Éyoñ a maneya saé ñyemelan môt, Yésus a tabe Capernaoum mfa’a ya ékôte Mañ ya Galilée. Jama bôt a beta zu be nye, a taté fe na a ye’ele be. Nté a wulu, a yene Matthieu, nyi ba loene fe na Lévi, a to wofis ya vôme ba nyoñe taxe. Yésus a ve nye abeñ mbañete: “Tôñe’ ma.”​—Matthieu 9:9.

Matthieu a yianeya wô’ô ñye’elane Yésus a mam a te bo abôta si ete, fo’o v’ane Pierre, André, Jacques ba Jean be nga wô’ô fe me. Matthieu a yalan ane be teke jañele éyoñ. Matthieu a kañete jam ete a jô’ô na: “Ane a [Matthieu émien] nga kôlô si, ve tôñe” Yésus. (Matthieu 9:9) Matthieu a kôme fo’o lum ésaé nyoñe taxe jé mvus a bo ñyé’é Yésus.

Mvuse bone melu, éko éziñ amu a kômbô ve Yésus akiba amu a te ve nye mbañete ô ne ngum aval, Matthieu a kômesane beta abôk nda jé. Za mfe ba te bañete ane ô vaa Yésus a beyé’é bé? Bi ne lañe bôte ba to be saék a nye, benyoñe taxe bevo’o be ne valé. Ba nyoñ a kôane taxe asu éjôé ya Rome, éjôé bôte ba vini. Ba nyoñe taxe e besitima ba zu tebe nsa’a mañ, e be bôte ba nyoñe beta minjoñ éyoñ ba ke dulu, a bekuane makit. Aval avé Bejuif ba yene benyoñe taxe bete bese? Bôt ba vini be amu be wô’ô wube bôt a sili be na be ya’ane taxe a lôt abime moné ba yiane ya’an. Abô’ ete, ‘mbia be bôt’ be ne fe valé, ba yeme be ane bôte be bili fulu ya bo mbia be mam.​—Luc 7:37-39.

Éyoñ ba yene Yésus a to a avale bôt ete abôk, Bepharisien, bôte be bili fulu ya komekane bôt ba sili beyé’é na: “Ñye’ele wônan, ba be benyoñe taxe a bôt be ne abé be adi vôme wua amu jé?” (Matthieu 9:11) Éyoñ a zu dilane be be kobô’ô, Yésus a yalane be a jô’ô na: “Sa ñhe mimvôvô’é mmie mia yi dokita, ve minkôkon. Kelane ñhe yé’é atinane ya bifia bina na: Ma yi nkoon éngôngo sa ke étyi’a. Amu me nga zu loon, sa ke bezôsôô be bôt, ve bebo abé.” (Matthieu 9:12, 13, Mfefé Nkôñelan; Osée 6:6) Bepharisien be nji kobô a minlem mi ne zôsô éyoñ ba jô na Yésus a ne “ñye’ele,” ve be ne ngule ya yé’é mame me ne zôsô be nye.

Éko éziñ na, Matthieu a te bañete benyoñe taxe a bebo mam abé nda jé asu na, be zu vô’ôlô Yésus a bi mvolane mfa’a ya nsisim, “amu be mbe abui, ane be nga tôñe nye.” (Marc 2:15) Yésus a kômbô volô be na be bi mbamba élat a Zambe. Yésus a nji bo ane Bepharisien ba buni na b’adañe zôsô, amu nye a nji biasé avale bôt ete. A wô’ô bôt éngôngol a mvamane fe be. A kômbô saé ba bese ba kone mfa’a ya nsisim.

Yésus a ko benyoñe taxe a bebo mam abé éngôngol sa ke amu a dime mise minseme miap, ve a ne amu a wô’ô be mintaé ane ba be ne minkôkon mfa’a ya minsôn. Bia beta simesan na a nga nambe nzezam a mbamba nlem a jô nye na: “Me me’eteya; bo’o mvô’é.” (Matthieu 8:3) Nga bia fe bia yiane ko bôt éngôngol a volô ba ba yi mvôlan, e dañedañ mfa’a ya nsisim?