Ovanthu ovanyingi vakala unene kokule, kononthele ambuho, veiva Sesusi. Ovanyingi avalingi oungendi okueenda konomphangu mbo kokule opo vakatehelele etyi alongesa nokutala omahuviso alinga. Mahi, etyi palamba ononthiki mbumwe, Sesusi akondoka ko Kafalanau, omphangu yakolela movilinga viae. Liwa-liwa ovanthu ovanyingi mepunda-umbo olio liokukahi konthele Yelunga lyo Ngalileya, avetyiivi okuti Sesusi wakondoka. Moluotyo, ovanthu ovanyingi aveya mondyuo Sesusi ankho ekahi. Vamwe ankho ova Faliseu novalongesi Vovitumino, vatunda kononthele ambuho mbo Ngalileya, no Sundeya, no ko Selusalei.

‘Ngotyo ovanthu ovanyingi ngamo velikongololela apehesala vali omphangu alo umwe pombundi, iya ahimbika okuvepopila ondaka ya Huku.’ (Maluku 2:2) Pahe, ankho mapamoneka otyipuka tyimwe tyihuvisa unene. Otyipuka tyipondola okutukuatesako okutala okuti Sesusi una epondolo liokumana-ko ononkhumbi mbovanthu, nokuvelula ovanthu aveho aholovona.

Pu etyi Sesusi ankho ekahi nokulongesila mondyuo mueyula ovanthu, ovalume vekuana avaeta omulume umwe otyilema vatyinda potyinthandala ine otyinthali. Ankho vahanda Sesusi avelule epanga liavo. Mahi mokonda yovanthu ovanyingi, avehetyivili “okumutuala alo pu Sesusi.” (Maluku 2:4) Otyo ankho tyisoyesa ngatyi. Avalondo kombanda yondyuo, avayambulula-ko omateya amwe. Iya avapitisila otyinthandala ankho kulangi otyilema apa vayambulula avemupake mokati kondyuo.

Okuti Sesusi wanumanene mokonda yotyo? Au, kanumanene! Wahuvile unene mokonda yekolelo liavo, apopila omulume oo otyilema okuti: “Ononkhali mbove mbaevelwa.” (Mateusi 9:2) Mahi okuti Sesusi ankho upondola okuevela ononkhali? Ovahoneki vovitumino nova Faliseu avahimbika okusoka momitima viavo okuti: “Omokonda yatyi omunthu ou apopila ngotyo? Ukahi nokupopia omapita Huku. Upondola okuevela ononkhali ha Huku vala?” — Maluku 2:7.

Sesusi anoñgonoka etyi ankho vekahi nokusoka, evepopila okuti: “Omokonda yatyi musokela ovipuka ngo ovio momitima vienyi? Oityi tyapepuka vali, okupopila otyilema okuti, ‘Ononkhali mbove mbaevelwa,’ ine okuti, ‘Katuka, pola-po otyinthandala tyove enda’?” (Maluku 2:8, 9) Mokonda yotyilikutila Sesusi ankho maave, oe upondola okuevela ononkhali mbovanthu.

Konyima, Sesusi alekesa kovanthu aveho, okukutikinya-mo vana ankho vemuyele, okuti una epondolo liokuevela ononkhali pano pohi. Atale komulume oo otyilema, emuti: “Ame ndyikupopila okuti, Katuka, pola-po otyinthandala tyove, enda no keumbo liove.” Liwa-liwa, omulume alingi ngotyo, aende notyinthandala tyae ine otyinthali, otyo aveho vemutala. Ovanthu avahuvu unene! Avankhimaneka Huku, avati: “Katunemone otyipuka ngetyi!” — Maluku 2:11, 12.

Tyakolela okutala okuti, Sesusi waeleka ononkhali nomauvela, iya okuevela ononkhali etyieleka nekongoko liolutu. Ombimbiliya ilongesa okuti tate yetu wo tete Andau, walinga onkhali iya onthue atuho tuapiñgana ovipuka viaetwa nonkhali, ngomauvela nononkhia. Mahi, Mouhamba wa Huku, Sesusi makaevela ononkhali mba aveho vehole Huku iya vemuumbila. Konyima, omauvela maakanyimwa-ko apeho. — Ova Loma 5:12, 18, 19.