Ĩvinda ĩnini ĩtina wa Yesũ kũvosya ũla mũndũ waĩ mwonzu mamutha, nĩwaendeeie kwĩkala ndũanĩ ya Kavelinaumi ĩla yaĩ vakuvĩ na Ũkanga wa Kalilii. Andũ aingĩ nĩmookie ĩngĩ vala waĩ na ambĩĩa kũmamanyĩsya. Mũthenya ũmwe atembeete, Yesũ nĩwoonie Mathayo, ũla kwa ĩsyĩtwa yĩngĩ weetawa Livai, ailyĩ ovisinĩ wa koti. Yesũ nĩwamwĩtie e mũtanu amwĩa atĩĩ: “Ĩthĩwa mũatĩĩi wakwa.”—Mathayo 9:9.

Nĩvatonyeka Mathayo akethĩwa eesĩ momanyĩsyo ma Yesũ na maũndũ maingĩ ala weekĩte kĩsionĩ kĩu, o tondũ Vetelo, Endelea, Yakovo, na Yoana meesĩ. O tamo, Mathayo nĩwatw’ĩkie mũatĩĩi wa Yesũ vau kwa vau. Aielesya ũndũ ũsu ĩvukunĩ yĩla waandĩkie ya Ũvoo Mũseo aisye atĩĩ: “Nake [Mathayo] ookĩla na amũatĩĩa” Yesũ. (Mathayo 9:9) Kwoou, Mathayo nĩwaekanie na wĩa wake wa kumĩthya koti na atw’ĩka mũmanyĩw’a wa Yesũ.

Ĩtina wa ĩvinda, nĩwaseũvisye mboka nene mũsyĩ kwake, na nĩvatonyeka akethĩwa eekaa ũu nĩ kana atũngĩe Yesũ mũvea nũndũ wa kũmũthokya ethĩwe mũatĩĩi wake. Naaũ angĩ Mathayo wathoketye eka Yesũ na amanyĩw’a make? Amwe maĩ aumĩthya ma koti ala Mathayo wathũkũmaa namo. Andũ asu maumĩthasya koti kwondũ wa anene ma Lomi, ala mamenetwe nĩ Ayuti. Kwa ngelekany’o, nĩmeetasya koti yĩla meli syooka kĩlĩndĩnĩ, na koti wa syĩndũ ila syaetawa kuma kũndũ kũngĩ. Ĩndĩ mo Ayuti meethĩawa na woni mwaũ ĩũlũ wa aumĩthya asu ma koti? Nĩmamavũthĩtye nũndũ mavinda maingĩ meetasya mbesa mbingĩ kwĩ ila maĩle kwĩtya. Andũ angĩ Mathayo wathoketye mbokanĩ ĩsu maĩ ‘eki ma naĩ,’ na meesĩkĩe ta andũ me mwĩkalĩle mũthũku.—Luka 7:37-39.

Yĩla Avalisi, ala moonaa me alũngalu, moonie Yesũ e mbokanĩ vamwe na andũ asu, makũlilye amanyĩw’a ma Yesũ atĩĩ: “Nĩkĩ mũmanyĩsya wenyu ũĩsanĩaa na aumĩthya ma koti na eki ma naĩ?” (Mathayo 9:11) Yĩla Yesũ weewie ndeto isu sya Avalisi, ameie atĩĩ: “Andũ mate awau mayĩthĩawa na vata wa mũiiti, ĩndĩ no ala awau. Endai ĩndĩ mũkemanyĩsye ũndũ ndeto ii syonanasya: ‘Nĩenda tei, na ti nthembo.’ Nũndũ ndyaaũka kwondũ wa ala alũngalu, ĩndĩ nookie kwondũ wa eki ma naĩ.” (Mathayo 9:12, 13; Osea 6:6) Avalisi mayaneenaa kuma ngoonĩ yĩla mwamwĩtie Yesũ “mũmanyĩsya,” ĩndĩ o na ũu wĩ o vo, ndeto isu sya Yesũ nĩsyamamanyĩisye ũndũ wa vata.

Mathayo athoketye aumĩthya ma koti na eki ma naĩ mũsyĩ kwake nĩ kana methukĩĩsye Yesũ na maitetheka kĩ-veva. Ve aumĩthya ma koti na eki ma naĩ “aingĩ ala mamũatĩĩe” Yesũ kwa Mathayo. (Maliko 2:15) Yesũ endaa kũmatetheesya methĩwe na ngwatanĩo nzeo na Ngai. Kĩvathũkany’o na Avalisi ala moonaa me alũngalu, Yesũ ndoonaa aumĩthya ma koti na eki ma naĩ me andũ mataĩle. Nĩkwĩthĩwa aĩ na tei, nĩwatetheeasya ala meekaa maũndũ mathũku nĩ kana methĩwe na ngwatanĩo nzeo na Ngai.

Yesũ eew’ĩaa aumĩthya ma koti na eki ma naĩ tei o tondũ weew’ĩaa tei ala maĩ awau, ĩndĩ ũu ti kwonany’a kana ndoonaa matavĩtĩtye. Ngelekany’o nzeo ya kwonany’a kana nĩweew’ĩaa andũ tei nĩ yĩla wakiitie mũndũ wawaĩte mangũ, na amwĩa, “Nĩngwenda! Ĩthĩwa mũtheu.” (Mathayo 8:3) O naitũ nĩtwaĩle kwĩthĩwa  na tei mwingĩ ta ũsu na tũitetheesya ala me na vata, na mũno mũno kwa kũmatetheesya methĩwe na ngwatanĩo nzeo na Ngai.