho vatu vavavulu vakungulukile muzuvo, ngocho kamwapwile nomu mwakwimanyina mutuko, chipwe vene kuchikolo, kaha aputukile kuvambulila mujimbu wamwaza.” (Mako 2:2) Chuma chachinene jino chapwile hakamwihi nakulingiwa. Chuma kana chinahase kutukafwa tumone ngolo atwama najo Yesu jakuhasa kukumisa kuyanda chavatu nakuka nawa vaze nasake.

Omu Yesu apwile nakunangula lizavu lize lyakungulukile muze muzuvo, malunga vawana vanehele muka-kalepa hakahela. Vasakile Yesu okenga sepa lyavo. Oloze vahonene “kumuneha kuli Yesu” mwomwo yakuvula chavatu. (Mako 2:4) Ocho chikela kana vevwile! Chipwe ngocho, kavalitwaminyineko, oloze vanyinyine helu nakupandumuna hamulungu, nakuzezumwina kahela asavalile uze muka-kalepa kwakamwihi naYesu.

Uno Yesu asulakanyine hakumutangula tahi? Nduma. Ikiye alikomokelele halufwelelo lwavo, kaha ambile kuli uze muka-kalepa ngwenyi: “Jishili jove vanakukonekelajo.” (Mateu 9:2) Uno Yesu apwile nangolo jakukonekela jishili tahi? Vaka-kusoneka navaFwaliseu vasakile kumuwanyina mulonga hamazu kana awa ahanjikile, kaha valihwojwele mumichima yavo ngwavo: “Mwomwo ika ou mutu ali nakuhanjikila ngana? Ali nakusaula Kalunga. Uno keshi Kalunga kaha ikiye eji kukonekelanga jishiliko nyi?”—Mako 2:7.

Hakwijiva vyapwile mumichima yavo, Yesu avahulishile ngwenyi: “Ikaze muli nakushinganyekela vyuma kanevi mumichima yenu? Chachashi chimwe chilihi, kwamba muka-kalepa ngwami, ‘Jishili jove vanakukonekelajo,’ nyi kwamba ngwami, ‘Katuka, mbata kahela kove utambuke’?” (Mako 2:8, 9) Enga, Yesu ahashile kukonekela jishili jauze lunga mwomwo yakulisuula chenyi mwachimuna wakuvatula.

Yesu alingile chuma chakukomwesa kumeso alizavu navaze vaka-kumufwefulula, chize chasolwele nge akwechi ngolo jakukonekela jishili hano hamavu. Ambile kuli uze muka-kalepa ngwenyi: “Nangwamba kuli ove ngwami, Katuka, mbata kahela kove, yakonga kwimbo lyove.” Hahaze vene, uze lunga akatukile nakumbata kahela kenyi oku vosena vali nakumutala. Vatu valikomokelele chikuma nakutohwesa Kalunga ngwavo. “Kanda tumonengaho lyehi chuma changanako.”—Mako 2:11, 12.

Chapwile chachilemu kuli Yesu kuvuluka shili hakuhanjika vyamisongo, nakuvuluka nawa ngwenyi mutu nahase kuhinduka nge vanamukonekela lyehi jishili jenyi. Mbimbiliya yanangula ngwayo chisemi chetu watete, Alama avulumwine shili, ngocho tuvosena twaswana lamba lyafuma hakuvulumuna shili, lyakufwana nge kuviza nakufwa. Oloze muWangana waKalunga, Yesu mwakakonekela jishili javosena vaze vamuzanga Kalunga nakumuzachila. Ngocho misongo yosena navakayifumisako haya myaka yosena.—Wavaka-Loma 5:12, 18, 19.