Yesu amanle ompenusa mulipa a nanceeche, onnatitelela okhala elukuluku vakhaani o Kafarnau o Eniya yo Kalileya. Wanawiili achu ancipale annarwa wa yoowo, nave onnapacerya waahusiha. Vaavaa oneeceiye, onnamoona Mateu, yoowo oniichaniwaatho Levi, akiranthe vanipuroni voolivavo musokho. Yesu onnatheteya nwopelo wootikhiniha wa yoowo: “Kitxhare!”—Mateu 9:9.

Mwawooneya, Mateu oosuwela mahusiheryo ni miteko sa Yesu seiyo owo opankeiye mukuma yoola, ni Petro, Antreya, Yakopo, ni Yohani. Moolikana ni yaawo, Mateu onneemererya nwopelo mwawaakuveya. Mateu onnathariha yeeyo mu Muchaka awe, ariki: “Mateu, avinyaka, àmutxhara Yesu.” (Mateu 9:9) Ovinyerya vaava, Mateu onnahiya muteko awe wa oliviha musokho nave onnakhala muhuserya a Yesu.

Mu elukuluku ekina, akhweya wi ooniherye othamalela wawe nwopelo wa Yesu, Mateu onnapaka efesta etokweene owannyawe. Taani onaawopeiye wi ekhale ni Yesu vamoha ni amuhuserya awe? Phaameene, nunturu nincipale na asinthamwene akhalai a muteko wa Mateu, alipa a musokho, annakhala vaava. Awo analiviha misokho sa olamulelo wo Roma yoowo oniiciwa, ophitaanyerya misokho sa apophoro anaphiya mmapuro a apophoro, misokho sa ikaaro sinavira mu arampha ookhweleya ni misokho sa ichu sinarumiheliwa elapo ekina. Mano, Ayuta oothene anawoona hai alipa a musokho? Achu annaathanya nthowa nawi moohiroromeleya annaliviha ikhorowa sincipale opwaha seiyo sinaweheryiwa. Aakhalavotho va efesta ‘anamacheka’ yaawo asuweliwe ntoko achu aweera soonanara.—Luka 7:37-39.

Emoonaka Yesu va efesta vamoha ni achu yaala, Afarisi yaawo aniiseera awookololowa nave ari vaava annaakoha amuhuserya awe: “Muhusiha anyu onlyela seni ni alipa a musokho ni atxhu otxheka?” (Mateu 9:11) Amanle waawiriyana, Yesu onnaakhula: “Ale arino ekumi hanamuhawela namuku, nto alipa awitxeliwa. Haweni, mwahuserye masipelo ala: Kinnakhwela ikharari, kahi mukutxho, wona wi miyo nkirwele owitxhana alipa òrèra murima, nto atxhu òtxheka.” (Mateu 9:12, 13; Oseya 6:6) Vaavaa Afarisi anamwiichanaaya Yesu ntoko “muhusiha,” masu aya hanakhumela vathi va murima nyenya awo ananwerya ohuserya echu orweela wa yoowo vooloca sa wookololowa.

Mwawooneya, Mateu aawompe alipa musokho ni oocheka wi ewerye onwiriyana Yesu nave epenuwe makupa oomunepani, “wona wi yàri antxipale yamutxhara.” (Marko 2:15) Yesu onachuna waakhaviherya wi ekhaleno onthamwene waphaama ni Muluku. Moohiyana ni Afarisi yiisoona okhala awookololowa, Yesu hanaathanya achu yaawo. Owo onaceenyeryiwa ni oreera murima ni ikharari; onanwerya orumeela ntoko totore oomunepani wi aakhaviherye oothene aniiceliwa omunepani.

Yesu onnooniherya ikharari vooloca sa alipa a musokho ni oocheka, ohiya wi alevelele soocheka saya, nyenya wi awooniherye miyoonelo sa oreera murima moolikana ni seiye oonihenryeiye wa yaale aapenunseiye ireca soomwiilini. Ntoko yootakiherya, nkuupuwelani vaavaa mooreera murima aamutannyileiye namareca, ariki: “Kinnakhwela, penuwá.” (Mateu 8:3) Apwanne hannaphwanela wunnuwiha moonelo mmohamoha wa wooniherya ikharari  ni waakhaviherya yaale ari oothoiwa, xaxaxa mmukhalelo woomunepani?