Ag-abayag kayarin amaabig na paralitiko, nansiansia si Jesus ed Capernaum diad Dayat na Galilea. Inmasingger lamet ed sikato iray totoo tan imbangat to ra. Legan a manaakar, anengneng toy Mateo, a tatawagen met a Levi, ya akayurong ed panagsingilay buis. Sikatoy inimbitaan nen Jesus a kuan to: “Magmaliw kan patumbok ko.”​—Mateo 9:9.

Mapatnag ya pamilyar met lay Mateo ed saray bangat tan gagawaen nen Jesus ed satan a lugar, singa si Pedro, Andres, Santiago tan Juan, kanian akila met ya tampol. Oniay impaneskribe nen Mateo ed saya diad Ebanghelyo to: “Diad saman et sikatoy [si Mateo] inmalagey tan tinmumbok” ed si Jesus. (Mateo 9:9) Kanian, tinaynan toy trabaho ton managsingil na buis tan nagmaliw ya disipulo nen Jesus.

Diad saginonor, angiyuksoy na baleg a ponsia si Mateo, nayarin pian ipanengneng so apresasyon tod sayan espisyal ya asainmin ya inter nen Jesus. Siopa ray imbitado nilikud ed si Jesus tan saray disipulo to? Wadman iray datin kakaiba to ya managsingil na buis. Mansisingil iray buis parad saray kabkabusol ya Romanon autoridad, kaiba lay buis ed saray barkon ondadaong ed pier, buis parad idalan ed karsada, tan saray babayaran parad imported iran produkto. Antoy kaslakan ya impresyon na saray Judio ed saraman ya managsingil na buis? Balbalawen ira na totoo lapud mabetbet ya sobray sisingilen da. Wala met iray “makasalanan” ya linmad ponsia, totoon kabkabat ya manggagaway mauges.​—Lucas 7:37-39.

Nen anengneng na saray mantunongtunongan ya Fariseo ya akidungo si Jesus ed sikara, tinepetan da ray disipulo to: “Akin et midudungo so managbangat yo ed saray managsingil na buis tan saray makasalanan?” (Mateo 9:11) Arengel ira nen Jesus tan inmebat: “Agmankaukolan na managtambal iray totoon maksil so laman da, noagta saraman labat so mansasakit. La kayo, sirin, tan aral yo so kabaliksan na saya: ‘Say labay ko et panangasi, aliwan say bagat.’ Ta linma ak dia pian manawag ed saray makasalanan, aliwan saray matunong.” (Mateo 9:12, 13; Oseas 6:6) Mankuankuanan iray Fariseo nen tinawag day Jesus ya “managbangat,” balet walay naaralan dad sikato no anton talagay duga.

Posiblin inimbitaan nen Mateo iray managsingil na buis tan saray makasalanan pian narengel day Jesus tan natambal irad espiritual, “ta amayamay ed sikara so tinmumbok ed sikato.” (Marcos 2:15) Labay iran tulongan nen Jesus pian nawalaan iray maong ya relasyon ed Dios. Aliwan singa saray mantunongtunongan ya Fariseo, agto ra binalaw. Naabagey tan akasian to ra, kanian sikatoy nagmaliw ya espiritual a doktor na amin ya mansasakit ed espiritual.

Impanengneng nen Jesus so panangasi ed saray managsingil na buis tan makasalanan, aliwan pian konsintien iray kasalanan da, noagta pian ipanengneng so panangaro ya singa impatnag tod saramay mansasakit ed pisikal. Singa bilang, maabagey ton diniwit imay akating ya inkuan to: “Labay ko! Nalinisan ka.” (Mateo 8:3) Agta labay tayo met ya kasian tan tulongan iramay mankaukolan, nagkalalo lad espiritual?