Jesusqa Capernaum llajtapi uj suchu runata sanoyachiytawan, chayllapipuni qhepakorqa. Watejmantataj ashkha runas Jesusman rerqanku. Jesustaj paykunaman yachacherqa. Chantá Jesusqa impuestota pagana wasi chaynejta purishaspa Mateota rikorqa. Mateoqa impuesto pagana wasipi tiyasharqa, ujnin sutintaj Leví karqa. Jesusqa payta nerqa: “Qhepayta jamuy”, nispa (Mateo 9:9).

Mateotajrí chay ratopacha “sayariytawan Jesuspa qhepanta rerqa”. Chaytaqa Mateollataj qhelqasqan libropi willawanchej (Mateo 9:9). Payqa trabajonta saqepuytawan, Jesuspa yachachisqanman tukorqa. Mateoqa Jesús Capernaumpi yachachisqanta, milagrosta ruwasqantapis yacharqañachá, imaynatachus Pedrowan, Andreswan, Santiagowan, Juanwan yacharqanku, ajinata.

Chaymanta qhepata, Mateoqa jatun mikhuyta wasinpi wakicherqa. Ichapis Jesús payta wajyarisqanmanta agradecekunanpaj. Chayrayku Jesusta, yachachisqasninta ima wasinman invitarqa. Jinapis Mateoqa invitarillarqataj impuesterosta, juchasapastawan. Impuesterosqa impuestota cobraj kanku: qocha kantuman chayamoj barcosmanta, ñanta pasaj ranqherosmanta, waj llajtasmanta imallatapis apamojkunamantawan. Paykunaqa Romamanta autoridadespaj trabajaj kanku, chay autoridadestataj judiosqa chejnikoj kanku. Chantapis impuesterosqa kurajta cobraj kanku. Chayrayku judiosqa impuesterosta chejnikoj kanku. Mateo invitakorqa chay juchasapasqa, millay kausayniyoj runas karqanku (Lucas 7:37-39).

Allin runas kasqankuta yuyakoj fariseosrí, Jesusta chay runaswan mikhushajta rikuspa yachachisqasninman nerqanku: “¿Imaraykutaj yachachejniykichej impuesteroswan, juchasapa runaswan khuska mikhunri?”, nispa (Mateo 9:11). Jesustaj chayta uyarispa nerqa: “Sano runasqa mana doctorta necesitankuchu, manachayqa onqosqaslla. Rispa yachamuychej, imachus niyta munasqanta Diospa nisqan, pay nerqa: ‘Wajkunata khuyakunaykichejta munani, manataj noqapaj uywasta ñakʼanaykichejtachu’, nispa. Noqaqa mana cheqan runastachu wajyaj jamuni, manachayqa juchasapasta”, nispa (Mateo 9:12, 13; Oseas 6:6). Fariseosqa simillamanta Jesusta “Yachachejníy” nej kanku. Paykunaqa Jesusmanta allin kajta ruwayta yachakuyta atispapis, mana paymanta yachakuyta munarqankuchu.

Mateoqa ichapis juchasapastawan impuesterostawan wasinman wajyarerqa, Jesuspa yachachisqanta uyarinankupaj. Jesustaj chay runasta yanapariyta munarqa Diosman kutirikunankupaj. Payqa mana fariseos jinachu chay runasta pisipaj qhawarqa. Astawanpis paykunata khuyakorqa. Jesusqa Diosmanta karunchasqa kajkunata yanaparqa, imaynatachus uj doctorqa onqosqata sanoyakunanpaj yanapan, ajinata. Chayrayku “chay runasmanta ashkhas Jesuspa qhepanta rerqanku” (Marcos 2:15).

Jesusqa impuesterosta, juchasapastawan khuyakorqa, imaynatachus onqosqasta rikuspa khuyakorqa, ajinata. Payqa khuyakusqanrayku lepra onqoyniyoj runata llankharerqa, nerqataj: “Arí, munani. Sanoyapuy”, nispa (Mateo 8:3). Noqanchejpis Jesús jina khuyakuyniyoj kananchejpaj kallpachakuna. Yanapata necesitajkunatataj yanaparina, astawanqa Diosman qayllaykunankupaj yanaparina.