Now sma fu farawe presi yere fu Yesus tu. Furu sma e waka bun fara fu kon arki den sani di a e leri sma èn fu si den wondru di a e du. Ma baka wan tu dei a e drai go baka na Kaperna-um, a presi pe a e preiki moro furu. A no e teki langa fosi den sma na ini a foto disi, di de krosibei fu a Se fu Galilea, e yere taki Yesus doro baka. Dati meki furu fu den e kon na a oso pe a e tan. Sonwan fu den sma disi na Fariseiman nanga leriman fu Wet di komoto na Yerusalem èn na tra foto fu Galilea nanga Yudea.

’Someni sma kon taki presi no de na a doro srefi. Dan a e bigin taki nanga den fu a wortu fu Gado’ (Markus 2:2). Now wan moi sani o pasa. A sani disi o yepi wi fu frustan taki Yesus abi a makti fu puru a sani di e meki taki libisma e pina. A e sori tu taki Yesus abi a makti fu dresi iniwan siki sma di a wani dresi.

Te Yesus e gi leri na ini a kamra di furu nanga sma, fo man e tyari wan man di lan èn di e didon na tapu wan bedi. Den wani taki Yesus dresi a mati fu den. Ma fu di so furu sma lai na ini na oso, meki den no man „tyari en langalanga go na Yesus” (Markus 2:4). Prakseri fa den man disi e firi. Ma toku den e kren go na tapu a plata daki fu na oso èn den e puru wan pisi fu a daki. Dan den e saka a bedi pe a lan man ben e didon na tapu, go na ondro.

Yu denki taki Yesus ati e bron te den man e du disi, aladi a e sidon drape e gi leri? Nôno! A naki en ati trutru taki den man abi so wan tranga bribi. A taigi a man di lan: „Yu kisi pardon fu yu sondu” (Mateyus 9:2). Ma a de so trutru taki Yesus kan gi sma pardon fu den sondu? Den leriman fu Wet nanga den Fariseiman no lobi san den yere èn den e prakseri: „Fu san ede a man disi e taki so? A afrontu Gado. Suma man gi sma pardon fu sondu, boiti Gado?”​—Markus 2:7.

Yesus sabi san den e prakseri èn dati meki a e taigi den: „Fu san ede unu e prakseri den sani disi na ini un ati? San moro makriki fu taigi a lan man: ’Yu kisi pardon fu yu sondu’, noso ’Opo tanapu, teki yu bedi èn waka’?” (Markus 2:8, 9) Iya, fu di Yesus o gi en libi leki wan lusu-paiman bakaten, meki a kan gi a man pardon fu en sondu.

Dan Yesus e sori den arkiman, sosrefi den wan di e krutu en, taki a abi a makti na grontapu fu gi sma pardon fu sondu. A e luku a lan man, dan a e taigi en: „Mi e taigi yu: Opo tanapu, teki yu bedi, èn go na yu oso.” Wantewante a man e opo teki en bedi èn leti na fesi ala sma a e waka go na dorosei. Den sma e fruwondru trutru! Den e gi Gado glori èn den e taki: „Noiti ete wi si so wan sani”!​—Markus 2:11, 12.

Den sani di Yesus taki e meki wi frustan taki siki abi fu du nanga sondu èn taki wan sma kan kon gosontu te a kisi pardon fu den sondu fu en. Bijbel e leri taki Adam, a fosi papa fu wi, ben sondu. Dati meki wi abi sondu tu èn a bakapisi fu dati na siki nanga dede. Ma te Gado Kownukondre o tiri, dan Yesus o gi ala sma di lobi Gado èn di e dini En, pardon fu den sondu fu den. Dan siki no o de noiti moro.​—Romesma 5:12, 18, 19.