Pa mukuvo mushomani naapera kurapa nyakuremara, Jesu anogara mu ndharaundha yo Kafarnaume, phedo no Jombe ro Garireya. Mbungano yo vandhu inoendazve kuna Jesu, zve anotanga kuvajijisa. Jesu paanofamba, anovona Mateu, anodanijwazve kuti Revhi, wakagara pa hofisi yo kushabisira. Jesu anomubvunja soko rinodakajisa maningi, rokuti, “Nditeverei.”—Mateu 9:9.

Kangaije Mateu anotoziva jijiso jimweni ja Jesu no mabasa aakaita mu ndharaundhemo, inga zvaizivavo Pedhru, Andereya, Jakobo na Johani. Mukufanana navo, Mateu anotendera mukoka uu ngokukasika. Mateu anozvisanangura mu Vhangeri rake aciti: “Mwanarumewo [Mateu pacake] wakamuka womutevera.” (Mateu 9:9) Kubviri pondhopo, Mateu anosiya sure mutoro jake inga mushabisi, wova mujiji wa Jesu.

Pa mukuvo unotevera, Mateu anoita mabuso makuru panyumba pake, kangaije kuitira kubonga ngo kukokwa kwaakaitwari ndi Jesu. Kusiyapo Jesu no vajiji vake, Mateu anokokazve ani pa mabuso aya? Anokokavo vamweni vaaishabisa navo. Ivona vanobatira utongi hwo Roma hunonyenywa weya ngo vazinji. Vanoshabisazve pa kanje, panocevera magazirina, ngoro jo vanyashavo vanofamba mu makwanja no zviro zvabva ku nyika jimweni. Waro vaJudha vazinji vanovavona kudini vashabisi avo? Vanovanyenya ngokuti kazinji vanocaja mare yakawanda kupinda inodiwa pa kushaba. Pa mabuso aya painga no ‘vaxaixi,’ vandhu vaizivikanwa ngo kuita zvakashata.—Luka 7:37-39.

VaFarisi vo kujikuja vecivona kuti Jesu ari pa mabuso no vandhu vakadari, vanobvunjisa vajiji vake kudari: “Ngenyi mujijisi wenyu anoha no vaxabisi no vaxatisi?” (Mateu 9:11) Jesu acizwa zvovanobhuya, anovadavira kudari: ‘Vakavanga avadi murapi, kaveta vanohwaja ngo vanomupsanga. Endanyi kojija bzinoreva magama okuti: “Ndinoda unyaxa, andidi mbhamba. Ngokuti andizivi kuza kodanija vakarungama, ndakazira vaxatisi”.’ (Mateu 9:12, 13; Hoseya 6:6) VaFarisi avacaidanija Jesu kuti “mujijisi” zvicibva mu mwoyo, asi pikija zvakadaro, vanojija zviri zvese ndiyena ngo pamusoro po zvakanaka.

Zviri pambhene kuti Mateu wakakoka vashabisi no vashaishi kuitira kuti vazwe zvinonanga Jesu no kurapwa kumujimu, “ngokuti vaya vaimutevera vainga vazinji.” (Marco 2:15) Jesu anoda kuvabesera kuti vave no ushamwari hwakanaka na Mwari. Mukusiyana no vaFarisi vo kujikuja, Jesu aavanyenyi. Iyena anokwevejehwa ngo kuzwira pena no unyasha; anokwanisa kubesera vese vanohwaja ngo divi ro kumujimu.

Jesu anokhombijira unyasha vashabisi no vashaishi, pijika kuti aatenderi zvishaishi zvavo, asi anovazwira pena inga zvaakaitira vanohwaja kunyama. Inga muezaniso, ceujanyi paakakhombijiraya kuzwira pena ngo kupsasa nyamapere, wonanga kuti: “Ndinobzida, vangai.” (Mateu 8:3) Atidikanivo kuva no mavonero o unyasha akaezana no a Jesu no kubesera vano utami, tovabesera maningi-ningi ngo njira yo kumujimu here?