Thutha wa kũhonia mũndũ mũkuũ ciĩga, Jesu agaikara kahinda kanini o kũu Kaperinaumu hakuhĩ na Iria rĩa Galili. O rĩngĩ andũ magoka kũrĩ we, na akambĩrĩria kũmaruta. Agĩthianga akona Mathayo, o we wĩtagwo Lawii, aikarĩte wabici-inĩ ya kũrĩhĩra igooti. Jesu akamwĩta akamwĩra ũũ: “Tuĩka mũrũmĩrĩri wakwa.”​—Mathayo 9:9.

No kũhoteke o nake Mathayo, o ta Petero, Andrea, Jakubu, na Johana, ti mũgeni na morutani ma Jesu na maũndũ manene marĩa ekĩte itũũra-inĩ rĩu. Mathayo agetĩkĩra o na ihenya o ta ũrĩa o nao meekire. Ataarĩirie ũndũ ũcio Injiri-inĩ yake akoiga: “Nake [Mathayo] agĩũkĩra na akĩmũrũmĩrĩra.” (Mathayo 9:9) Kwoguo Mathayo agatiga wĩra wake wa kũrĩhia igooti na agatuĩka mũrutwo wa Jesu.

Ihinda rĩna thutha ũcio, hihi nĩguo onanie ngatho ciake nĩ ũndũ wa rĩĩtana rĩa Jesu, Mathayo akahaarĩria iruga inene gwake mũciĩ. Nĩa angĩ manyitĩtwo ũgeni tiga Jesu na arutwo ake? Kũrĩ na andũ angĩ aingĩ arĩa maarutaga wĩra wa kũrĩhia igooti hamwe na Mathayo. Monganagĩria thirikari ĩrĩa ĩmenetwo ya Roma igooti, hamwe na igooti kuuma kũrĩ meri iria iroka, ngaari cia kũgucio iria irathiĩra barabara-inĩ iria nene, na indo iria iroka kuuma na nja. Ayahudi monaga atĩa arĩhia acio a igooti? Matimendete tondũ kaingĩ metagia mbeca nyingĩ kũrĩ iria ciagĩrĩire. Ningĩ no kũrĩ na ‘ehia’ iruga-inĩ rĩu, andũ moĩkaine na gwĩka maũndũ moru.​—Luka 7:​37-39.

Kũu iruga-inĩ, Afarisai arĩa meyonaga marĩ athingu mona Jesu akĩrĩanĩra na andũ ta acio makoria arutwo ake ũũ: “Mũrutani wanyu arĩanagĩra na etia a mbeca cia igooti na ehia nĩkĩ?” (Mathayo 9:11) Jesu amaigua, akamacokeria ũũ: “Andũ arĩa matarĩ arwaru matibataraga ndagĩtarĩ, no arĩa arwaru nĩo mamũbataraga. Nĩ ũndũ ũcio-rĩ, thiĩi mũgatuĩrie ũrĩa ciugo ici ciugĩte: ‘Ngwenda muonanagie tha no ti mũndutagĩre magongona.’ Tondũ ndiokire gwĩta arĩa athingu, no ndokire gwĩta ehia.” (Mathayo 9:​12, 13; Hosea 6:6) O na gũtuĩka Afarisai mareta Jesu “mũrutani,” matiĩtĩkĩtie atĩ nĩ mũrutani, kwoguo matirenda kwĩruta kuuma kũrĩ Jesu o na gũtuĩka no amarute gwĩka maũndũ marĩa magĩrĩire.

Mathayo etĩte arĩhia a mbia cia igooti na ehia gwake mũciĩ nĩguo mathikĩrĩrie Jesu na mahonio kĩĩroho, “nĩ ũndũ aingĩ ao nĩ maamũrũmagĩrĩra.” (Mariko 2:15) Jesu arenda kũmateithia magĩe na ũkuruhanu mwega hamwe na Ngai. Ngũrani na Afarisai arĩa mareyona marĩ athingu, Jesu ndaranyarara andũ ta acio. Areka ũguo nĩ ũndũ wa tha; agatuĩka ndagĩtarĩ wa arĩa othe arwaru kĩĩroho.

Jesu akĩonia ehia na arĩhia a igooti tha, ti kuuga atĩ nĩ aretĩkania na mehia mao, no arenda kũmonia ũcayanĩri o ta ũrĩa onetie arĩa aahonetie mĩrimũ ya kĩĩmwĩrĩ. Kwa ngerekano, ta ririkana rĩrĩa aahutirie mũndũ warĩ na mangũ nĩ ũndũ wa tha, akĩmwĩra: “Nĩ ngwenda. Thera.” (Mathayo 8:3) Na githĩ o na ithuĩ tũtiagĩrĩirũo kuonanagia tha na tũteithagie arĩa marabatara ũteithio, na makĩria na njĩra ya kĩĩroho?