Ŵanthu a kuvigaŵa vakutali anguvwa vinthu vinandi vakukwaskana ndi Yesu. Ŵanthu anandi atuwanga kutali kuti azivwi vo Yesu wasambizanga kweniso kuziwona vakuziziswa vo iyu wachitanga. Kweni pati pajumpha mazuŵa ngamanavi, Yesu wanguwere so ku Kaperenao ko wayanjanga kuja wachichita uteŵeti waki. Ŵanthu anguswera cha kuvwa kuti Yesu we ku Kaperenao, tawuni yo yenga mumphepeti mwa Nyanja ya Galileya. Mwaviyo, anandi anguluta kunyumba yo iyu wajanga. Anyaki mwa ŵanthu ŵenaŵa ŵenga Afarisi kweniso ŵanthu wo asambizanga Marangu. Yiwu angutuliya muvigaŵa vosi va ku Galileya, Yudeya kweniso ku Yerusalemu.

‘Sonu ŵanthu anandi anguwungana munyumba yo, mwakuti mwengavi malu chifukwa ŵanthu anguzaza mpaka pakhomu, ndipu wangwamba kuŵasambiza uthenga wamampha.’ (Mariko 2:2) Pavuli paki, Yesu wanguchita chakuziziswa chapade. Vo Yesu wanguchita vititiwovya kuziŵa kuti iyu we ndi nthazi zakutuzgiyapu masuzgu ngosi kweniso wangachizga munthu weyosi yo wakhumba.

Yesu wachisambiza gulu la ŵanthu lo linguzaza munyumba, ŵanthu anayi anguza ndi munthu wakufwa viŵalu pa kasalasala. Yiwu akhumbanga kuti Yesu wamuchizgi. Kweni chifukwa cha unandi wa ŵanthu, angutondeka “kufika nayu po Yesu wenga.” (Mariko 2:4) Yiwu atenere kuti anguguŵa ukongwa. Mwaviyo, angukwera pachanya panyumba ndipu angupankhuwapu. Pavuli paki, angusiska kasalasala yo angupingapu munthu wakufwa viŵalu.

Kumbi Yesu wangukwiya kuti ŵanthu yaŵa angumutimbanyizga? Awa! M’malu mwaki, iyu wangukwaskika ukongwa chifukwa ŵanthu yaŵa angulongo chivwanu chikulu ndipu wangukambiya munthu wakufwa viŵalu kuti: “Maubudi ngaku ngagowokereka.” (Mateyu 9:2) Kweni kumbi Yesu wangagowoke nadi munthu maubudi ngaki? Alembi ndi Afarisi anguguŵa ukongwa ndi vo Yesu wangukamba ndipu angwamba kuŵanaŵana kuti: “Munthu uyu waŵereŵetiyanji viyo? Wanyoza Chiuta. Palivi munthu yo wangagowoke maubudi, kweni Chiuta pe ndiyu.”—Mariko 2:7.

Yesu wanguziŵa vo yiwu aŵanaŵananga ndipu wangukamba kuti: “Ntchifukwa wuli muŵanaŵana vinthu venivi mumtima mwinu? Kumbi chipusu ndi nichi, kukambiya munthu wakufwa viŵalu uyu kuti, ‘Maubudi ngaku ngagowokereka’ pamwenga kumukambiya kuti, ‘Soka, nyamuwa kasalasala waku, yenda’?” (Mariko 2:8, 9) Chifukwa cha sembi yo Yesu wanguzipereka, iyu wenga wakwenere kugowoke ŵanthu maubudi.

Pavuli paki, Yesu wangulongo gulu la ŵanthu, kusazgapu wo amususkanga, kuti iyu we ndi nthazi zakugowoke maubudi nga ŵanthu pacharu chapasi. Iyu wangung’anamukiya munthu wakufwa viŵalu ndipu wangumukambiya kuti: “Nditikukambiya kuti, Soka, nyamuwa kasalasala waku ndipu lutanga kunyumba kwaku.” Nyengu yeniyo, iyu wangusoka ndi kunyamuwa kasalasala waki ndipu wangwamba kwenda ŵanthu wosi achiwona. Ŵanthu anguzizwa ukongwa! Ndipu angukankhuska Chiuta mwakukamba kuti: “Techendawonepu chinthu chaviyo ichi.”—Mariko 2:11, 12.

Yesu wangulongo kuti pe kukoliyana pakati pa ubudi ndi matenda kweniso pakati pa kugowokereka maubudi ndi kutuzgikapu kwa matenda. Bayibolu likamba kuti Adamu, mpapi widu wakwamba wangubuda, ndipu chifukwa cha ubudi wenuwu, tosi tikumana ndi masuzgu nge kutama ndi nyifwa. Kweni asani Ufumu waku Chiuta waziyamba kulamuliya, Yesu wazamugowoke ŵanthu wosi wo atanja Chiuta kweniso kumuteŵete. Pa nyengu yeniyi, matenda ngazamutuzgikiyapu limu.—Aroma 5:12, 18, 19.