Mutantshi mukese panyima pa Yezu mumane kuondopa muntu uvua mutekete mubidi, udi ushala mu tshitupa tshia Kapênuma atshi pabuipi ne Mbuu wa Galela. Misumba ya bantu yakalua kabidi kudiye, ne kutuadijaye kubalongesha. Pavuaye wenda upita, wakamona Matayi, uvuabu babikila kabidi ne: Lewi, musombe ku nzubu wa dilambuila bitadi. Yezu wakamubikila mu mushindu wa dikema, umuambila ne: “Ndonda.”​—Matayi 9:9.

Anu bu Petelo, Andele, Yakobo, ne Yone, Matayi ukavua pamuapa muibidilangane ne malongesha a Yezu ne malu a kukema avuaye muenze mu tshitupa atshi. Anu bu bayidi bakuabu aba, Matayi wakitaba diakamue. Matayi wakaleja bualu ebu mu Evanjeliyo wende, wamba ne: “Nunku [Matayi muine] wakajuka, kumulondaye.” (Matayi 9:9) Matayi wakalekela mudimu wende wa dilambuisha bitadi ne kuluaye muyidi wa Yezu.

Mutantshi mukese pashishe, Matayi wakalongolola didia dinene kuende, pamuapa bua kuleja dianyisha bua dibikila dia pa buadi dia kudi Yezu edi. Pa kumbusha Yezu ne bayidi bende, mbanganyi bakuabu bavuabu babikile? Ndambu wa balunda ba Matayi ba kale, balambuishi ba bitadi, bavua muaba au. Bavua balambuisha bitadi bua bakokeshi ba bena Lomo bavua bantu bakine; mu bitadi abi muvua bivuabu bafutshisha mazuwa avua atudila ku dilobo dia muaba au, bidibu bafutshisha bangenda mushinga bavua benzela ngendu mu njila minene, ne bivuabu bafutshisha bua bintu bivua bantu babueja mu tshimenga. Mmunyi muvua bena Yuda ba bungi bangata balambuishi ba bitadi aba? Bantu bavua babapetula bualu bavua misangu ya bungi bibila pavuabu balomba bantu makuta a bungi mapite a mushinga wa tshitadi. Mu didia adi muvua kabidi ‘benji ba mpekatu,’ bantu bavua bamanyike bua dienza dia malu mabi.​—Luka 7:37-39.

Bafalese bavua badiangata bu bantu bakane bavua pabu muaba au, pakamonabu Yezu udia ne bantu ba nunku, bakebeja bayidi bende ne: “Mulongeshi wenu udi udia ne balambuishi ba bitadi ne benji ba mpekatu bua tshinyi?” (Matayi 9:11) Bu muvua Yezu mumvue lukonko luabu, wakabandamuna ne: “Bantu badi ne makanda a mubidi kabatu dijinga ne munganga to, kadi badi basama ke batu nende dijinga. Nunku, ndayi nulonge tshidi mêyi aa umvuija: ‘Ndi musue luse, tshiena musue mulambu.’ Bualu tshivua mulue bua kubikila bantu bakane, kadi mbua kubikila benji ba mpekatu.” (Matayi 9:12, 13; Hoshea 6:6) Pavua Bafalese babikile Yezu ne: “mulongeshi,” kabavua bamubikile nunku ne muoyo mujima to, kadi bavua mua kulongela kudiye bualu kampanda bua tshidi tshiakane.

Bidi bimueneka ne: Matayi mmubikile balambuishi ba bitadi ne benji ba mpekatu kuende bua bateleje Yezu ne buondopibue mu nyuma, “bualu kuvua ba bungi ba kudibu bavua bamulonda.” (Mâko 2:15) Yezu mmusue kubambuluisha bua bikale mu malanda mimpe ne Nzambi. Bishilangane ne Bafalese bavua badiangata bu bantu bakane, Yezu kavua upetula bantu ba nunku to. Uvua uditeka pa muaba wabu ne umbumvuila luse; udi mua kulua munganga wa mu nyuma kudi bantu bonso badi basama mu nyuma.

Yezu uvua umvuila balambuishi ba bitadi ne benji ba mpekatu luse, ki mbualu uvua wanyisha mpekatu yabu to, kadi mbua kubaleja dinanga dia buena divuaye muleje bantu bavua ne masama a ku mubidi. Tshilejilu, vuluka muvuaye muditeke pa muaba wa muena nsudi pavuaye mumulenge, wamba ne: “Ndi musue! Lengejibua.” (Matayi 8:3) Katuenaku mua kuikala petu ne mmuenenu wa muomumue wa luse ne kuambuluisha bakengi, nangananga kubambuluisha mu nyuma anyi?