KAPITE 26
“Kua Fakamolemole ʼAu Agahala”
MATEO 9:1-8 MALEKO 2:1-12 LUKA 5:17-26
-
ʼE FAKAMOLEMOLE E SESU TE ʼU AGAHALA ʼA TE TAGATA PALILISIA PEA MO INA FAKAMALOLO
Neʼe logo te hahaʼi mai te ʼu potu kehekehe ki te palalauʼi ʼo Sesu. Tokolahi neʼe natou faifagona ki te ʼu koga meʼa mamaʼo ʼae neʼe nofo ai, ke natou fagono ki tana faiakonaki pea mo sisio ki tana faimilakulo. Kaʼe, hili he ʼu kiʼi ʼaho neʼe toe liliu ia ki Kapenaume, te kolo ʼae neʼe tau nofo ai lolotoga tona minisitelio. Ko te logo ʼo ʼuhiga mo tana toe liliu, neʼe mafola vave ʼi te kolo ʼae neʼe tuʼu ovi ki te Tai ʼo Kalilea. Pea tokolahi neʼe natou ʼomai ki te ʼapi ʼae neʼe nofo ai. Ko ʼihi neʼe ko te ʼu Faliseo pea mo te ʼu faiako ʼo te Lao neʼe ʼomai mai te ʼu potu fuli ʼo Kalilea mo Sutea, ʼo kau ai mo Selusalemi.
“Neʼe fakatahitahi ai te tokolahi ʼo mole kei natou hao ʼi fale, maʼia mo te muʼa matapa. Neʼe ina kamata tala age te logo lelei kia natou.” (Maleko 2:2) Pea neʼe hoko ai leva ia he meʼa maʼuhiga ʼaupito. ʼE ko he aluʼaga ʼe tokoni mai ke tou mahino ʼe maʼu e Sesu ia te malohi moʼo pulihi ia te tupuʼaga ʼo te ʼu mamahi ʼo te tagata pea mo fakamalolo ia natou ʼae neʼe ina fili.
Lolotoga te faiakonaki ʼa Sesu ʼi te fale ʼaia neʼe fonu ai te hahaʼi, neʼe ʼaumai leva e te ʼu tagata ʼe toko fa ia he tagata palalisia ʼi he palepale. Neʼe natou loto ke fakamalolo e Sesu tonatou kaumeʼa. Kaʼe ʼuhi ko te hahaʼi “neʼe mole feala ke natou ʼaumai fakahagatonu ia ia kia Sesu.” (Maleko 2:4) Ke ke fakakaukauʼi age muʼa ia tonatou lotomamahi. Koia neʼe natou fekakeʼi ai ki te ʼato pea natou haga ʼo vete. Hili ʼaia, neʼe natou fakahifo ifo ia te palepale ʼae ʼe takoto ai te tagata palalisia ki te loto fale.
Neʼe ita koa ia Sesu ʼi tona fakaleluʼi? Kailoa ia. Neʼe malave kia ia tanatou tui pea neʼe ina ui fenei age ki te tagata palalisia: “Kua fakamolemole ʼau agahala.” (Mateo 9:2) Kaʼe ʼe lava fakamolemole koa e Sesu ia te ʼu agahala? Neʼe fakafeagai ia te kau sekelipa pea mo te kau Faliseo ki te faʼahi ʼaia, ʼo natou manatu fenei: “He koʼe ʼe palalau feia te tagata ʼaeni? ʼE laukovi ia ki te ʼAtua. ʼE mole feala ki he tahi ke ina fakamolemole te ʼu agahala, gata tahi pe ki te ʼAtua.”—Maleko 2:7.
ʼI te iloʼi e Sesu ʼanatou manatu, neʼe ina ui fenei age kia natou: “He koʼe ʼe kotou maʼu te ʼu manatu ʼaia ʼi ʼokotou loto? Kotea ʼae ʼe faigafua age, ko te ui ki te tagata palalisia ʼaeni, ‘Kua fakamolemole ʼau agahala’ peʼe ko te ui ʼae ‘Tuʼu ake pea ke toʼo tou palepale pea ke haʼele’?” (Maleko 2:8, 9) ʼEi, neʼe lava fakamolemole e Sesu ia te ʼu agahala ʼa te tagata ʼuhi ko te sakilifisio ʼae ka ina momoli ki ʼamuli age.
Koia, neʼe fakaha e Sesu ki te hahaʼi, ʼo feia mo natou ʼae neʼe fakafeagai kia ia, ʼe ina maʼu te malohi moʼo fakamolemole te ʼu agahala ʼa te tagata. Neʼe haga ki te tagata palalisia ʼo ina fakatotonu fenei age: “ ʼE au ui atu: Tuʼu ake, toʼo tou palepale pea ke alu ki tou ʼapi.” Pea neʼe tuʼu ake aipe ia te tagata ʼo alu mo tona palepale ia muʼa ʼo te hahaʼi fuli. Neʼe natou punamaʼuli. Neʼe natou fakakololiaʼi ai te ʼAtua, pea mo natou ui fenei: “Neʼe heʼeki matou sisio ki he meʼa feia.”—Maleko 2:11, 12.
ʼE maʼuhiga ke tou tokagaʼi ʼi te ʼu palalau ʼa Sesu, ʼe ʼi ai te pikipikiga ʼo te ʼu agahala mo te mahaki pea ʼe ʼi ai te pikipikiga ʼo te fakamolemole ʼo te ʼu agahala mo te maʼuli malolo. ʼE akoʼi mai ʼi te Tohi-Tapu ko tatatou ʼuluaki tamai ia Atama, neʼe agahala pea neʼe ina tuku mai kia tatou fuli ia te ʼu fua ʼo te agahala ʼae ko te mahaki pea mo te mate. Kaʼe ka ʼafio anai ia te Puleʼaga ʼo te ʼAtua, ʼe fakamolemole anai e Sesu ia te ʼu agahala ʼa natou fuli ʼae ʼe ʼoʼofa mo tauhi ki te ʼAtua. Pea ʼe puli anai ʼo talu ai ia te mahaki.—Loma 5:12, 18, 19.