Thupene la hna aloine la ka genyi itrei, hnei Iesu hna pane lapa e Kaperenauma, ezine la Hnagejë Ne Galilaia. Hnene hmaca la ka ala nyim hna traqa koi nyidrë, nge nyidrëti a nyiqaane ini angatre jë. Ame hnei nyidrëti hna nango tro ju e cili, nge traqa ju hi nyidrëti a öhnyi Mataio, lo hna hëne fe ka hape, Levi, angeic a lapa ngöne la uma ne hle mani. Iesu a hë angeice jë troa kuca la ketre ewekë ka mingöming, öni nyidrë: “Xötrethenge ni jë.”—Mataio 9:9.

Tui Peteru, Anederea, me Ioane, me Iakobo, drenge hë Mataio la itre ini i Iesu, me itre iamamanyikeu hnei nyidrëti hna kuca ngöne la nöj. Matre tui angatr, hnei Mataio hna canga kapa. Hnei angeice hna qejepengöne lai ngöne la tusi angeic, öni angeic: “Haawe, mejë jë hi angeic [Mataio] troa xötrethenge nyidrë,” ene Iesu. (Mataio 9:9) Qaane ju hi lai, hnei Mataio hna nue la huliwa ne hle mani göi troa ketre atre drei Iesu.

E thupen, hnei Mataio hna hnëkëne la ketre feet ka tru ngöne la hnalapa i angeic, ma nyine amamane la etrune la ole i angeic kowe la ihë ka ketrepengöne i Iesu. Haawe, Iesu me itretre dreng la hna hën. Ngo drei la itre xan? Itre sine huliwa i Mataio ekö, me itre xa atre hle mani. Itre atre lai ka hle mani kowe la mus hna methinën i angetre Roma. Angatr a hleme la mani hna athip koi itre he ka xep, me itre trongene ikatr ka nyapëne la itre gojenyi ka tru, me itre ewekë ka traqa qa ngöne itre xa nöj. Matre nemene la aqane goeën angetre Iudra la itre atre cili? Xele catr angetre Iudra ma wange la itre ka hle mani, ke hnei angatr hna majemine hën atrune la thupene hna athip. Nge ngöne la feete cili, hetrenyi fe la ‘itre ka kuca la ngazo,’ itre ka hlemu ngazo.—Luka 7:37-39.

Ame la kola öhnyi Iesu memine la itre atr cili, hnene la itre Faresaio hna pi nyi ka meköt, me hnyinge kowe la itretre dreng ka hape: “Hnauëne laka, kola ce xeni hnene la atre ini epun memine la itre ka hle mani, me itre ka kuca la ngazo?” (Mataio 9:11) Drenge hi Iesu, matre öni nyidrë: “Tha nyipiewekë kö la droketre kowe la itre ka egöcatr, ngo koi itre wezipo. Tro jë, nge trotrohnine ju la aliene la trengewekë celë: ‘Ka tru koi ni la utipin hune la huuj.’ Nge celë hi matre eni a hëne la itre ka ngazo, ngo tha itre ka meköti kö.” (Mataio 9:12, 13; Hosea 6:6) Itre Faresaio a hëne thoi Iesu ka hape, “atre ini,” ngo eje hi, hetre ini ka loi nyine tro angatr a kapa qaathei nyidrë.

Kola mekune laka, hnei Mataio hna hëne la itre ka hle mani me itre ka kuca la ngazo kowe la hnalapa i angeic, matre tro angatr a drei Iesu, me imelekeu hmaca me Akötresie, “ke ala nyimu thei angatr ka xötrethenge nyidrë.” (Mareko 2:15) Aja i Iesu troa xatua angatr matre tro loi la aqane imelekeu i angatr me Akötresie. Tha ceitu i Iesu kö me itre Faresaio ka pi nyi ka meköt, ke tha nyidrëti kö a xele ma wange la itre atre cili. Ihnim me utipine la ka uku Iesu troa ujë tun; nyidrëti a tune la droketre ka aloine la itre ka pë imelekeu me Akötresie.

Hnei Iesu hna utipine la itre ka hle mani me itre ka kuca la ngazo. Tha kolo kö a hape, hnei nyidrëti hna kapa la itre ngazo i angatr, ngo hnei nyidrëti pe hna pi amamane la elolone la itre thiina i nyidrë, itre thiina hnei nyidrëti hna amamane kowe la itre ka wezipo. Pane mekune jë lo aqane ketr me utipine nyidrë la lepera, öni nyidrëti lo: “Ajange hi lai! Mele hë hmunë.” (Mataio 8:3) Tha aqane tro kö së lai a hane utipin me xatuane la itre ka aja ixatua? Nge hapeu, tha ka nyipiewekë catre kö koi itre ka pë imelekeu me Akötresie?