Kaxanikawa lichuwinamaka Jesús. Asta tiku xala makgat kachikinin minkgo niku xla wi xlakata nakgaxmatkgo tuku masiya chu naʼakxilhkgo tuku tlawa. Pero akxni titaxtunit makgapitsi kilhtamaku, Jesús taspita kCapernaúm, anta niku tlakg lhuwa kilhtamaku lichuwinan Dios, chu kʼuma kachikin nema wi kxkilhtun pupunu xalak Galilea, lakapala katsikan tuku tlawama. Wa xlakata lhuwa latamanin minkgo akxilhkgo kchiki niku xla wi. Na minkgonit fariseos chu makgalhtawakgenanin xalak Galilea chu Judea, nachuna xalak Jerusalén.

Lhuwa latamanin wilakgo kchiki chu nialhla tiku tanu, asta niku laktanukan lhuwa wilakgoka. Ama kilhtamaku Jesús tsuku kalitachuwinan «xatlan tamakatsinin» (Marcos 2:2). Uma kilhtamaku, putum tiku wilakgo naʼakxilhkgo tuku lu xlakaskinka nala. Tuku aku nala kinkamasiyaniyan pi Jesús kgalhi litliwakga xlakata namapanu tuku tlawa pi napatinanaw chu tlan mapaksa kaxatikawa tiku mapaksaputun.

Akxni Jesús lichuwinama Dios, chinkgo kgalhtati lakchixkuwin nema liminkgo tiku nila tlawan xlakata Jesús namapaksa. Pero lu tsamakan kchiki chu nila chankgo niku wi Jesús (Marcos 2:4). ¡Max lu nitlan limakgkatsikgo! Pero maski chuna, ni litaxlajwanikgo. Tawakakgo xʼakgstin chiki, akgstilhukikgo chu anta laktamaknukgo tiku nila tlawan.

¿Lisitsi Jesús tuku lama? Ni. Xtakanajlakan lakchixkuwin tlawa pi lu nakalakgalhaman chu wani tiku nila tlawan: «Tapatikana mintalakgalhin» (Mateo 9:2). Pero ¿tlan tapatinan Jesús talakgalhin? Lakgtsokgkinanin chu fariseos lakpuwankgo pi nila chuna tlawa chu lakpuwankgo: «¿Tuku xlakata chuna chuwinan uma chixku? Lixkajni lichuwinama Dios. Nila tiku tapatinan talakgalhin, kajwatiya Dios» (Marcos 2:7).

Jesús katsi tuku lakpuwamakgo chu wa xlakata kawani: «¿Tuku xlakata chuna lakpuwanatit? ¿Tuku tlakg ni tuwa? ¿Wanikan tiku nila tlawan: “Tapatikanita mintalakgalhin”, o wankan: “Kataki, katiya mimputama chu katlawanti”?» (Marcos 2:8, 9). Chuna, Jesús tlan tapatinan talakgalhin xlakata xla ama makamasta xlatamat.

Kalimasiyani putum tiku anta wilakgo, asta wantiku nitlan xlichuwinamakgo, pi xla kgalhi limapakgsin xlakata natapatinan talakgalhin. Lakgtalakgaspita tiku nila tlawan chu wani: «Kataki, katiya mimputama chu kapit kminchik». Chixku lakapala tlawa tuku Jesús wani: taki, tiya xputama chu titaxtu kxlakatinkan. Latamanin nila kanajlakgo. Tsukukgo malankikgo Dios chu wankgo: «Nikxni xakxilhnitaw chuna la uma» (Marcos 2:11, 12).

Jesús lichuwinan pi tatatlayaw xlakata makglakgalhinanin akinin chu akxni kinkatapatikanan kintalakgalhinkan tlawa pi nialh natatatlayaw. Biblia masiya pi xapulana lataman, Adán, lakgalhinalh chu kinkamatitaxtinin xtalakgalhin: tajatat chu linin. Pero akxni xTamapakgsin Dios namapakgsinan, Jesús nakatapati xtalakgalhinkan putum tiku paxkikgo chu skujnikgo Dios. Ama kilhtamaku, nialh katiʼanalh tajatat (Romanos 5:12, 18, 19).