Ke vaviokele kolo kiayingi ko tuka kawukidi mbevo a vola, Yesu wakinu kaka muna zunga kia Kafanau, lukufi yo Mbu a Ngalili. Ndonga yizidi diaka kwa yandi, oyantikidi kubalonga. Wau kekangalanga, omwene Matai, oyikilwanga mpe vo Levi, ovuende vana vevakulwilwanga e mpaku. Yesu umvovese vo: “Undanda.”—Matai 9:9.

Nze Petelo, Andere, Yakobo ye Yoane, nanga Matai wateka kiwila malongi ma Yesu yo mona masivi kevanganga muna zunga. Nze yau, Matai mpe otambulwidi mbok’a Yesu vana vau. Matai muna Nsangu Zambote kasoneka wavova vo: “Vana vau, [yandi kibeni Matai] otelamene unlende.” (Matai 9:9) Matai oyambwidi kiyekwa kiandi kia vakulwisa e mpaku, okitukidi nlongoki a Yesu.

I bosi, muna vutula matondo muna mboka yamfunu kaveno kwa Yesu, Matai okubikidi lambu diampwena muna nzo andi. Katula Yesu ye alongoki andi, aki nani diaka kabokelese? Akundi andi ana kasalanga yau e salu kia vakulwisa e mpaku. Yau bekongolanga e mpaku za luyalu lwa Roma, olu lumengwanga kwa nkangu. Bekongolanga mpe mpaku za nzaza ziningamenanga muna makumu mau, kwa akiti beviokelanga mu nzila zampwena ye inkita itukanga mu nsi zankaka. Aweyi Ayuda bemwenanga avakulwisi a mpaku? Ayuda ke bezolanga avakulwisi a mpaku ko, kadi nkumbu miayingi bekudikilanga e ntalu a nzimbu za mpaku. Asumuki ana bazayakene mu kuma kia mavangu mau mambi, bena mpe mwamu lambu diadi.—Luka 7:37-39.

Wau bamwene Yesu kedianga vamosi ye asumuki, Afarisi ana bekuyimwenanga vo ansongi, bayuvuidi alongoki a Yesu vo: “Ekuma o nlongi eno kedilanga vamosi ye avakulwisi a mpaku ye asumuki?” (Matai 9:11) Wau kabawidi, Yesu ubavutwidi vo: ‘Ana bena yo vimpi ke bavuidi ngang’a mawuku mfunu ko, kansi ambevo kaka. Nwenda, nwazaya e nsas’a diambu edi: ‘Nkenda nzolele, ke kimenga ko.’ Kadi kizidi bokela ansongi ko, kansi asumuki kaka.’ (Matai 9:12, 13; Osea 6:6) Kana una vo Afarisi bayikidi Yesu vo “nlongi,” ke bavovele ye nsi a ntima ko, kansi balenda longoka diambu diambote muna Yesu.

Dilenda kala vo Matai obokele avakulwisi a mpaku ye asumuki muna nzo andi kimana bawá malongi ma Yesu yo wukwa muna mwanda, “kadi ndonga muna yau banlende.” (Maku 2:15) Yesu ozolele kubasadisa bakala ye ngwizani ambote yo Nzambi. Nswaswani ye Afarisi bekuyimwenanga vo ansongi, Yesu ke vezanga asumuki ko. Wau vo nkwa walakazi ye nkenda, Yesu olenda wuka awonso bena yo yela kwa mwanda.

Yesu ofwididi avakulwisi a mpaku ye asumuki e nkenda. Kana una vo ka tondele masumu mau ko, Yesu ubafwididi e nkenda nze una kavanga kw’awana bena ye mayela. Sungamena dio vo kuna nkenda zawonso Yesu wasimba nkwa wazi yo vova vo: “Nzolele wo! Velela kwaku.” (Matai 8:3) Yeto mpe tufwete fwilanga wantu e nkenda mu mpila yayi yo kubasadisa, musungula muna kimwanda.