Kufuma vene hakuka muka-kalepa, Yesu atwamine muKapelenau kuKalungalwiji waNgalileya. Vatu vamukavile cheka, ngocho aputukile kuvanangula. Kahomu apwile nakutambuka, amwene Mateu, uze vavulukilenga nawa ngwavo Levi, natwame kuzuvo yakutelela mitelo. Yesu amwambile ngwenyi: “Pwako umuka-kungukavangiza.”—Mateu 9:9.

Halwola kana Mateu te nejiva lyehi vyakunangula chaYesu navyuma vyakukomwesa alingilenga mungalila yavo, ngana muze chapwile kuli Petulu, Andelei, Yakova naYowano hakuvasanyika. Ngana mwavakivo, Mateu etavilile hahaze vene. Mateu avulukile vyuma vyasolokele muMujimbu Wamwaza uze asonekele ngwenyi: “Kaha [Mateu] akatukile, amukavangijile.” (Mateu 9:9) Ngocho Mateu asezele mulimo wenyi wakutelesa mitelo nakupwa kambaji kaYesu.

Halwola lweka, Mateu pamo hakusaka asolole kusakwilila chenyi kuli Yesu hakumusanyika, awahishile kulya chamwaza chachivulu kuzuvo yenyi. Asanyikile Yesu hamwe natumbaji twenyi. Jino veya veka asanyikile? Asanyikile nawa vakwavo azachilenga navo hakutelesa mitelo. Vateleselenga mitelo yakuhana vaka-kuyula vavaLoma vaze vajinjile chikuma. Vateleselenga jimbopolo jejilenga kungenge kwakusulikila, nakutelesa vyendo vyavatu vyazachishilenga mikwakwa yavo, nakutelesa nawa vyuma vyejilenga mulifuchi. Uno vaYuleya vamwenenga ngachilihi vaka-kutelesa mitelo? Vavahungilenga mwomwo kakavulu valyapwilenga vatu hakutambula jimbongo jajivulu jakuhambakana jize vatelele kutambula. Kukulya kana kwapwile ‘navaka-shili’ vaze vapwile napuho yayipi.—Luka 7:37-39.

Hakumona Yesu ali navatu vamuyachou, vaFwaliseu vaze valimwenenga kupwa vakwoloka vahulishile tumbaji twenyi ngwavo: “Mwomwo ika ou muka-kuminangula eji kulilanga hamwe navaka-kutambula mitelo navaka-shili?” (Mateu 9:11) Omu Yesu evwile mazu kana, avakumbulwile ngwenyi: “Vatu vavakangule kaveshi kusakiwa chimbukeko, kuvanga vaka-kuviza kaha. Ngocho yenunga mukalinangule mwalumbunukila mazu awa: ‘Ami ngunasake keke keshi vimuna vakuvatulako.’ Mwomwo ami kangwejile nakusanyika vaka-kwolokako, oloze shina vaka-shili.” (Mateu 9:12, 13; Hozeya 6:6) Ava vaFwaliseu hakuvuluka Yesu ngwavo muka-kunangula kachafumine kumichima yavoko. Chipwe ngocho valinangwileko chishina chimwe chakupandama kuvyuma vyakwoloka.

Chasoloka nge, Mateu asanyikile ava vaka-kutelesa mitelo navaka-shili mangana vevwilile kuli Yesu avakafwe vapwenga nausoko wamwaza naKalunga, ‘mwomwo kwapwile vavavulu vaze vapwile nakumukavangiza.’ (Mako 2:15) Yesu asakile kuvakafwa vapwenga nausoko wamwaza naKalunga. Yesu kasakile kulumbilisa vatu kanako, ngana muze valingilenga vaFwaliseu vaze valimwenenga kupwa vakwoloka. Ngachize, hakuvevwila keke, Yesu apwile jino hichimbuke chavo wakuvakafwa vapwenga nausoko wakukola naKalunga.

Yesu atetelele vaka-kutelesa mitelo navaka-shili. Echi kachasolwele nge asuulukile navilinga vyavoko oloze avevwilile keke ngana muze alingilenga kuvaveji vaze vapwile namisongo. Chakutalilaho, anukenu omu evwililile keke muka-mbumba nakumukwata nakwamba ngwenyi: “Ngunasake vene. Toma.” (Mateu 8:3) Nayetu nawa twatela kwivwila keke vatu vanakalikiza nakuvakafwa vapwenga nausoko wamwaza naKalunga.