Ga bjale batho ba bantši ba tšwago kgole le kgauswi ba kwele ka Jesu. Ba bantši ba tloga mafelong ao a sa fihlelelegego go tlo mo kwa a ruta le go bona ditiro tša gagwe tše matla. Lega go le bjalo, ka morago ga matšatši a sego kae o boela Kaperenaume, moo a direlago modiro wa gagwe gona. Ditaba tša mabapi le go boa ga gagwe di phatlalala kapejana motseng wa kgauswi le Lewatle la Galilea. Ka go re’alo, ba bantši ba tla ntlong yeo a lego go yona. Ba bangwe ke Bafarisei le barutiši ba Molao bao ba bego ba etšwa metseng yohle ya Galilea le ya Judea, go akaretša le Jerusalema.

“Ba bantši ba bokana moo go bego go se sa hlwa go na le sebaka, gaešita le kgauswi le mojako, yena a thoma go ba botša lentšu la Modimo.” (Mareka 2:2) Ga bjale ke nako ya gore go direge tiragalo e makatšago e le ka kgonthe. Ke tiragalo yeo e ka re thušago go lemoga gore Jesu o na le matla a go tloša sebaki sa tlaišego ya batho gomme a bušetša bophelo bjo bobotse go bohle bao a ba kgethago.

Ge Jesu a sa ruta ka phapošing e tletšego batho, banna ba bane ba tliša morephaditho yo a lego leakong. Ba nyaka gore Jesu a fodiše mogwera wa bona. Lega go le bjalo, ga ba kgone go “mo fihliša go Jesu” ka baka la lešaba. (Mareka 2:4) Akanya kamoo seo se nyamišago ka gona. Ba namela ka godimo ga tlhaka ya ntlo ya polata ke moka ba phula lešoba dithaeleng. Ke moka ba theošetša fase leako leo le rwelego morephaditho.

Na Jesu o befedišwa ke ge a šitišwa? Ga go bjalo le gatee! O kgahlwa kudu ke tumelo ya bona gomme o re go morephaditho: “O lebaletšwe dibe tša gago.” (Mateo 9:2) Eupša na ruri Jesu a ka lebalela batho dibe? Bamangwalo le Bafarisei ba tsoša kgang ka taba ye, ba nagana ba re: “Ke ka baka la’ng motho yo a bolela ka mokgwa wo? O roga Modimo. Ke mang yo a ka lebalelago dibe ge e se Modimo feela?”—Mareka 2:7.

Jesu ka go tseba dikgopolo tša bona, o re go bona: “Ke ka baka la’ng le nagana dilo tše dipelong tša lena? Se bonolo ke sefe, na ke gore go morephaditho: ‘O lebaletšwe dibe tša gago,’ goba ke gore: ‘Tsoga o tšee leako la gago o sepele’?” (Mareka 2:8, 9) Ee, motheong wa sehlabelo seo Jesu a bego a tla se nea ge nako e dutše e eya, o kgona go lebalela monna yo dibe tša gagwe.

Ke moka Jesu o bontšha lešaba, go akaretša le baswayadiphošo ba gagwe, gore o na le matla a go lebalela batho dibe mo lefaseng. O retologela go morephaditho gomme o mo laela a re: “Ke re go wena: Tsoga, tšea leako la gago, o ye gae.” Gateetee monna yo o dira sona seo, o tšwa a swere leako la gagwe pele ga bohle bao ba bego ba le gona. Batho ba šala ba ahlame! Ba tagafatša Modimo ba re: “Ga se ra ka ra bona sa go swana le se”!—Mareka 2:11, 12.

Go bohlokwa go lemoga gore Jesu o tswalanya dibe le bolwetši le gore go lebalelwa mo go bjalo ga dibe go ka tswalanywa le bophelo bjo bobotse bja mmele. Beibele e ruta gore motswadi wa rena wa pele e lego Adama o ile a dira sebe, le gore ka moka ga rena re abetše ditlamorago tša sebe, e lego bolwetši le lehu. Eupša ka tlase ga pušo ya Mmušo wa Modimo, Jesu o tla lebalela bohle bao ba ratago Modimo le go mo hlankela. Ke moka bolwetši bo tla tlošwa sa ruri.—Baroma 5:12, 18, 19.