Ko iloa ne tino mai kogā koga katoa a Iesu. Ne faima‵laga atu a tino e tokouke ki toe koga ‵mao eiloa ke fakalogo‵logo ki ana akoakoga kae ke lavea atu ana galuega ‵mana. Kae mai tua ifo o nai aso, ne toe foki atu a ia ki Kapanaumi, ko te koga ne fai faeloa i ei tena galuega. Se mea vave eiloa o ‵pa te tala i te fa‵kai kātoa i feitu o te Tai o Kalilaia me ko toe foki atu a ia. Ne olo atu ei a tino e tokouke ki te fale telā ne nofo a ia i ei. Ne aofia i tino kolā ne olo atu a nisi Falesaio mo faiakoga o te Tulafono kolā ne olo atu mai i Kalilaia kātoa mo Iuta, e aofia foki i ei a Ielusalema.

‘Ne tokouke ‵ki a tino ne mumu atu ki a ia i konā, telā ko se ofi ei latou i te fale, ke oko eiloa ki tua o te mataloa, kae ne kamata ei o akoako atu ne ia a muna a te Atua ki a latou.’ (Maleko 2:2) Ne toka ‵lei eiloa te tulaga tenā mō se mea fakaofoofogia. Ne tupu se mea telā e fesoasoani mai ke iloa ne tatou me e isi se malosi o Iesu ke ave keatea ne ia te māfuaga o logo‵maega o tino, kae ke toe fakafoki atu te malosi ki tino kolā e loto a ia ki ei.

A koi akoako atu a Iesu i te potu telā ko i‵tia valevale, kae ne aumai ne tāgata e tokofa se tino telā e ‵mate tena foitino i luga i se moega ‵fetu. Ne ma‵nako latou ke faka‵lei ne Iesu te lotou taugasoa. Kae ona ko te tokouke o tino, ne seki mafai ne latou “o avatu a ia ki a Iesu.” (Maleko 2:4) Mafaufau la ki te fakafanoanoa o te mea tenā. Ne ‵kake aka latou ki luga i te tuāfale pāpā o te fale kae ne fakapū ne latou. Tenā, ne tukutuku ifo ei ne latou te moega ‵fetu fakatasi mo te tagata e ‵mate tena foitino ki loto i te fale.

E mata, ne kaitaua a Iesu ona ko te lotou fakalavelave atu? Ikai, e se penā loa! Ne ofo malosi a ia i te lotou fakatuanaki kae fai atu ki te tagata e ‵mate tena foitino: “Au agasala ko magalo.” (Mataio 9:2) Kae e mata, e mafai eiloa o fakamagalo ne Iesu a agasala? E ‵teke atu a failautusi mo Falesaio ki te manatu tenei, olotou muna: “Kaia e faipati ei penei te tagata tenei? A ia ko muna masei ki te Atua. Ko oi e mafai o fakamagalo ne ia agasala, i tafa o te Atua?”—Maleko 2:7.

Me ne iloa ne Iesu olotou manatu, ne fai atu a ia ki a latou: “Kaia e mafau‵fau ei koutou penā i otou loto? Se a te mea e faigofie atu, ko te fai atu ki te tino ‵pili, ‘Au agasala ko magalo,’ io me fai atu , ‘Tu ki luga, puke tou moega, kae sasale’?” (Maleko 2:8, 9) Ao, mai te fakavae ki te taulaga telā ko pili o ofo atu ne Iesu, ne mafai o fakamagalo ne ia a agasala a te tagata tenā.

Ne fakaasi atu ei ne Iesu ki te vaitino, e aofia i ei a tino kolā e mata onoono atu faeloa ki a ia, me e isi sena pule ke fakamagalo ne ia a agasala i te lalolagi. Ne ‵fuli atu a ia ki te tagata e ‵mate tena foitino kae fakatonu atu: “Au e fai atu ki a koe, Tu ki luga, puke tou moega, kae fano ki tou fale.” Ne fai fakavave eiloa ne te tagata te mea tenā, ne sasale atu a ia mo tena moega ‵fetu i mua o latou katoa i konā. Ne ōfo a tino! Ne tavae atu latou ki te Atua kae fai atu: “Ne seki lavea aka eiloa ne matou se vaegā mea penei.”—Maleko 2:11, 12.

Se mea tāua me ne faipati a Iesu ki te sokoga i agasala mo masaki kae e penā foki a te sokoga i te fakamagaloga o agasala mo te ‵toe fakafokimaiga o te malosi faka-te-foitino. E akoako mai i te Tusi Tapu me i te ‵tou tamana muamua ko Atamu, ne agasala kae ne maua i ei ne tatou katoa a ikuga o te agasala, ko ma‵saki mo te mate. Kae mai lalo i te pulega a te Malo o te Atua, ka fakamagalo ne Iesu a agasala a tino katoa kolā e a‵lofa kae tavini atu ki te Atua. Ka ave keatea i ei a ma‵saki ki te se-gata-mai.—Loma 5:12, 18, 19.