Bantu ibali mumasena oonse baimvwa mpuwo ya Jesu. Mane bunji bwabo beenda kuunka kumasena aatasikwi-sikwi kuzyikumumvwa kayiisya alimwi akubona milimo yakwe iigambya. Nokuba boobo nokwainda mazuba aali mbwaabede, wapilukila ku Kapernauma nkwaali kucitila milimo yakwe minji. Makani aakuti wapiluka amwaika cakufwambaana mumunzi ooyu woonse uuli kumbali aa Lwizi lwa Galilaya. Akaambo kaceeci, bantu banji baboola kuŋanda nkwabede. Bamwi akati kabo mba Farisi abamayi ba Mulawo aabo ibaboola kuzwa kumasena oonse aamu Galilaya alimwi amu Judaya, kubikkilizya aku Jerusalemu.

‘Aboobo bantu banji babungana cakunga takucikwe busena muŋanda naaba amulyango, mpoonya watalika kubaambila makani aa Bwami.’ (Marko 2:2) Lino kwaba bukkale butiipe kuti kucitike cintu cimwi cigambya kapati. Eeci citiicitike ncintu cikonzya kutugwasya kumvwisya kuti Jesu ulijisi nguzu zyakumana ceeco cipa kuti bantu kabapenga alimwi azyakuponya boonse aabo mbayanda kuponya.

Jesu nacili mukuyiisya muŋanda iizwide bantu, baalumi bone baleta muntu uulebukide mubili kalede amacila. Bayanda kuti Jesu amuponye mulongwe wabo. Pele, akaambo kankamu yabantu, baalilwa “kumusisya kuli Jesu.” (Marko 2:4) Amuyeeye buyo mbobatyompwa. Batanta atala aaciluli caŋanda cipapalete akupanga cipulo. Mpoonya balengelezya macila muŋanda aawo mpalede muntu uulebukide mubili.

Sena Jesu wanyema akaambo kakunyonganizyigwa ooku? Peepe! Wabotelwa kapati akaambo kalusyomo lwabo, eelyo waambila muntu ooyu uulebukide mubili kuti: “Walekelelwa zibi zyako.” (Matayo 9:2) Pele sena ncobeni Jesu ulakonzya kulekelela zibi? Balembi aba Farisi bamujanina kaambo mumakani aaya, aboobo batalika kulyaambauzya mumoyo kuti: “Ino nkaambo nzi muntu ooyu ncaambila boobu? Usampaula Leza. Nguni kunze lya Leza uukonzya kulekelela zibi?”—Marko 2:7.

Kazyi mbobayeeya, Jesu wabaambila kuti: “Ino nkaambo nzi ncomuyeeya zintu zili boobo mumyoyo yanu? Ncili cuuba-uba, kwaambila muntu uulebukide mubili kuti, ‘Walekelelwa zibi zyako,’ naa kwaamba kuti, ‘Nyamuka, bweza macila aako weende’?” (Marko 2:8, 9) Inzya, kwiinda mucipaizyo ncayakupa Jesu mukuya kwaciindi, ulakonzya kulekelela zibi zyamuntu ooyu.

Mpoonya Jesu watondezya nkamu yabantu eeyo antoomwe abasikumukazya, kuti ulijisi nguzu zyakulekelela zibi anyika. Walanga kuli yooyo uulebukide mubili akumulailila kuti: “Ndati kulinduwe, Nyamuka, bweza macila aako, uunke kuŋanda yako.” Mpoonya aawo muntu ooyo wanyamuka, weenda amacila aakwe kabalangilila boonse baliko aawo. Bantu bagambwa! Balemeka Leza akoompolola kuti: “Tatunacibwene cintu cili boobu”!—Marko 2:11, 12.

Tacigambyi pe kuti Jesu waamba zibi kuti ziliswaangene amalwazi alimwi akuti kulekelelwa kwazibi kulakonzya kupa kuti bantu babe abuumi bubotu bwakutaciswa. Bbaibbele liyiisya kuti muzyali wesu wakusaanguna Adamu wakabisya, alimwi akuti toonse twakakona mapenzi aaletwa akaambo kacibi, nkokuti kuciswa akufwa. Pele mubulelo bwa Bwami bwa Leza, Jesu uyoolekelela zibi zyabaabo boonse bamuyanda akumubelekela Leza. Mpoonya kuciswa kuyoomanizyigwa mane kukabe kutamani.—Baroma 5:12, 18, 19.