A Zeezi sẽn sãoog ki-bogr soabã poore, a paa Kapɛrnawom sẽn pẽ Galɩle mogrã. Neb kʋʋng le waa a nengẽ, t’a zãms-b bũmb wʋsgo. A sẽn wa n loogdẽ wã, a yãa a Matye b sẽn boond me t’a Leevi wã, t’a zĩ yõor-yaood dɛɛgdbã zĩigẽ. A Zeezi yeel-a lame yaa: “Wa tũ maam.”—Matye 9:9.

Nand t’a Pɩyɛɛr ne a Ãndere la a Zak ne a Zã sak a Zeezi boollã, b ra zoe n miime t’a zãmsda nebã bũmb wʋsg la a maand yel-soalma. Wõnda a Matye me ra miime. Rẽ n so tɩ yẽ me sak a Zeezi boollã tao-tao. A Matye mengã wilga rẽ a Evãnzillã pʋga. Ad a sẽn yeele: “La yẽnda [a Matye] yikame n tũ” a Zeezi. (Matye 9:9) Dẽnd a Matye sakame n bas a tʋʋmdã sẽn yaa yõor-yaood deegrã, n na n lebg a Zeezi karen-biiga.

Rẽ zugẽ, a Matye maana kibs-kãseng a zakẽ wã, n bool a Zeezi ne a karen-biisã. Tõe tɩ yaa sẽn na n wilg t’a sũur yaa noogo, a Zeezi sẽn yeel-a t’a wa lebg yẽ karen-biigã. Ãnd dãmb me la a Matye bool-yã? A boola yõor-yaood dɛɛgdb sẽn da yaa a tʋmd-n-taase. Yõor-yaood dɛɛgdbã ra reegda yaood n kõt Rom taoor dãmbã zʋɩf-rãmbã sẽn da kisã. Wala makre, ned sã n kẽed tẽngã ne koosem fãa, tũu ne batayo wall yʋgma n wa, bãmb n deegd yaoodã. Zʋɩf-rãmbã ra kisa yõor-yaood dɛɛgdbã me, bala naoor wʋsgo, b ra reegda yaoodã tɩ yɩɩg b sẽn segd n deegã. Neb a taab me nebã sẽn mi tɩ b tʋʋmã yaa wẽns n da be kibsẽ wã.—Luk 7:37-39.

Fariizẽ-rãmbã sẽn da yaa tɩrs b mens nifẽ wã sẽn yã t’a Zeezi naaga nin-kãensã n maand kibsã, b soka a karen-biisã woto: “Yaa bõe tɩ yãmb karen-saambã rɩt ne yaood-dɛɛgdb la yel-wẽn maandba?” (Matye 9:11) A Zeezi sẽn wʋm sokrã, a yeel-b lame yaa: “Ka neb nins sẽn tar laafɩ wã n baood tɩp ye, yaa bãad-dãmba. Dẽ, kẽng n zãms-y koe-kãngã võore: ‘Mam sẽn dat yaa nimbãan-zoeere, ka maand ye.’ Bala, mam ka wa tɩ bool nin-tɩrs ye, yaa yel-wẽn-maandbã.” (Matye 9:12, 13; Ooze 6:6) Fariizẽ-rãmbã sẽn boond a Zeezi tɩ “karen-saambã” pa ne pʋ-peelem ye. Baasgo, b sã n sak n kelg a goamã, b na n bãnga sẽn segdã.

Wõnda a Matye sẽn bool yõor-yaood dɛɛgdb la yel-wẽn-maandb tɩ b wa kibsã yaa sẽn na yɩl tɩ b kelg a Zeezi, n paam n bãng Wẽnnaam sõma, bala b wʋsg n da zoe n tũud a Zeezi. (Mark 2:15) A Zeezi ra ratame n sõng-b tɩ b paam zood sõma ne Wẽnnaam. Fariizẽ-rãmbã sẽn da get b mens wa nin-tɩrsã ra kisa nin-kãensa, la a Zeezi ra pa kis-b ye. A ra zoeta b nimbãanega. A tõe n sõnga ned buud fãa sẽn yaa wa bãad Wẽnnaam tũubã wɛɛngẽ t’a paam Wẽnnaam zoodo.

A Zeezi sẽn zoet yõor-yaood dɛɛgdbã la yel-wẽn-maandbã nimbãanegã pa rat n yeel t’a pa kis b yel-kɛgã ye. A ra rat n sõng-b-la wa a sẽn sõng bãad-rãmbã. Tẽeg-y a sẽn zoe wãoorã nimbãanegã. A sɩɩs-a lame n yeel-a yaa: “Mam datame. Lebg yɩlemde.” (Matye 8:3) Segdame tɩ tõnd me zoe nebã nimbãanega. Sẽn yɩɩd fãa, d segd n sõng-b lame tɩ b paam Wẽnnaam zoodo.