Abalitaan la na dakel a totoo ed nanduruman lugar so nipaakar ed si Jesus. Amayamay so manbiabiahe na anggano ararawi pian narengel so panagbangat to tan nanengneng iray makapanyarin gagawaen to. Balet, kayari pigaran agew et pinmawil ed Capernaum, say sentro na kimey to. Say impawil to et abalitaan ya tampol ed sayan syudad ya asingger ed Dayat na Galilea. Bilang resulta, dakel so linmad abung ya kawalaan to. Wala ray Fariseo tan managbangat na Ganggan ya nanlapud interon Galilea tan Judea, pati diad Jerusalem.

‘Lapud saya et dakdakel so dinmadago kanian anggapo lay lugar, anggan diad puerta, tan impulong tod sikara so salita.’ (Marcos 2:2) Diad saya et walay nagawan agnalinglingwanan. Sakey iyan ebenton ontulong ed sikatayon naapresya a walay pakapanyari nen Jesus ya ekaley panlalapuay paniirap na totoo tan ipawil so bunigas na laman ed amin ya pilien to.

Legan a manbabangat si Jesus ed kuarton aseksek na totoo, walay apatiran lalaki ya angawit na paralisadon laki a walad dukolan. Labay dan patambal ed si Jesus so kaaro da. Balet lapud karakel na totoo, agda “niyasingger ed si Jesus.” (Marcos 2:4) Isip mo pay baleg ya problema da. Sinmapat irad atep na abung tan nanggawa ray bungaw. Insan da inleksab so paralisadon laki a walad dukolan.

Kasin sinmanok si Jesus ta adisturbo? Andi! Naapresya ton maong so pananisia ra tan inkuan tod paralisadon laki: “Aperdona la ray kasalanan mo.” (Mateo 9:2) Balet talaga kasin sarag nen Jesus so mamerdonay kasalanan? Ginawa iyan isyu na saray eskriba tan Fariseo, tan inkatunongan da: “Akin et oniay panagsalita na sayan too? Mumudmoraen toy Dios. Siopay makaperdona na saray kasalanan? Agta say Dios labat?”​—Marcos 2:7.

Lapud amta nen Jesus so nononoten da, inkuan tod sikara: “Akin et ontay nononoten yo? Dinan so mas mainomay ya ibagad paralitiko, ‘Aperdona la ray kasalanan mo,’ odino, ‘Alagey ka tan libit moy dukolan mo tan manakar ka’?” (Marcos 2:8, 9) On, base ed bagat ya magano lan iyapay nen Jesus, sarag ton perdonaen so kasalanan na too.

Insan impanengneng nen Jesus ed saray totoo, pati diad saray mangikritiko ed sikato, ya walay autoridad ton mamerdona na saray kasalanan diad dalin. Nilingaw toy paralitiko tan ingganggan to: “Ibagak ed sika, Alagey ka, libit moy dukolan mo, tan sempet ka la.” Et tampol ya nilibit na laki so dukolan to tan nanakar ya sankanengneng na amin a wadman. Mankelkelaw iray totoo! Inggloria day Dios tan inyeyag da: “Anggapo nin balot so anengneng min singa onia”!​—Marcos 2:11, 12.

Makapainteres ya inkonekta nen Jesus so kasalanan ed sakit, tan say pakaperdona na kasalanan et nayarin ikonekta ed pisikal a bunigas. Ibabangat na Biblia ya nankasalanan so inmunan ateng tayon si Adan, tan atawir tayon amin so epekto na kasalanan, say sakit tan ipapatey. Balet diad uley na Panarian na Dios, perdonaen nen Jesus iray kasalanan na amin ya mangaaro tan manlilingkor ed Dios. Insan naekal lay sakit diad andi-anggaan.​—Roma 5:12, 18, 19.