Kalpasan a pinaimbag ni Jesus ti paralitiko, nagtalinaed idiay Capernaum nga asideg iti Baybay ti Galilea. Napan manen kenkuana dagiti tattao, ket rinugianna nga isuro ida. Bayat a magmagna, nakitana ni Mateo, a naawagan met Levi, a nakatugaw iti opisina a pagbayadan iti buis. Inyawis ni Jesus kenkuana: “Agbalinka a pasurotko.”—Mateo 9:9.

Mabalin nga ammon ni Mateo dagiti pannursuro ken milagro nga inaramid ni Jesus iti dayta a lugar, kasta met da Pedro, Andres, Santiago, ken Juan. Kas kadakuada, simmurot met a dagus ni Mateo. Dinakamat daytoy ni Mateo iti Ebangheliona. Kinunana: “Dagus a timmakder [ni Mateo] ket simmurot” ken Jesus. (Mateo 9:9) Gapuna, pinanawan ni Mateo ti trabahona kas agsingsingir iti buis ket nagbalin nga adalan ni Jesus.

Idi agangay, mabalin a gapu ta kayat ni Mateo ti agyaman iti daytoy a naisangsangayan nga awis ni Jesus, nangisagana iti padaya iti balayna. Siasino pay dagiti naawis malaksid ken Jesus ken dagiti adalanna? Adda met sadiay ti adu kadagiti dati a kakadua ni Mateo nga agsingsingir iti buis. Agsingsingirda iti buis para kadagiti magurgura nga agtuturay iti Roma, kasta met dagiti buis manipud iti sangladan ti barko, buis manipud kadagiti agdaldaliasat kadagiti kangrunaan a kalsada, ken buis dagiti maangkat a tagilako. Ania ti panangmatmat dagiti Judio kadagitoy nga agsingsingir iti buis? Kagurada ida gapu ta masansan a suitikenda ida ken nangatngato ti singirenda ngem iti maikalikagum a buis. Adda met dagiti napan iti padaya a “managbasol,” dagiti agdindinamag nga agar-aramid iti dakes.—Lucas 7:37-39.

Idi nakita dagiti managinsisingpet a Fariseo a kalanglangen ni Jesus dagita a tattao iti padaya, insaludsodda kadagiti adalanna: “Apay a makipangpangan ti mannursuroyo kadagiti agsingsingir iti buis ken kadagiti managbasol?” (Mateo 9:11) Nangngeg ida ni Jesus ket insungbatna: “Dagiti masakit ti agkasapulan iti doktor, saan a dagiti nasalun-at. Adalenyo ti kaipapanan daytoy: ‘Asi ti kayatko, saan a daton.’ Ta immayak tapno ayabak dagiti managbasol, saan a dagiti nalinteg.” (Mateo 9:12, 13; Oseas 6:6) Aginkukuna dagiti Fariseo idi inawaganda ni Jesus iti ‘mannursuro,’ ngem adda maadalda kenkuana maipapan iti no ania ti umiso.

Mabalin nga inawis ni Mateo iti balayna dagiti agsingsingir iti buis ken dagiti managbasol tapno dumngegda ken Jesus ken umawatda iti naespirituan a pannakaagas, ta “adu kadakuada ti nagbalin a pasurotna.” (Marcos 2:15) Kayat ida a tulongan ni Jesus a maaddaan iti nasayaat a relasion iti Dios. Saan ida a kagura ni Jesus, saan a kas kadagiti managinsisingpet a Fariseo. Naasian isu a pinaimbagna dagiti masaksakit iti naespirituan.

Impakita ni Jesus ti asi kadagiti agsingsingir iti buis ken kadagiti managbasol, saan a tapno anamonganna dagiti basolda no di ket tapno ipakitana ti asi a kas iti panangngaasina kadagidiay addaan iti pisikal a sakit. Lagipem kas pagarigan idi sidudungngo nga iniggamanna ti agkukutel, ket kinunana: “Kayatko! Umimbagka.” (Mateo 8:3) Saan kadi a masapul nga ipakitatayo met ti asi kadagidiay agkasapulan iti tulong, nangruna iti panangtulongtayo kadakuada iti naespirituan?