Ol manmeri long olgeta hap i harim stori long ol samting Jisas i mekim. Planti i kam long ol longwe ples bilong harim ol tok em i skulim ol man long en, na long lukim ol mirakel em i wokim. Tasol sampela de bihain em i go bek long Kaperneam, em ples em i bin kirapim wok bilong em. Kwiktaim ol man long dispela taun i stap klostu long raunwara Galili i harim stori olsem Jisas i kam bek pinis. Olsem na planti manmeri i kam long haus em i stap long en. Sampela em ol Farisi na ol tisa bilong Lo, ol i kam long olgeta hap bilong Galili, Judia, na Jerusalem.

“Planti tumas man i kam bung na i no gat spes moa, na long hap bilong dua tu i no gat spes, na Jisas i stat long autim gutnius long ol.” (Mak 2:2) Nau Jisas bai mekim narakain samting tru. Em i narapela kain, long wanem, em i helpim yumi long save olsem Jisas i gat strong long pinisim ol pen na hevi, na oraitim sik bilong ol manmeri.

Jisas i autim tok long ol man i stap na fopela man i bringim wanpela paralais man long bet i kam. Ol i laik bai Jisas i oraitim pren bilong ol. Tasol bikpela lain manmeri i stap na ol i no inap “bringim em i go stret long Jisas,” olsem na ating ol i bel hevi. (Mak 2:4) Ol i go antap long rup bilong haus na rausim sampela tail long rup. Na nau ol i kisim bet em paralais man i slip long en na slekim i go insait long haus.

Olsem wanem? Jisas i kros long pasin ol i mekim? Nogat! Em i amamas tru long lukim olsem ol i bilip, olsem na em i tokim dispela paralais man: “Ol sin bilong yu i tekewe.” (Matyu 9:2) Tasol yu ting Jisas inap fogivim ol sin? Ol saveman bilong lo na ol Farisi i kros na tok: “Bilong wanem dispela man i tok olsem? Em i daunim God. Husat inap fogivim ol sin? Em God tasol, a?”—Mak 2:7.

Jisas i luksave long tingting bilong ol, na em i tokim ol: “Bilong wanem yupela i gat dispela tingting i stap long bel bilong yupela? Wanem tok em isi long mekim long dispela paralais man, ‘Ol sin bilong yu i tekewe,’ o ‘Kirap sanap na kisim bet bilong yu na wokabaut’?” (Mak 2:8, 9) Yes, long rot bilong ofa em klostu nau Jisas bai givim, em inap long tekewe sin bilong dispela man.

Bihain Jisas i wokim wanpela mirakel na bai bikpela lain manmeri na ol birua bilong em i ken save olsem em i gat namba long fogivim sin bilong ol man long graun. Jisas i tokim paralais man: “Mi tokim yu, kirap sanap, kisim bet bilong yu, na go long haus bilong yu.” Na wantu dispela man i kirap sanap, na long ai bilong olgeta manmeri em i kisim bet bilong em na wokabaut i go. Ol manmeri i kirap nogut na ol i givim glori long God na tok: “Man! Mipela i no bin lukim kain samting olsem long bipo.”—Mak 2:11, 12.

Tok bilong Jisas i soim olsem sin i mekim na man i kisim sik, olsem na taim Jisas i fogivim sin bilong yumi nau bodi inap kamap orait gen. Baibel i tok fes tumbuna bilong yumi, Adam, em i bin mekim sin na long dispela rot yumi olgeta i kisim ol hevi bilong sin, em sik na dai. Tasol aninit long wok bos bilong Kingdom Bilong God, Jisas bai lusim sin bilong olgeta man husat i laikim God na mekim wok bilong em. Long dispela taim sik bai pinis olgeta.—Rom 5:12, 18, 19.