Anthu a pisa pyakutali abva pya Yezu. Azinji acita ulendo toera kudzabvesera pikhapfundzisa iye na kuona mabasa ace akudzumisa. Mbwenye pakupita ntsiku zingasi iye abwerera ku Kafarnau, kudacita iye mwadidi mabasace. Mphangwa zikhalonga thangwi yakubwerera kwace zamwazika mwakucimbiza kakamwe mu nzinda unoyu mpaka ku ntunda unango wa Bara ya Galileya. Na thangwi ineyi, azinji abwera pa nyumba ikhagumanika iye. Anango a iwo akhali Afarisi na apfundzisi a Mwambo akuti abuluka ku Galileya, Yudeya na ku Yerusalemu.

‘Azinji agumanyikana pa nsuwo, thangwi mbuto ikhadacepa. Yezu atoma kuapfundzisa.’ (Marko 2:2) Pakhafuna citika cinthu cakudzumatirisa. Pyenepi pinatiphedza kudziwa kuti Yezu ali na mphambvu yakumalisa pinthu pinacitisa nyatwa kwa anthu na kupasa ungumi wadidi kuna ale anafuna iye.

Pikhapfundzisa Yezu pakati pa mwinji, amuna anai abweresa pa makha mamuna wakuti akhali na utenda wa mpfutete. Iwo akhafuna kuti Yezu awangise xamwali wawo. Thangwi ya kunjipa kwa anthu iwo acimwana ‘kufika naye mpaka pana Yezu.’ (Marko 2:4) Iwo atsukwala na pyenepi. Natenepa iwo akwira padzulu pa nyumba mbaphola benga toera kutcitisa nayo nyampfutete n’nyumba mukuphatisira makha.

Kodi Yezu aipirwa na pyenepi? Nkhabe! Iye adzumatirwa kakamwe na cikhulupiro cawo, natenepa apanga nyampfutete: ‘Madawo ako alekererwa.’ (Mateu 9:2) Kodi Yezu anakwanisadi kulekerera madawo? Apfundzisi a mwambo na Afarisi adzudzumika na pidalonga Yezu mbabvundzika: ‘Thangwi yanji munthu uyu akulonga tenepo? Iye akutikana Mulungu. Mbani unango anakwanisa kulekerera madawo kusiyapo Mulungu?’—Marko 2:7.

Pidadziwa iye pikhanyerezera iwo, Yezu aapanga: ‘Thangwi yanji musanyerezera pinthu pyenepi muntima mwanu? Ninji cinakhonda nentsa kakamwe? Ndi kupanga nyampfutete kuti, Madawo ako alekererwa, peno Lamuka kwata makha ako ufambe?’ (Marko 2:8, 9) Inde, kubulukira ku ntsembe ikhafuna kudzapereka Yezu, iye mbadakwanisa kulekerera madawo a anthu.

Natenepa Yezu apanga mwinji na ale akhansumula kuti iye ali na mphambvu yakulekerera madawo pa dziko yapantsi. Iye ayang’ana nyampfutete mbampanga: ‘Lamuka, kwata makha ako, ndoko kunyumba kwako.’ Mu ndzidzi unoyu mamuna acita pyenepi, afamba mbakathukula makha ace anthu mbakayang’ana. Anthu adzumatirwa na pyenepi. Iwo apasa mbiri Mulungu mbalonga: ‘Ife cipo taona kale pinthu ninga pyenepi.’—Marko 2:11, 12.

Mphyakutsandzayisa kuti Yezu alandanisa madawo na utenda, kulekererwa kwa madawo na ungumi wadidi. Bhibhlya isapfundzisa kuti babathu wakutoma, Adhamu adawa, pyenepi pyaticitisa kuthaphula madawo mbatiduwala na kufa. Mbwenye mu Umambo wa Mulungu, Yezu anadzalekerera madawo a onsene anafuna Mulungu na kuntumikira. Natenepa, mautenda anadzamaliswa kwenda na kwenda.—Aroma 5:12, 18, 19.