Byo abukile muntu wa kalepu, Yesu waikele mu mpunzha ya Kapenama ku Kalunga ka Ngalilea. Kabiji bantu bavula bamulondejile ne aye watatwile kwibafunjisha. Byo apichilenga, wamwene Mateo watelwanga’mba Levi, saka aikala po basonkesheshanga misonko. Yesu wamwichile’mba: “Ndondelenga.”—Mateo 9:9.

Kyamweka Mateo wayukile mafunjisho a kwa Yesu ne bya kukumya byo aubile mu yoya mpunzha, byonkatu byo bayukile ba Petelo, Andeleo, Yakoba ne Yoano. Onkao mambo, Mateo naye waswile luno lwito. Mateo walumbulula mu Mambo Awama o anembele amba: “Ponkapo [aye mwine Mateo] waimene keamulondele.” (Mateo 9:9) Onkao mambo, Mateo washile mwingilo wanji wa kusonkesha misonko ne kwikala mwana wa bwanga wa kwa Yesu.

Palutwe kacheche, Mateo wanengezhezhe kijiilo kikatampe mu nzubo yanji, kampe kya kusanchila Yesu pa byo amwichile. Kununga pe Yesu ne baana banji ba bwanga, bañanyi bakwabo Mateo bo aichile ku kijiilo? Balunda nanji mo baingijilanga mwingilo wa kusonkesha misonko nabo batainweko. Bano banabalume basonkeshanga misonko ya bena Loma. Basonkeshanga misonko pa maato asendanga bipe, makalaki aendanga mu mikwakwa, ne misonko ya bipe byapotanga bantu kufuma kwalepa. Bayudea bamonanga byepi bano basonkeshi? Bayudea bashikilwe bano basonkeshi mambo mu bujimbijimbi bwabo basonkeshanga mali avula kukila afwainwe kupananga bantu. Kabiji pa kino kijiilo pajinga ne ‘bandengamambo,’ ko kuba’mba bantu bayukanyikilwe na mambo a byubilo byabo byatama.—Luka 7:37-39.

Byo bamwene Yesu saka ajiila pamo na bano bantu, Bafaliseo bashikishe baana banji ba bwanga amba: “Mambo ka mufunjishi wenu o ajiila pamo na basonkeshi ne bandengamambo?” (Mateo 9:11) Yesu byo aumvwine Bafaliseo na kwamba bino, wibakumbwile’mba: “Bantu batuntulu kechi bakeba shayuka wa michi ne, poso aba bakolwa. Yainga mukafunde kino mo kyatala: ‘Amiwa nkeba lusa, kechi kitapisho ne.’ Naishile na kwita bandengamambo kechi bantu baoloka ne.” (Mateo 9:12, 13; Hoseya 6:6) Nangwa kya kuba Bafaliseo batelele Yesu amba “mufunjishi,” kechi bamunemekele mu michima yabo ne. Pano bino, bafwainwe kufunjilako kwi Yesu pa bya kuba byawama.

Kyamweka Mateo waichile bano basonkeshi ne bandengamambo ku nzubo yanji kuba’mba bomvwe byaambilenga Yesu ne kutookesha byubilo byabo, “mambo kwajinga bantu bavula bamulondejilenga.” (Mako 2:15) Yesu wakebelenga’mba ebakwashe kwikala balunda na Lesa. Kupusanako na Bafaliseo bemwenenga bene amba baoloka, Yesu kechi walengulwile bantu ba uno mutundu ne. Pakuba aye wibobijile lusa. Onkao mambo, aye uji nobe ñanga wa ku mupashi wakonsha kukwasha bonse bakolwa ku mupashi.

Lusa Yesu lo aubijile bandengamambo ne basonkeshi kechi lwalumbulwile’mba waitabizhenga byubilo byabo byatama ne, bino lwajingatu pamo na lusa lo aubilanga bantu bajinga na bikola bya ku mubiji. Vulukai kimye kyo atanyikile kuboko kwanji ne kukwata muntu wa mbumba ne kumwambila’mba: “Naswa! Bukwa.” (Mateo 8:3) Ne atweba twafwainwa kubilanga lusa bantu bakajilwa ne kwibakwasha, kikatakata kwibafunjisha bukine.